Son günlər mağazalarda qara çörək qıtlığı müşahidə olunur. Alıcılar paytaxtın bəzi qəsəbə və rayonlarında yerləşən mağazalarda qara çörək tapa bilmədikləri ilə bağlı narazılıq edir. Məlumata görə, son 10 gündə qara çörək istehsal olunmadığı üçün dükanlara verilmir. Bildirilir ki, ölkədə çovdar unu qıtlığı yaranıb. Bu səbəbdən də çörəkbişimə müəssisələri çovdar unu ala bilmədikləri üçün qara çörək istehsalını dayandırıb.
Məlumat üçün bildirək ki, qara çörək üçün lazım olan çovdar unu ölkəmizə əsasən Rusiyadan idxal olunur. Rusiya ilə Ukrayna arasında yaşanan gərginlik çovdar unu və digər məhsulların idxalında problem yaradır.
Onu da qeyd edək ki, ölkədə çovdar unu çörəyi, əsasən iki müəssisədə - "N1" Çörək Zavodu və "Çörəkçi" zavondunda istehsal olunur.
"N1" Çörək Zavodu: “İki həftəyə yaxındır çovdar unu ala bilmirik və bu səbəbdən də…”
"N1" Çörək Zavodundan məsələ ilə bağlı bildirdilər ki, iki həftəyə yaxındır çovdar unu ala bilmirlər və bu səbəbdən qara çörək istehsalının dayandırıblar.
Xalid Kərimli: “Ölkədə çovdar unu çatışmazlığının səbəbi təchizatla bağlıdır”
Iqtisadçı Xalid Kərimli qəzetimizə açıqlamasında bildirdi ki, Azərbaycanın əsas un təchizatçısı Rusiyadır. Taxıl ehtiyatlarımıza, həm də idxal məlumatlarına baxanda ölkədə taxılla əlaqəli ciddi problem olmadığı aydın görünür: "Ölkədə taxıl idxalı dayanmayıb, ərzaqla, taxılla bağlı hər hansı bir problem yoxdur. Qarşıdakı 12 ayda da olmayacaq. Azərbaycan taxıl ehtiyatlarının 95 faizini Rusiyadan idxal edir. Hazırda ərazilərində müharibə getməsinə baxmayaraq, əsas taxıl ölkəsi Rusiya öz müqavilə öhdəliklərini yerinə yetirir, yəni taxıl göndərir. Hazırda bizi taxılla bağlı gərgin vəziyyətə salacaq məsələ və məqam yoxdur”.
Həmsöhbətimiz hesab edir ki, ölkədə çovdar unu çatışmazlığına səbəb təchizatla bağlıdır. Ola bilsin ki, bu işlə məşğul olanlar idxalla bağlı müəyyən çətinlik yaşayır: “Bu gün Rusiyada vaqon problemi yaşanır. Səfərbərliklə bağlı həmin ölkədə vaqon sarıdan problem mövcuddur. Bu səbəbdən də çovdar ununun gətililməsində çətinlik yaşanır. Hesab edirəm ki, müvəqqəti problemdir”.
Günel CƏLİLOVA
