Qumar qadağandır, ancaq virtual qumar çiçəklənir...

img

Son zamanlar sosial şəbəkələrdə kazino tipli mərc oyunlarının reklamları genişlənib. Bura insanları bonus vədləri ilə cəlb edir, hətta məşhurların da adından istifadə edirlər.

Məlumat üçün bildirək ki, ölkəmizdə 1995-ci ildən etibarən qurmarxana tipli oyun zallarının fəaliyyəti qanunla qadağan edilib. Amma qumar oyunlarının bu gün virtual məkanda mövcudluğu da heç kimə sirr deyil.

Maraqlıdır, onlayn qumar oyunları ilə bağlı qanunvericilikdə cəza nəzərdə tutulurmu?

  • Aynur Əliyeva: “Onlayn kazino fəaliyyətilə bağlı qanunvericilikdə normalar olmadığına görə…”

Vəkil Aynur Əliyeva bildirdi ki, onlayn kazino fəaliyyətilə bağlı qanunvericilikdə normalar olmadığına görə belə bir normaların pozulması da Cinayət Məcəlləsində nəzərdə tutulmayıb. “Cinayət qanunvericiliyinə görə, məhz həmin Məcəllədə göstərilən ictimai təhlükəli əməl cinayət məsuliyyətinə səbəb olur. Odur ki, ümumi qanunvericilik sisteminə kazino oyunları ilə bağlı cinayət pozuntusu ictimai təhlükəli əməl kimi daxil edilməlidir ki, belə hallara yol verildiyi təqdirdə onların cinayət məsuliyyətinə cəlb edilməsi mümkün olsun”.

Həmsöhbətimiz hesab edir ki, bu tip reklamlarda aldadıcı elementlər varsa, buna müvafiq dövlət orqanları müdaxilə etməlidir: “Hər şeydən öncə bu sahədə qanunvericilik bazası hökmən yaradılmalı və bütün fəaliyyətlərin qanunauyğun tənzimlənməsi nəzərdə tutulmalıdır. Elə oyunların qarşısını almaq üçün qabaqlayıcı tədbir kimi həmin saytları bloklamaq olar. Eyni zamanda, onların fəaliyyətini leqallaşdırmaq da olar. Virtual qumar saytlarını ya qanuni şəkildə leqallaşdırmaq, ya da qadağan etmək lazımdır”.

  • Fərid Həsənov: “Onlayn qumar oyunlarını texniki olaraq bloklamaq mümkündür”

İKT sahəsi üzrə ekspert Fərid Həsənov bildirdi ki, onlayn qumar oyunlarını texniki olaraq bloklamaq mümkündür: "Ölkədə müəyyən provayderlər bloklanmanı internetdə tətbiq etdikdə bu cür qanunsuz işlərlə fəaliyyət göstərən saytların girişinə məhdudiyyət yaranır. Bununla da məsələni kökündən həll etmək mümkündür. Ancaq həmin oyunların leqal fəaliyyətini təmin etmək bir qədər çətindir. Leqal fəaliyyətə salmaq üçün provayderin interneti satdığı şəxsin yaş məhdudiyyəti nəzərə alınmalıdır. Ancaq bir məsələ var ki, belə oyunları çox zaman uşaqlar evdə də oynaya bilər. Burada isə valideynlər məsuliyyətli olmalıdırlar. Əgər evdə azyaşlı uşaq varsa, evə qoşulan internet paketində həmin qadağan olunmuş sayt olmamalıdır".

Günel CƏLİLOVA

Peşə etikası

Son xəbərlər