Bakı şəhərində avtomobil nəqliyyatı sahəsində mövcud olan və qısa müddət ərzində həlli mümkün sayılan problemlərə dair Tədbirlər Planının ilkin layihəsi hazırlanıb. Nazirlər Kabinetinin yaydığı məlumatda qeyd edilir ki, Tədbirlər Planına yolların buraxılış imkanlarının artırılması, ictimai nəqliyyatın daşıma potensialının genişləndirilməsi, yollarda nəqliyyatın hərəkətinin tənzimlənməsi və başqa məsələlər daxildir.
Qeyd edək ki, paytaxt Bakı ərazisində avtomobil nəqliyyatı ilə bağlı sıxlıq yaşanır. Nəqliyyat sıxlığının aradan qaldırılması üçün yolların buraxılış imkanlarının artırılması nəzərdə tutulur. Yolların buraxılış imkanlarının artırılması dedikdə, yolların genişləndirilməsi nəzərdə tutulur. Bunun üçün yol kənarında olan obyektlər, evlər sökülməlidir. Yol kənarında olan tikililər sökülərsə yollar genişlənər, bununla da Bakı şəhərində müşahidə olunan uzun-uzadı tıxacın qarşısı, qismən də olsa, alınar.
Fərhad Eyyubov: “Tıxacın qarşısını almaq üçün yolların genişləndirilməsinə də diqqət ayırmaq lazımdır”
Azərbaycan Texniki Universitetinin Avtomobil daşımaları və yol hərəkətinin təşkili kafedrasının dosenti, nəqliyyat eksperti Fərhad Eyyubov “Bakı-Xəbər”ə açıqlamasında qeyd etdi ki, Bakı şəhərində hər zaman tıxac yaşanıb. Ancaq son zamanlar bu məsələ böyük bir problemə çevrilib.
Ekspert hesab edir ki, böyük şəhərlərdə nəqliyyat sıxlığını aradan qaldırmaq üçün üç üsuldan istifadə olunur: “Birincisi, memarlıq layihələndirmə işləridir. Yəni yolların genişləndirilməsi. İkinci üsul opertiv təşkil etmədir. Burda yollarda ani olaraq hərəkət istiqaməti dəyişir. Ancaq mən hesab edirəm ki, ikinci üsulun Bakıda həyata keçirilməsi mümkün deyil. Çünki paytaxtın 70 faizində yollar yetərincə genişləndirilib. Yerdə qalan 30 faizində isə şəhərsalma layihələndirmə prosesi zaman sökülən binaların yerində müəyyən yollar çəkilməlidir. Ancaq sahibkarlar həmin binanı alır və həmin yerdə özlərinə lazım olan obyekt tikir. Bu səbəbdən də yolların genişləndirilməsi mümkün olmur. Bu məsələni dövlət səviyyəsində həll etmək lazımdır. Hansı ərazidə parklanma yeri olmalıdırsa, orada nəqliyyat vasitələri üçün dayanacaq yaradılmalıdır. Nəzərə almaq lazımdır ki, tıxaca səbəb olan əsas amillərdən biri də parklanma yerinin az olmasıdır”.
Həmsöhbətimiz hesab edir ki, tıxacın qarşısını almaq üçün yolların genişləndirilməsinə də diqqət ayırmaq lazımdır. Hansı ərazidə yolun genişləndirilməsi mümkün olarsa orda müəyyən işlər görülməlidir: “Bakı şəhərində avtomobil nəqliyyatı sahəsində mövcud olan problemlərə dair Tədbirlər Planı güclü formada, elmi cəhətdən yerinə yetirilərsə şəhərdə nəqliyyat sıxlığı problemi aradan qalxar”.
Elxan Əliyev: “Rayon icra hakimiyyətlərinin memarları binaların inşasına icazə verərkən yolların vəziyyətini nəzərə almır”
Sosial sahə üzrə ekspert Elxan Əliev qeyd etdi ki, tıxacı aradan qaldırmaq üçün alternativ yollardan istifadə edilməlidir: “Bakıda yol infrastrukturu yenidən qurulmalıdır. Çünki Bakı günü-gündən böyüyür. Əhali sayı paytaxtda kəskin artıb. Yol infrastrukturu isə bu qədər əhali sayına hesablanmayıb. Xüsusilə Abşeronda əhali sayı durmadan artır, yeni binalar inşa olunur. Rayon icra hakimiyyətlərinin memarları isə bu binaların inşasına icazə verərkən yolların vəziyyətini nəzərə almır”.
Günel CƏLİLOVA
