Bəzi restoran və dükanlar özbaşına yol qadağan nişanları quraşdırır - Bakıda yeni tip xaos....
Mağazaların, ofis və idarələrin qarşısında, şəxsi evlərin yerləşdiyi küçələrdə avtomobil saxlamaq olmur. Ya kimsə qarşına keçib "bura mənimdir" deyir, ya da xüsusi hazırlanmış "qadağandır!" nişanı ilə qarşılaşırsan. Demək olar ki, bu problemlə bütün sürücülər üzləşir. Hüququnu bilən sürücü heç kimi dinləmədən avtomobilini saxlayır, bilməyən isə…
Onu da qeyd edək ki, bu hal iaşə obyektlərinin qarşısında daha çox yaşanır. Belə ki, eyni yolda 3 restoran varsa, birinin qarşısında avtomobillərin dayanması qadağan edilir, ikisinin qarşısında isə sərbəstlik verilir. Nəticədə isə avtomobilini saxlamağa yer tapa bilməyən müştərilər qadağa işarəsi qoyulan obyektdən uzaq qaçırlar.
Maraqlıdır, “dayanma-durma qadağandır” işarəsi niyə məhz obyektlərin qarşısında quraşdırılır? Buna necə icazə verilir?
- Elməddin Muradlı: “Qadağa varsa, bu hamıya aid olmalıdır”
Nəqliyyat eksperti Elməddin Muradlı bildirdi ki, bu nişanların qoyulmasının tamam başqa səbəbi var: "Bəzən bəzi obyektlərdən müraciətlər gəlir ki, Bakı Nəqliyyat Agentliyindən gəlib aylıq istəyirlər. Aylığı da verməyəndə gətirib dayanma və durma qadağandır nişanı quraşdırırlar. Soruşanda kimsən? Deyirlər ki, nəqliyyatdır. Hansı nəqliyyatdır? Bilmirsən Bakı Nəqliyyat Agentliyidir, bilmirsən Nəqliyyat Nazirliyidir. Nəqliyyat Nazirliyi, ümumiyyətlə, Bakı şəhərinə baxmır. Qalır BNA. O da deyir ki, mənlik deyil. Əgər qadağa varsa, bu hamıya aid olmalıdır. Yoxsa obyektin qarşısında qadağa nişanı qoyulur, sonrakı yerlərdə yoxdur. Bunun səbəbləri araşdırılmalıdır, hərəkətin təşkili ilə bağlı oyuncaq davranışlar nümayiş etdirmək olmaz. İstər yol polisi tərəfindən, istərsə də BNA tərəfindən bu məsələlər təhlil olunub araşdırılmalıdır”.
- Hüseyn Axundov: “İdarə, ofis, təşkilat, mağaza qarşısı olan küçələr dövlətə aiddir və orada…”
Hüquqşunas Hüseyn Axundov bildirdi ki, idarə, ofis, təşkilat, mağaza qarşısı olan küçələr dövlətə aiddir və orada xüsusi nişan qoyulmayıbsa, heç kimin "burada saxlama, mənimdir" deməyə haqqı yoxdur: “Düzdür, bəzən idarə və təşkilatların qarşısına qanunsuz olaraq xüsusi nişanlar qoyulur, amma bu nişanlar yola vurulmayıbsa, keçərli deyil. Yəni həmin yerdə avtomobil saxlamaq olar. Bu, mağazalara və digər obyektlərə də aiddir. Dayanma-durma qaydası yalnız işarə olan yerlərdə avtomobil saxlamaqla pozulmuş olur"
Günel CƏLİLOVA
