Yeni tədris ilinin başlaması paytaxtın nəqliyyat infrastrukturundakı problemləri bir daha qabartdı. Əhali tıxacdan yenə əziyyət çəkir. Aparılan müşahidələr göstərir ki, pik saatlarında paytaxtakı 80-100 marşrut üzrə avtobuslar bir qayda olaraq qrafikdən geri qalır. Paytaxtın əksər küçə və prospektləri axşam saatlarından başlayaraq, saat 10-11 radələrinə qədər tıxacdan keçilməz olur.
Paytaxtdakı tıxac məsələsi zaman-zaman gündəmə gəlsə də, çox təəssüf ki, problemin həlli istiqamətində heç bir addım atılmayıb. Əksinə, tıxacların miqyası ilbəil artır.
Paytaxt küçələrində yaşanan nəqliyyat sıxlığının bir səbəbi də Bakı Nəqliyyat Agentliyinin (BNA) tabeliyindəki şirkətlərə, eləcə də “BakuBus” MMC-yə məxsus marşrut avtobuslarının sayının kəskin azalmasıdır. Bu azalma özünü daha çox Bakıətrafı kəndlərə və əks istiqamətdəki xətlərdə büruzə verir.
Bəs problemin əsas səbəbi nədir? Marşrut avtobuslarının sayı niyə azaldılıb?
“Avtobusların sayının azaldılması əhalinin saatlarla yollarda qalmasına və haqlı narazılığa səbəb olur”
Nəqliyyat eksperti Eldəniz Cəfərov bildirdi ki, tıxacları yaradan bir çox amil var. Lakin ilk sırada ictimai nəqliyyatın düzgün qurulmaması amili durur: “Paytaxtda ictimai nəqliyyatın fəaliyyəti o qədər də ürəkaçan deyil. Bilirsiniz ki, paytaxtda ictimai nəqliyyat yalnız metro və avtobuslardan ibarətdir. Avtobuslar arasında olan intervallar çox böyükdür. Vətəndaşlar saatlarla dayanacaqda avtobus gözləməli olur. "Bakı kart"a pul yükləməyin çətinləşməsi də ictimai nəqliyyatı bir növ insanların gözündən salır. Biz əslində ictimai nəqliyyatı populyarlaşdırmalıyıq, amma bunun əksini edirik. İnsanlar rahat hərəkəti təmin etmək üçün ucuz avtomobil almağa, yaxud da ucuz taksilərə üz tutur. Nəticədə də paytaxtda artan fərdi avtomobillər tıxac yaradır. Həm də sürücülərimizin parklanma problemi var. Qazanc əldə etmək məqsədilə ödənişsiz saxlama yerləri də sürücülərdən gizli saxlanır. Maşını saxlamaq üçün saatlarla yer axtaran sürücülər də tıxac yaradır".
Ekspert onu da əlavə etdi ki, Bakı Nəqliyyat Agentliyinin rəhbərliyi yaranmış problemlə bağlı açıqlama verməlidir: “Bilərəkdən avtobusları xəttə buraxmayan şirkətlər barədə ölçü götürülməlidir. Avtobusların sayının azaldılması əhalinin saatlarla yollarda qalmasına və haqlı narazılığa səbəb olur. Üstəgəl, ölkə iqtisadiyyatına böyük zərbə vurulur”.
Günel CƏLİLOVA
