Son dövrlər müavinət və pensiyaların kəsilməsi ilə bağlı şikayətlərin sayı artıb. Bu şikayətlər əsasən ayrı-ayrı vaxtlarda əlilliyə görə pensiya almış və sonradan pensiyaları ləğv edilmiş şəxslərdən gəlir.
Astara rayonundan redaksiyamıza müraciət edən II qrup hərbi əlil Babazadə Yusif Aslan oğlu da pensiyasının kəsilməsindən şikayət edir. Y.Babazadənin dediyinə görə, 2015-ci ildən 2019-cu ilin fevral ayına qədər pensiya alsa da, həmin ilin fevralından sonra əlillik pensiyası kəsilib.
Şikayətçi Yusif Babazadə: “Hərbi xidmətdə kiçik ölçülü botinka geyindiyim üçün ayaq barmaqlarım kəsildi, sonra isə…”
Şikayətçi qeyd edir ki, Naxçıvanda hərbi xidmətdə olub və əsgərlikdə olduğu vaxt ayağının baş barmağında problem yaranıb, nəticədə isə barmağı amputasiya olunub: “Sonra mənə bildirdilər ki, hərbi xidmətə yararsızam. Məni tərxis etdilər. 2017-ci ildə mənə ikinci qrup hərbi əlil kimi təqaüd təyin etdilər. 2019-cu il fevral ayına kimi pensiya aldım, sonra əlilik dərəcəmi ləğv etdilər. Pensiyanın bərpası üçün qeydiyyat üzrə Əmək və Əhalinin Sosial Müdafiəsi Nazirliyinin Astara şöbəsinə müraciət etsəm də, məsələ həllini tapmayıb. 2020-ci ildən heç bir cavab yoxdur. Ailəliyəm, şiddətli ağrılarım var. Yeriməkdə çətinlik çəkirəm, barmaqlarım bükülmüş vəziyyətdədir”.
Y.Babazadə onu da qeyd edir ki, əlilliyini təsdiqləyən bütün sənədlərin olmasına baxmayaraq, səbəb göstərilmədən pensiyası kəsilib.
Elxan Əliyev: “Ordu üçün yararsız olan şəxsin pensiyasının kəsilməsi düzgün deyil”
Sosial sahə üzrə ekspert Elxan Əliyev qeyd etdi ki, vətəndaşın narazılığı varsa, məhkəməyə müraciət edə bilər: “Yusif Babazadə adlı şəxs məhkəməyə müraciət edib, haqsız yerə pensiyasının kəsildiyini faktla göstərə bilər. Ümumiyyətlə, bütün mübahisəli məsələlər hüquqi müstəvidə həll olunmalıdır. Şəxs Tibbi-Sosial Ekspert Komissiyasına qarşı iddia ərizəsilə məhkəməyə müraciət etməlidir. Əlilliyin təyinatı zamanı təqdim olunmuş sənədləri də əlavə etməlidir. Ordu üçün yararsız olan şəxsin pensiyasının kəsilməsi düzgün deyil”.
Y.Babazadənin şikayəti ilə bağlı Tibbi-Sosial Ekspert Komissiyasının (TSEK) Astara şöbəsi ilə əlaqə saxlamağa çalışdıq. Lakin qurumdan zəngimizə cavab verən olmadı.
Günel CƏLİLOVA
