Noyabrın 7-də “Azəristilktəchizat” ASC-nin baş ofisində payız-qış mövsümünə hazırlıq ilərinə dair mətbuat konfransı keçirildi. Mətbuat konfransını “Azəristilktəchizat” ASC-nin İH-nin İslahatlar üzrə Müşaviri Ramil Məhərrəmov açaraq görülən işlərdən və qarşıda duran hədəflərindən, icra ərəfəsində olan fəaliyyətlərindən danışdı.
R.Məhərrəmov vurğuladı ki, “Azəristiliktəchizat” ASC-nin vəzifəsi Bakı şəhərində və Azərbaycanın bölgələrində yaşayış evlərinin və binalarının, təhsil, səhiyyə müəssisələrinin, dövlət idarətetmə qurumlarının və digər sosial təyinatlı obyektlərin keyfiyyətli istilik təchizatını təmin etməkdən ibarətdir. Onun sözlərinə görə, təmsil etdiyi qurum payız-qış mövsümünə hazırlıq işlərini uğurla davam etdirir və illik fəaliyyət planına uyğun olaraq 2022-ci il oktyabr ayının sonuna bütün hazırlıq və təmir-bərpa işlərini yekunlaşdıracaq. R.Məhərrəmov bildirdi ki, ənənəvi olaraq istiliyin verilməsi prosesi dağ rayonlarında 1 noyabr, Bakı şəhəri və digər rayonlarda isə 15 noyabrda həyata keçirilir. O qeyd etdi ki, bu il də istiliyin o şəkildə verilməsi nəzərdə tutulur. İstilik mövsümü qanunvericiliklə tənzimlənir və "Azəristiliktəchizat" ASC qanunvericliyə uyğun olaraq zamanında istilik xidmətini işə salır. Müşavir qeyd etdi ki, 2021-2022-ci il payız qış mövsümü başa çatdıqdan dərhal sonra (15 aprel 2022-ci ildən etibarən) əvvəlki mövsümün nəticələri, nöqsanlar və abonentlərin müraciətləri, yeni mövsümdə istilik sistemlərinin və infrastrukturunun plan üzrə nəzərdə tutulan təmir-bərpa və nəzarət işləridə daxil olmaqla genişmiqyaslı və kompleks illik fəaliyyət planı hazırlanır və icra edilir. Mövsümə hazırlıqla bağlı şirkətin aidiyyəti funksiyalarının rəhbər şəxslərindən ibarət xüsusi komissiya təsis olunur. Bu çərçivədə 30 sentyabr 2022-ci il tarixinədək aşağıdakı hazırlıq və təmir-bərpa işləri həyata keçirilib: istilik və isti su xidmətlərinin göstərilməsi üçün istismar edilən 563 qazanxana və 88 istilik məntəqəsinin hamısı təftiş edilib, 967 ədəd dirsək, 190 ədəd siyirtmə, 297 ədəd ventil, 3 ədəd nasos yenisi ilə əvəz edilib, 41 qazan aqreqatı, 14 ədəd nasos, 190 ədəd siyirtmə, 21 ədəd mühərrik əsaslı təmir, olunub, 732 ədəd qazan aqreqatı, 1378 ədəd nasos, 8658 ədəd siyirtmə, 674 ədəd mühərrik cari təmir edilib, 1002.2 km istilik xətləri hidravliki təzyiqə yoxlanıb və 9.44 km istilik boru xətləri əsaslı təmir olunub, 1048 ədəd qazan aqreqatı, 173 dəst istilik mübadilə qurğusu mexaniki üsulla təmizlənmiş, həmçinin 94 ədəd qazan aqreqatı və 62 istilik mübadilə qurğusu kimyəvi üsulla təmizlənib, istilik xətlərində 2978,43 m2 istilik örtük qatı təmir olunmuş, 538 ədəd qazanda yeraltı və yerüstü tüstü yolları təmizlənmiş, qazanların 710,2 m2 kərpic örtüyü, 471 m2 izolyasiya örtüyü bərpa olunub, 447 ədəd kimyəvi su yumşaltma qurğuları işə hazırlanaraq tənzimlənib. Mövsümə hazırlıq və təmir-bərpa dövründə aidiyyəti qurumların iştirakı ilə mütəmadi olaraq Tədbirlər Planının icra vəziyyəti müzakirə olunub, zəruri qərarlar qəbul edilib. Şirkətin aidiyyəti funksiyalarının rəhbər şəxslərindən təşkil edilən xüsusi komissiya hazırlıq dövrü ərzində Bakı şəhəri və Respublikanın regionları daxil olmaqla bütün qazanxana və istilik məntəqələrinə nəzarət baxışı həyata keçiriblər.
Azərbaycan Prezidentinin 29 Aprel 2022-ci il tarixli sərəncamına əsasən “Azəristiliktəchizat” ASC-nin müasirləşdirilməsi və gücləndirilməsi, fəaliyyətinin səmərəliliyin artırılması istiqamətində islahatlar proqramıda uğurla davam etdirilir. Bu çərçivədə islahatlar "Azəristiliktəchizat" ASC-nin müasirləşdirilməsi, səmərəliliyinin artırılması və gücləndirilməsi gəlir və xərclərinin optimallaşdırılması, istilik və isti su təchizatı xidmətlərinin sayğaclaşdırılması, istilik təchizatı sistemlərinin bərpası və istismarı məqsədilə zəruri və təxirəsalınmaz tədbirlərin həyata keçirilməsi istiqamətində müxtəlilf layihələri əhatə edir. İslahatlar proqramı çərçivəsində şirkətin yeni strategiyası hazırlanması, elektron sənəd dövriyyəsi və digər rəqəmsal həllərin tətbiqi, şirkətin kommersiya fəaliyyətinin genişləndirilməsi üçün yeni xidmət sahələrinin yaradılması, yeni əməliyyat idarəetmə sisteminin qurulması, İT infrastrukturunun təkmilləşdirilməsi, çevik və effektiv ictimaiyyətlə əlaqələr və kommunikasiya işinin qurulması, gənc kadrların şirkətə cəlb olunması kimi təşəbbüslər üzrə işlər başlayıb və davam etdirilir. Bu barədə də R.Məhərrəmov çıxında vurğuladı. Mətbuat konfransında sual-cavab mərhələsinə keçməmişdən əvvəl media təmsilçilərinə ASC-nin gördüyü işlərlə bağlı qısa videoçarx təqdim edildi.
Sonra isə media nümayədlərinin sualları cavablandırıldı.
Ötən il orta məktəblərdə ciddi istilik probleminin bu il də təkrar edilib-edilməyəcəyi ilə bağlı suala cavab olaraq R.Məhərrəmov bildirdi ki, ASC 250-yə yaxın orta məktəbə xidmət göstərir və xidmət sahələrinə düşən məktəblərdə də istilik baxımından heç bir problem olmur. Borcların yığılması məsələsinə də aydınlıq gətirildi. Bildirildi ki, borcların yığılması ilə bağlı problem yoxdur və 90 faizi normal şəkildə yığılır. “90 faizdən çox yığımımız olur. İstilik haqqlarını yığmaq məsələsində problemimiz olmur”-deyə ASC təmsilçiləri vurğuladı. Tariflərin artırılmasına məsələsinə gəlincə, ona R.Məhərrəmov “Tariflərin dəyişdirilməsi bizim gündəmimizdə deyil. Bu bizim səlahiyyətimizdə olmayan məsələdir və bu barədə heç bir müraciət də etməmişik. Bu aidiyyatı dövlət qurumlarının səlahiyyətindədir. Biz müracət etməmişik”-deyə aydınlıq gətirdi.
R.Məhərrəmov mənzillərə sayğac quraşdırılıb-quraşdırılmayacağı məsələsinə də münasibət bildirdi. O qeyd etdi ki, qeyri-əhali qrupuna aid məkanlarda qismən də olsa sayğacların quraşdırılması prosesi gedib, amma hələ bu, əhaliyə tətbiq edilməyəcək: “Əhali qrupunun sayğaclaşdırılması hazırda gündəmimizdə deyil, bəlkə gələcəkdə gündəmə gələ bilər”.
Mətbuat konfransında o da bildirildi ki, bu mövsüm qurumun sahəsinə aid olan ərazilərdə istilik sarıdan problem olmayacaq. Həmçinin vurğulandı ki, “Azəristilktəchizat” ASC “Azəriqaz”ın borcunun 90 faizini ödəyib.
“Deyildiyi kimi, sizin qurum istilik xətləri məsələsində yaşayış binalarına qədərki məsafəyə kimi cavabdehdir. Məsələ burasındadır ki, paytaxt sakinlərinin xeyli hissəsi mənzilində istilik xəttini kəsib. Bu gün onların çoxu istəyir ki, bu xətləri yenidən quraşdırıb mərkəzləşdirilmiş qaydada istilik alsınlar. “Azəristilktəchizat” yerli icra hakimiyyətləri ilə birgə istilik xətlərin bərpasında vətəndaşlara hansısa formada yardım edə bilərmi” sualımıza cavab olaraq R.Məhərrəmli “Çox doğru qeyd edirsiz. Biz təbii ki, bütün dövlət qurumları, eyni zamanda da müfaviq icra hakimiyyətləri ilə sıx əməkdaşlıq formatında çalışırıq. Amma qeyd edildiyi kimi, bizim balans və məsuliyyət sərhədimiz binaya qədərki infrastrukturda bitir. Amma o qoşulma əvvəllər bizim xidmət sahəmizdə olan, sonradan bizim xidmətimizdən kənarlan indi isə qoşulmaq istəyən abonentlər olarsa, müraciət edildiyi təqdirdə fərdi qaydada o müraciətlərə baxa bilərik. Amma daxili sistemlərin qurulmasını, təbii ki, ya mənzil sahibi, ya bina sakinləri özləri icra etməlidir. Biz ora hansısa bir layihələndirmə, yaxud da ki, texniki məsləhət xidmətləri verə bilərik. Amma təəssüf ki, infrastruktur işlərinin aparılması bizim büdcədə nəzərdə tutulmadığı üçün biz o işləri apara bilmərik. Çünki bu işlər kifayət qədər resurs və maliyyə tələb edən məsələlərdir. Əminəm ki, müraciət olunarsa, aidiyyəti dövlət qurumları bu məsələyə müsbət baxacaq və həll etməyə çalışacaqlar” - deyə cavab verdi.
İradə SARIYEVA
