Bakı şəhəri, Sumqayıt şossesi Y\X, ev 8 ünvanda qeydiyyatda olan, hazırda Sabunçu rayonu Balaxanı qəsəbəsi, 2-ci mədən 87 ünvanda yaşayan təqaüddə olan mayor Mirzəyev Mayıl Siracəddin oğlu mənzil hüququnun pozulması məsələsinin ictimailəşdirilməsi üçün “Bakı-Xəbər”ə müraciət edib. O, qəzetimizə ünvanladığı müraciətdə qeyd edir ki, ev növbəsi hüququ pozulub və illərdir növbədə olsa da, hələ də mənzillə təmin olunmayıb.
M.Mirzəyev qeyd edir ki, 1983-cü ildə DİN-in Yanğından Mühafuzə Orqanlarında xidmətə qəbul olunub, 1987-ci ildə yaşadığı Binəqədi rayonunda (keçmiş Kirov rayonunda) mənzil uçotuna alınıb: “RİH-nə mənzil ayrılmadığından və mənim məişət şəraitimin olmaması ilə əlaqədar xidmət etdiyim Yanğın Təhlükəsizliyi Dəstəsinin rəhbərliyinə müraciətim əsasında mənzil uçotum iş yerinə keçirildi.
Hörmətli redaksiya! Qeyd etmək istəyirəm ki, hər il “Neftyağ” zavodu ilə Yanğın Təhlükəsizliyi Dəstəsi arasında bağlanan ikitərəfli müqaviləyə əsasən obyektlərin yanğın təhlükəsizliyi təşkil olunur. Əməkdaşlara mənzil verilməsi məsələsi müqavilədə öz əksini tapırdı. Dövlət Neft Şirkəti tərəfindən “Neftyağ” zavoduna ayrılan mənzillərin razılaşmaya əsasən 5%-i Yanğın Təhlükəsizliyi Dəstəsinin əməkdaşlarına verilirdi.
Mənim Yanğın Təhlükəsizlik Dəstəsinin 23 fevral 2005-ci il tarixli sosial məişət inkişafı üzrə birgə iclasın 1 saylı protokoluna əsasən, dəstənin ümumi mənzil növbəsinə keçirilməyimi Xətai rayon İcra Hakimiyyəti 22 mart 2005-ci il tarixli 221 nömrəli Sərəncamla təsdiq edib.
Fövqaladə Hallar Nazirliyinin rəhbərliyindən mənə bildirildiyinə görə, Yanğından Mühafizənin əməkdaşlarına 2010-cu ildən etibarən ARDNŞ (SOCAR) mənzil verməkdən imtina edir.
Mən SOCAR-ın məsələyə bu cür ədalətsiz münasibət bəsləməsini qanunazidd hesab edirəm. Bununla heç cür barışa bilmirəm. Bildirirəm ki, 2004-cü ildə bağlanan müqavilədə mənzil məsələsi nəzərdə tutulub. Məhz ona görə də, mən mənzil uçotuna alınmışam. Əks halda mənzil uçotum yaşayış yerindən iş yerinə keçirilməzdi”.
M.Mirzəyev yazır ki, Azərbaycan dövlətinin strateji əhəmiyyətli obyektlərindən biri olan SOCAR 2010-cu ildən etibarən hər an həyati təhlükədə olan, odla mübarizə aparan insanların əməyini istismar etməklə, onların mənzil-məişət, sosial məsələlərini nəzərə almaması nə qədər ədalətlidir? “Qeyd etmək istəyirəm ki, maraqlı tərəf kimi nə Xətai RİH, nə də FHN keçmiş təqaddə olan əməkdaşı kimi mənim hüququmu müdafiə etmir. Mənzil hüququmun pozulması ilə əladar cənab Prezidentə, 1-ci vitse-prezidentə, Prezidentin köməkçilərinə, Baş nazirə, Baş nazirin müavininə müraciətlərim hər dəfə aidiyyəti üzrə SOCAR-a ünvanlanıb. Hər dəfə mənə eyni məzmunda məktublarla bildirilib: “SOCAR üzrə əmək münasibətlərində olan və mənzil növbəsində dayanan işçilər növbəlilik əsasında mənzillə təmin olunurlar. SOCAR üzrə əmək münasibətlərində və mənzil növbəsində olmadığınız üçün sizin mənzil məsələsinin həlli SOCAR tərəfindən mümkün deyildir”. Hüququmun bərpası ilə bağlı məhkəmələrə müraciətlərim də heç bir nəticə verməyib. Nərimanov Rayon Məhkəməsində cavabdehin nümayəndəsi iştirak edərək etiraf edib ki, “SOCAR Yanğından Mühafizənin əməkdaşlarına növbəlik əsasında mənzillər verib. Lakin sizə gəldikdə isə sadəcə öhdəlik götürməmişdir”. Məhkəmənin hakimi ədalətli mühakimə etmədi, işə obyektiv baxmadı və qərarı dərhal bildirmədi. Səhərisi gün zəng edib soruşanda bildirdi ki, iddian qəbul edilmədi”.
Apellyasiya şikayəti verdiyini yazan şikayətçi vurğulayır ki, Apellyasiya Məhkəməsində cavabdeh və maraqlı şəxs iştirak etməyib: “Etiraz etsəm də məhkəmə iclası keçirildi. Cavabdehə müqavilənin məhkəməyə təqdim edilməsi barədə sorğu göndərilmədi. 1-ci instansiya məhkəməsinin qərarını qüvvədə saxladı. Məhkəmələrin işə belə ədalətsiz baxması məndə belə bir əminlik yaratdı ki, məhkəmə vətəndaşın hüquqlarının təminatçısı yox, dövlət orqanlarının, məmurlarının müdafiəçisi kimi çıxış edir. Ona görə də mən kassasiya şikayəti vermədim. Şikayət verməyi əhəmiyyətsiz sayıram.
...Mən dövlətimə, xalqıma xidmət etmişəm. İşlədiyim müddətdə həmişə çalışmışam ki, baş vermiş yanğınların qarşısını anında alım, millətimə və dövlətimə ziyan dəyməsin...”
İradə SARIYEVA
