Son günlər dəyişkən havalarla əlaqədar olaraq soyuqdəymə halları artıb. Bunun qarşısını almaq üçün istifadə olunan dərman preparatları ilə yanaşı yoda olan tələbat da artıb. Lakin Bakıda yaşayan bəzi sakinlər apteklərdə yod tapmadıqlarından şikayətlənirlər.
Vətəndaşlar qeyd edir ki, artıq bir aya yaxın müddətdir apteklərdə yod yoxdur. Nə vaxt gətiriləcəyi ilə bağlı da heç bir məlumat verilmir. Apteklərdə çalışanlarda etiraf edir ki, son zamanlar əczaxanaya yol məhdud sayda gətirilir. Bu üzdən alıcılar yol əldə etməkdə çətinlik çəkir.
Ekspertlər hesab edir ki, yodun apteklərdə tapılmaması yaxın vaxtlarda həmin məhsulun satış qiymətinin artmasına səbəb olacaq. Çünki dəfələrlə aptekdə hansısa dərman preparatı satışdan müvəqqəti olaraq çıxarılıb, müəyyən müddət sonra həmin dərman yeni qiymətlə satılıb. Ehtimal edilir ki, yodda da eyni vəziyyət olacaq.
Pərvanə Mustafayeva: “Apteklərdə dərman çatışmazlığına dərmanları ölkəyə idxal edən şirkətlər cavabdehdir”
Həkim ekspert Pərvanə Mustafayeva bildirdi ki, bu gün virus, immun sisteminin zəifləməsi və bununla əlaqədar müxtəlif xəstəliklərin çoxalması ilə dünyada, o cümlədən ölkəmizdə xəstəliklərin aktuallaşmaşı nəticəsində dərman sənayesi qazanıb. Dərman bazarında isə istədikləri qiyməti diqtə edirlər. Digər tərəfdən, ölkəmizdə müharibədən əvvəl hökumətin dərman zavodunun açılması ilə bağlı qərarı var idi. Bu gün dünyada dərman sənayesi silah satışından sonra ikinci yerdə gəlir: “Dərman idxalında monopoliya olmamalıdır. Çünki o dərmanları almağa pul lazımdır. İmmun sistemi də zəifdir, ərzağın da çoxu xaricdən idxal edilir və əksəriyyət də keyfiyyətsizdir. Nəticədə insanlar həkimlərə müraciət edirlər. Əhalinin vəziyyətini nəzərə almaq lazımdır”.
Həmsöhbətimiz onu da əlavə etdi ki, apteklərdə dərman çatışmazlığına dərmanları ölkəyə idxal edən şirkətlər cavabdehdir: “Onlar bu işin məsuliyyətini öz üzərlərinə götürüblər və bu məsələ ilə özləri məşğuldurlar. İndiki dövrdə bir tərəfdən dərman maddələrinin keyfiyyət parametrlərinin aşağı olması, digər tərəfdən isə qıtlıq əhali arasında çox ciddi problem yaradıb”.
Dərman vasitələrinin analitik ekspertiza mərkəzi: “Yodun idxalında son zamanlar müəyyən problemlər olub”
Səhiyyə Nazirliyinin dərman vasitələrinin analitik ekspertiza mərkəzindən məsələ ilə bağlı bildirildi ki, yodun idxalında son zamanlar müəyyən problemlər olub: “Yaxın vaxtlarda problem həll olunacaq”.
Günel CƏLİLOVA
