Baki Ekspo Mərkəzində Beynəlxalq Kitab Sərgisi davam edir. “Şuşa İli”nə həsr edilən sərgidə 16 ölkədən 60-dan çox xarici təşkilat iştirak edir. Sərgidə qızıl fondun nadir kitablar kolleksiyasından ən qədim sənədlər, xəritələr, fərmanlar, tarixi əsərlər nümayiş etdirilir.
Təşkil olunan kitab sərgisində Türkiyənin Mədəniyyət və Turizm nazirliyi ilə Yunus Əmrə İnstitutunun stendi də yer alıb. Bu barədə baki-xeber.com-a Yunus Əmrə İnstitutunun Bakı təmsilçiliyindən məlumat verilib. İnstitutun Bakı nümayəndəliyinin direktoru Selçuk Karakılıc belə tədbirlərin Azərbaycanın və Türkiyənin dünyaya tanıdılması üçün böyük önəm daşıdığını deyır. Onun sözlərinə görə, sərgidə Türkiyənin məşhur yazıçıları da iştirak edir. Beynəlxalq tədbirdə oktyabrın 9-a kimi müxtəlif mövzularda yazan müəlliflərin imza günü olacaq. Yunus Əmrə İnstitutunun təşkilatçılığı ilə həyata keçirilən sərgidəki kitabları hər kəs oktyabrın 7-si saat 10:00-dan etibarən müəlliflərin imzası ilə əldə edə bilər.
Selçuk Karakılıç onu da bildirib ki, beynəlxalq tədbirdə Türkiyənin Azərbaycandakı fövqəladə və səlahiyyətli səfiri Cahid Bağçının “Yokuşun çocukları” kitabı da sərgilənir. Oktyabrın 7-də səhər saatlarından etibarən cənab səfirin iştirakı ilə imza günü təşkil olunacaq.
İnstitutun stendində təmsil olunan digər yazıçıların görüş tarixi və saatı aşağıdakı kimidir:
Tanınmış uşaq yazıçısı Birsen Özenin “Şirinlər” kitabının təqdimatı 7 oktyabr saat 14.00-16.00-da, motivasiyaedici kitablar müəllifi Ferhat Kardaşin “Yürümeye devam et” kitabının təqdimatı 8 oktyabr saat 12.00-14.00-da, motivasiyaedici yazıçı Mehmet Salih Uyanın “Ruh diyeti - dijital dünyada valideyn olmak” kitabının təqdimatı 9 oktyabr saat 12.00-14.00-da olacaq.
Baki-xeber.com
