Azərbaycan xalqının erməni faşizmi üzərində tarixi qələbəsi, torpaqlarımızın otuz illik işğaldan azad edilməsini və xalqımızın dünyada qalib xalq kimi tanınmasını təmin etməklə yanaşı, həm də qədim bir xalqın son 300 ilə yaxın bir dövrdə düçar edildiyi məğlubluq sindromundan xilas olması baxımından da böyük tarixi əhəmiyyətli hadisədir.
Ali Baş Komandan, Azərbaycan xalqının əvəzolunmaz lideri, möhtərəm Prezident İlham Əliyevin rəhbərliyi altında ordumuzun nail olduğu bu tarixi qələbə haqqında hər gün, hər saat danışmaq, onun xalqımızın tarixindəki dəyərini müzakirə etmək mənəvi tələbatdır. Bu sıradan Azadlıq Hərakatçıları İctimai Birliyinin Azərbaycan Dövlət Pedaqoji Universiteti ilə birgə təşkil etdiyi qələbənin ikinci ildönümünə həsr edilmiş Konfrans tələbə-gənclərin böyük çoşqusu ilə müşayiət edilmişdir. Tədbir Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Azadlıq Hərakatçıları İctimai Birliyinin həyata keçirdiyi “Ali təhsil müəssisələrində Vətən müharibəsinə həsr edilmiş Konfransların keçirilməsi” layihəsi çərçivəsində gerçəkləşdirilmişdir. Tədbiri giriş sözü ilə birliyin sədri, yazıçı-publisist Təhmasib Novruzov açmış, erməni faşizmi üzərində tarixi qələbənin ən mühüm aspektləri haqqında məlumat vermişdir. Tədbir açıq elan edildikdən sonra Azərbaycan Respublikasının əzəmətli Dövlət Himni səsləndirilmiş, Vətən müharibəsində həlak olmuş şəhidlərimizin ruhu bir dəqiqəlik sükutla yad edilmişdir.Sonra “Zəfər tariximiz – Hünər tariximiz” video-çarxı nümayiş etdirilmişdir. Konfransda çıxış edən Azərbaycan Dövlət Pedaqoji Universitetinin prorektoru, professor Fikrət Rzayev, şəhid anaları Aytəkin Nağıyeva, Sevil Hüseynova, Naibə Mütəllimzadə, Mətanət Məhərrəmova,Vətən Müharibəsi Qaziləri Fəqan Niftəliyev, Çingiz Abdullayev, QHT sədri Elnarə Abbasova, kinq-boks üzrə baş məşqçi Əli Cəfərov, universitetin tələbələri Lalə Əsgərova, Ulduz Əsgərova, Nəzrin Abışzadə və başqaları 2020-ci ilin payızında və sonrakı əməliyyatlarda erməni faşizminə vurulan ağır mənəvi və hərbi zərbələrdən, şəhidlərin, qazilərin tarixə həkk olunan misilsiz şücaətlərindən ətraflı danışdılar.
