Məktəblərə könüllü ianə rəsmiləşir - "rüşvətə çevriləcək" qorxusu hamını düşündürür...

Kamran Əsədov: “Hər il dövlət büdcəsindən məktəblərin saxlanması üçün 4 milyard manat pul ayrılır, bu səbəbdən də…”

img

Bir müddət öncə Elm və təhsil naziri Emin Əmrullayev yeni tədris ilindən valideynlərin məktəblərə könüllü ianə verməsi layihəsinin pilot şəkildə tətbiqinin planlaşdırıldığını qeyd etmişdi.

Elm Və Təhsil Nazirliyi yanında İctimai Şuranın katibi Rüfət Əsədzadə media nümayəndələrinə açıqlamasında qeyd edib ki, valideynlərin məktəblərə könüllü ianə verməsi ilə bağlı yaradılan yeni pilot layihə "Məktəb-Ailə icma birliyi" adlanır: “Könüllü olaraq hansı məktəb istəsə, bu layihə fəaliyyətə başlaya bilər. Hazırda bu layihə 12 məktəbdə təklif olunub. Oktyabr-noyabr aylarında sözügedən məktəblərdə bu layihə fəaliyyətə başlayacaq. Burada əsas məqsəd məktəbə edilən ianələrin şəffaflığının və effektivliyinin təmin olunmasıdı”.

Maraqlıdır, məktəblərdə könüllü ianələrin qəbulu rüşvətə necə təsir edəcək?

“Hansısa fondun yaradılması rüşvətin qanuniləşdirilməsindən başqa bir şey deyil”

Təhsil üzrə ekspert Kamran Əsədov bildirdi ki, məktəblərdə könüllü ianələrin toplanılmasına ehtiyac yoxdur. Çünki dövlət məktəblərin təmirindən tutmuş, A4 vərəqlərinin alınmasına qədər hər bir xərci qarşılayır: “Azərbaycanda təhsil dövlət hesabına aparılır. Hər il dövlət büdcəsindən məktəblərin saxlanması üçün 4 milyard manat pul ayrılır. Bu məbləğ məktəblərin təmirinə də sərf olunur. Bundan başqa, məktəblərdə müəyyən layihələrin həyata keçirilməsinə də qrant ayrılır. 6 aydan bir ayrılan bu məbləğ iki milyon manat vəsaitdir”.

Ekspert onu da əlavə etdi ki, məktəblərdə könüllü ianələrin toplanılması dünya təcrübəsində də var.

Onun sözlərinə görə, xarici ölkələrdə valideynlər məktəbə kompyuter hədiyyə edirlər. Amma Azərbaycanda belə könüllü fondun yaradılması sui-istifadəyə yol açacaq: "Məktəb direktorları şərt qoyacaq ki, bu fond məcburi doldurulmalıdır. Bu gün sosial şəbəkələrdə məktəb direktorlarının rüşvət istəməsini əks etdirən səs yazılarına rast gəlirik. Azərbaycanda orta təhsil pulsuzdursa, bu fondların yaradılmasına ehtiyac yoxdur. Ümumiyyətlə, məktəblər ixtiralardan, qrant layihələrdən pul qazana bilər. Hansısa fondun yaradılması rüşvətin qanuniləşdirilməsindən başqa bir şey deyil”.

Günel CƏLİLOVA

Peşə etikası

Son xəbərlər