Ölkəmizdə müxtəlif taksi şirkətləri fəaliyyət göstərir. Sürücülərin əksəriyyəti daha çox onlayn qaydada şirkətə üzv olaraq işə başlayırlar. Beləliklə, sürücülərin hər hansı pis vərdişinin olub-olmadığı dəqiqləşdirilmir. Belə halların nəticəsidir ki, son vaxtlar polis tərəfindən saxlanılan narkoman sürücülərin sayı da artıb. Bu cür hadisələr isə cəmiyyətdə narahatlıq doğurur, insanların təhlükəsizliyini gündəmə gətirir.
Hazırda “Uber” taksi sürücülərinin narkotik alverilə məşğul olduqları iddia olunur. Bu barədə jurnalist Könül Aypara “Facebook” hesabında bildirib. “Uber” sürücüsünün Yasamalda narkotik alveri ilə məşğul olduğunu qeyd edən jurnalist bu halın ilk olmadığını, hətta dəfələrlə təkrarlandığını deyib: “Özləri cəhənnəmə, kiminsə balasını zəhərləyir və müştərilərinin həyatını təhlükə altına atır”.
Emil Maqalov: “Taksi fəaliyyəti ilə məşğul olanların narkotik vasitələri onlayn satan şəxslərin toruna düşmə ehtimalı çoxdur”
Narkokuryerlərin taksi fəaliyyəti ilə məşğul olması ilə bağlı məlumata fikir bildirən narkomaniya üzrə ekspert Emil Maqalov qeyd etdi ki, sürücülər adətən narkotik vasitələri onlayn satan şəxslərə kuryerlik edir: “İnsanların sosial durumunun aşağı olmasından istifadə edən, psixoloji təsir altına tez düşən insanları dərhal ələ alan narkotacirlər özlərini göstərmədən satış şəbəkəsini qurmağa nail olur. İşsiz-gücsüz, ehtiyac içində yaşayan insanlar da qeyri-ixtiyarı razılaşır. Bu şəbəkələr “tora saldıqları” insanlara əvvəlcədən 200-300 manat ödəniş etməklə həm şirnikləndirir, həm də bu işin öhdəsindən gəlsələr daha çox qazanacaqlarına inandırır. Narkotacirlər narkotik vasitələri müxtəlif yerlərdə, ağacların, kolların dibində gizlədirlər. Narkotik istifadəçiləri və narkokuryerlər də həmin yerə gedərək alacaqları maddəni əldə edirlər. Taksi fəaliyyəti ilə məşğul olan şəxslərin narkotik vasitələri onlayn satan şəxslərin toruna düşmə ehtimalı çoxdur. Bəziləri bunu bilərəkdən gəlir qazanmaq məqsədi ilə edir. Bəziləri isə apardığı bağlamanın içərisində nə olduğunun fərqinə belə varmır. Müştəridən təhvil alıb, qeyd olunan ünvanda onu gözləyən şəxsə təhvil verir və çıxır gedir”.
Elxan Əliyev: “Narkotik istifadə edib taksiçiliklə məşğul olan çoxlu sayda sürücülər var”
Sosial sahə üzrə ekspert Elxan Əliyev qeyd etdi ki, Uber taksi şirkətlinin Azərbaycana ziyanı çoxdur: “Danılmaz faktdır ki, bu gün ən çox şikayət və narazılıq məhz bu taksi şirkəti ilə bağlıdır. Həmin şirkətdə çalışan sürücülər itin zülmünü çəkir, qəpik-quruşa taksi sürürlər. maddi vəziyyəti və iradəsi zəif olan şəxslər də narkokuryerlərin qurbanına çevrilir. Istənilən şirkət, müəssisə işçisinə normal əmək haqqı verməlidir ki, gözü orda-burda olmasın. Aidiyyəti qurumlar məlum şikayətlə bağlı artıq müvafiq işlər görür”.
Həmsöhbətimiz onu da əlavə etdi ki, narkotik istifadə edib taksiçiliklə məşğul olan çoxlu sayda sürücülər var. Həmin sürücülər hüquq-mühafizə orqanlarının səyi nəticəsində müəyyən olunaraq, məsuliyyətə cəlb olunur. Yaxşı olar ki, taksi sürücüləri narkoloji testdən keçsin, belə olarsa nəqliyyat sahəsində yaşanan xoşgəlməz hadisələr azalar.
Günel CƏLİLOVA
