Dağlar diyarı Lerik rayonunda kənd adamın taleyi, sosial vəziyyəti çoxdan unudulub. Açıq desək, elə bil ki, Azərbaycanımızın bir parçası olan burada torpağa bağlı, öz halal zəhməti hesabına dolanan kəndlinin azad nəfəs almağa, xoşbəxt, firavan günlər görməyə mənəvi haqq yoxdur. İndi rayon idarələrində özbaşınalıq, soyub-talamaq, sadə insanların ünvanına təhqiredici sözlər demək adı haldır. Halbuki, bu qarnı yekələr, başı boşlar öz övladlarının başına ləçək bağlayıb evdə gizlətdiyi halda, kasıbların uşaqları İkinci Qarabağ müharibəsində Vətən naminə qan tökürdülər.
Lerikdə məmurlar o qədər harınlaşıb ki, heç ölkə rəhbərinin verdiyi sərəncamlarını belə saya salmırlar. Qəribədir, bu dağlar diyarına hər yeni rəhbər gələndə, kəndlərdə vəziyyət daha da ağırlaşır. Rüşvətxorlara, haram yeyim ar-namus bilməyənə sanki meydan açılır. Məhz buna görə də doğma ata yurdunu qoyub qaçanların sayı bilinmir. Bax, beləcə bilə-bilə Lerikin kəndləri xarabalığa çevrilir.
Kəndlərdə vəziyyət hər gün də ağırlaşır. Mollalar, dükançılar, məmur sürücülər, sadə insanların qanını sorub məmurun gözündə ağsaqqal kimi görünənlər,...get-gedə harınlaşır. Həftələrlə işığı yanmayan kənd evləri, dağılmış yollar, sovet dövrün yaraşığı olan, hazırda isə yararsız hala düşmüş sosial obyektlər böyük fəlakətdir. Ən əsası isə “mavi” qazı sağa-sola getdiyi halda Lerik kəndlisi bir otaqlı evini belə isitməyə yanacaq tapa bilmir. Burada soyuq evlərdə can verə-verə günlərini sayan insanları görəndə inanmağın gəlmir ki, dünyada Lerik kimi bir sahibsiz yer olsun. Bunun da birinci günahı yalan vədlərlə dövlətin vətəndaşların sosial məsələlərin həlinə ayırdığı pulları mənimsəyən yerli məmurlardadır. Xalqın böyük məhəbbət göstərdiyi dövlət rəhbəri İlham Əliyev gecə-gündüz hər bir ölkə vətəndaşın rifahı naminə çalışdığı bir zamanda Lerikdə isə vəzifə başında duranlar özündən başqa heç kimi düşünmürlər.
Zəfər ORUCOĞLU Azərbaycan Jurnalistlər Birliyinin üzvü
