Məktəblərdən yayılan görüntülərdən sonra bir sıra ümumtəhsil müəssisələrində şagirdlərin dərsə mobil telefon gətirməsinə qadağa qoyulub. Bu barədə sosial platformalardakı təhsil forumlarında məlumat paylaşılıb. Xəbərə görə, artıq paytaxtın bir sıra ümumtəhsil müəssisələri şagirdlərə məktəbə mobil telefon gətirməyi yasaqlayıb.
Bildirilib ki, dərsə mobil telefonla daxil olan şagirdlərin telefonları əllərindən alınaraq qaytarılmayacaq. Məktəb direktorları bunu mobil telefonların dərsi pozması ilə əlaqələndirsələr də, əsas səbəb kimi son günlər məktəblərdə baş verən neqativ halların şagirdlər tərəfindən telefonla çəkilərək yayılması göstərilir.
Maraqlıdır, mobil telefon tədris prosesinə mane olduğu üçün, yoxsa məktəblərdəki xoşagəlməz halların çəkilib yayılmasına səbəb olduğu üçün qadağan olunur?
Güllü Əliyeva: “Dərs prosesi zamanı şagirdlərin sinifdə mobil telefondan istifadə etməsi yolverilməzdir”
Müəllim Güllü Əliyeva hesab edir ki, dərs prosesi zamanı şagirdlərin sinifdə mobil telefondan istifadə etməsi yolverilməzdir: “45 dəqiqə ərzində uşağın bütün diqqəti dərsdə, müəllimdə olmalıdır. O, bu müddət ərzində müəllimin izah etdiyi dərsə diqqətlə qulaq asmalıdır. Ancaq əlində telefon olan şagirdin diqqəti müəllimdə yox, telefonda olur. Onun telefonuna zəng və ismarıcın gəlməsi isə müəllim, uşaqların fikrinin yayınmasına və dərs prosesinin pozulması səbəb olur. Biz onlara nə qədər ciddi nəzarət etsək belə, yenə də mobil telefonlu şagirdlər dərsi pozurlar”.
Müəllimə deyir ki, bəzi şagirdlər sanki məktəbdə macəra axtarışındadırlar və baş verən ən kiçik hadisələri dərhal çəkərək sosial şəbəkələrdə paylaşırlar: “Son zamanlarda biz tez-tez belə halların şahidi oluruq. Fikrimcə, şagirdlərin məktəbdə mobil telefondan istifadəsinə məhdudiyyətlər qoyulmalıdır. Şagirdlər anlamalıdırlar ki, onlar məktəbə təhsil almağa gəlir, telefonda oyunlar oynamağa, çəkiliş etməyə deyil”.
Könül İsmayılova: “Uşaqlarımızı tərbiyəli yetişdirmək istəyiriksə, sadəcə telefon amilinə fokuslanmaq yanlış olardı”
Psixoloq Könül İsmayılova bildirdi ki, problemi məktəblilərin etdikləri əməli videoya çəkib paylaşmaqda yox, həmin davranışlarda axtarmaq lazımdır. Əgər bir şagird ayağını stolun üstünə qoyursa, bu əməlini çəkib paylaşmasa belə edəcək: “Bu gün məktəbli uşaqların telefon istifadə etməsi heç də zəruri deyil. Lakin buna qadağa qoyulsa belə əməl etmək mümkünsüz görünür. Deyək ki, məktəblərin birində güclü nəzarət oldu və uşaqların telefon istifadəsinə qadağa qoyuldu. Ancaq unutmaq olmaz ki, problem məktəblinin telefon istifadə etməsində deyil, ondan düzgün istifadə etməməsindədir. Hansısa bir uşaq ayağını masanın üstünə qaldırıb bunu videoya çəkir. Məktəbli ayaqlarını stolun üstünə qoyacaq qədər davranış pozuntusu sərgiləyirsə, o bunu video çəkməsə də edəcək. Demək, problem telefon istifadəsini məhdudlaşdırmaqla həll olmur. Əgər uşaqlarımızı tərbiyəli yetişdirmək istəyiriksə sadəcə telefon amilinə fokuslanmaq yanlış olardı”.
Psixoloqun sözlərinə görə, yaranan problemlərin həllində məktəblərin üzərinə böyük öhdəlik düşür: “Məktəb psixoloqları yaxşı işləməlidir. Bunun üçün mütləq ailə ilə kompleks şəkildə hərəkət edilməlidir. Məktəbə hər telefon aparan uşaq ondan qeyri-etik istifadə etmir. Bəzi şagirdlər telefonunu heç çantasından belə çıxartmır. Çətin tərbiyə olunan uşaqların tərbiyəsi və psixologiyası ilə vaxtında məşğul olduqda cəmiyyətə sağlam şəxsiyyət bəxş edə bilərik. Sadəcə telefon qadağası ilə heç bir problem həll edilməyəcək”.
Elşən Qafarov: “Məktəblərdə telefon qadağasının tətbiq olunması da sözügedən problemlərin həlli üçün kifayət deyil”
Təhsil eksperti Elşən Qafarov bildirdi ki, orta məktəblərin ümumi nizamnaməsi yoxdur. Yəni məktəblər müəyyən edilmiş vahid qaydalarla idarə olunmur. Bu tip qadağaların qoyulması da təhsil müəssisəsinin daxili məsələsidir: “Məktəblərdə telefon qadağasının tətbiq olunması da sözügedən problemlərin həlli üçün kifayət deyil. Ümumi təhsil müəssisələrində şagird sayının azaldılması onların məktəbdaxili davranış qaydalarına nəzarəti asanlaşdıra bilər”.
Günel CƏLİLOVA
