Vahid taksi xidmətinin yaradılması ilə bağlı sənəd hazırlanıb. Bunu rəqəmsal inkişaf və nəqliyyat nazirinin müavini Cavid Qurbanov deyib. Onun sözlərinə görə, vahid taksi xidmətinin yaradılması ilə bağlı sənəd var: “Bununla cənab nazir məşğul olur. Metro, avtobus, taksi vahid olsa, daha yaxşı olar".
Bəllidir ki, bu gün taksi sektorunda yetərincə problemlər var. Belə ki, istənilən adam maşınının damına “şahmat” qoyub taksi kimi fəaliyyət göstərə bilər. Aqreqatorların fəaliyyəti tənzimlənmir, kimi istəyirlər, xidmətə qoşurlar, taksi sürücülərini 14 saat iş vaxtı ilə istismar edirlər. Həmçinin, sürücülərə dair tələblərə riayət olunmur.
Maraqlıdır, vahid taksi xidmətinin yaradılması bu sahədə yaşanan problemləri necə həll edəcək? Həmçinin, yeni xidmət yaradılarsa taksi şirkətlərinin taleyi necə olacaq, onların hamısı bir şirkətin nəzarətində olacaq? Ümumiyyətlə, vahid taksi xidmətinin mexanizmi necə olacaq?
“Vahid taksi xidməti yaradılarsa taksi şirkətlərinin qarşısında müəyyən tələblər qoyulmalıdır”
Sağlam Cəmiyyət Hərəkatının rəhbəri Elçin Bayramlı qəzetimizə açıqlamasında bildirdi ki, azad bazar mühitində vahid tarifdən söhbət gedə bilməz: “Məlumdur ki, bu gün taksi sahəsi monopoliyada olmayan azsaylı sektorlardan biridir. Qiymətlərin əhalinin büdcəsinə uyğun olması da hər kəsə bəllidir. Vahid taksi xidmətinin yaradılmasında məqsəd taksi tariflərinin artırılmasıdır. Bu isə düzgün deyil. Məlumdur ki, taksi fəaliyyəti şəhərin əsas nəqliyyat yükünü öz üzərinə götürüb. Çünki BNA-nın avtobusları, demək olar ki, yox səviyyəsindədir. Bu səbəbdən də sərnişinlər gedəcəkləri ünvana çatmaqda çətinlik çəkir. Belə olan halda bu boşluğu yalnız taksilər doldurur”.
Həmsöhbətimiz hesab edir ki, taksilərin müəyyən etdiyi qiymət heç də baha deyil. Səbəb isə taksi kimi fəaliyyət göstərən avtomobillərin az yanacaq sərf etməsidir.
Ekspert bildirdi ki, vahid taksi xidməti yaradılarsa taksi şirkətlərinin qarşısında müəyyən tələblər qoyulmalıdır: “Sürücülərin işə götürülməsi, onlarla əmək müqaviləsinin imzalanması, iş saatı 8 saatdan artıq olmamalıdır. Həmçinin, sürünün məhkumluğu olmamalı və taksini idarə edəcək şəxs minimum 3 il sürücülük təcrübəsinə malik olmalıdır. Şirkətlər bu tələblərə cavab verən şəxsi işə götürməlidir. Bundan sonra şirkətlər bazar qiymətinə uyğun rəqabət apara bilər”.
E.Bayramlının fikrincə, bu sahədə monopoliya yaradılmamalıdır. Çünki taksi fəaliyyəti ilə məşğul olan şəxslər günə azı 50 manat qazanc əldə edir. Bu normal bir rəqəmdir: “Danılmaz faktdır ki, bu gün ölkədə işsizlik var. İşsiz şəxslərin əksəriyyəti çıxış yolunu taksi kimi fəaliyyətdə görür. O da məlumdur ki, bu gün şəhərin küçələrində nəqliyyat sarıdan problemlər var. Hər gün yollarda uzun-uzadı tıxaclar yaşanır. İnsanlar çıxış yolu kimi metroya üz tutur. Nəticədə metro yüklənir. Belə bir ərəfədə taksiləri sıxışdırmaq düzgün deyil. Nəqliyyat sahəsində yaşanan problemlər həll olunana qədər taksi sahəsinə müəyyən güzəştlər tətbiq edilməlidir”.
Günel CƏLİLOVA
