Hər il, bir qayda olaraq, sentyabrın 15-nə qədər şagirdlərə dərsliklər paylanırdı. Bu il, əvvəlki tədris illərindən fərqli olaraq, dərsliklərin nəinki şagirdlərə, məktəblərə çatdırılmasında ləngimələr var. Əksər məktəblərdə hələ də dərslik problemi yaşanır. Bununla bağlı son günlər çoxsaylı şikayətlər səslənir. Valideynlər qeyd edir ki, şagirdlərin hamısı tam dərsliklə təmin edilmədiyindən dərs oxuya bilmirlər.
Mütəxəssislər bildirir ki, hazırda məktəblərdə yaranın dərslik probleminin səbəbkarı məktəb direktorlarıdır. Çünki hər il may ayından etibarən növbəti tədris ili üçün məktəblərdə şagirdlərin sayına uyğun dərsliklərin təminatı ilə bağlı proqnozlaşdırma aparılır və bu barədə Elm və Təhsil Nazirliyinə məlumat verilir. Nazirlik isə toplanmış məlumatlar əsasında 200 addan çox kitabı yüz minlərlə tirajla çap etdirir. Avqustun sonuna qədər verilmiş proqnoza uyğun olaraq dərsliklər məktəblərə çatdırılır. Belə aydın olur ki, direktor proqnozlaşdırmanı düzgün aparmayıb, ya da topladığı məlumatları yuxarı instansiyaya vaxtında təqdim etməyib.
Məktəblərin tam şəkildə dərsliklə təmin olunub-olunmadığını öyrənmək üçün təhsil müəssisələri ilə əlaqə saxladıq.
17 saylı orta məktəb: “Bu işə baxan kitabxanaçı öz işinə məsuliyyətlə yanaşdığı üçün bizim məktəbdə dərslik problemi yaşanmadı”
Əhmədli qəsəbəsində olan 17 saylı orta məktəbdən “Bakı-Xəbər”ə bildirildi ki, şagirdlər tam olaraq dərsliklə təmin olunub: “Məktəbə yeni yazılan şagirdlər belə dərs başlamamış dərsliklərini əldə etdi. Bu işə baxan kitabxanaçı öz işinə məsuliyyətlə yanaşdığı üçün bizim məktəbdə dərslik problemi yaşanmadı”.
280 saylı orta məktəb: “Şagirdlər tam olaraq dərsliklə təmin edilib”
Hövsan qəsəbəsi 280 saylı orta məktəbin nümayəndəsi də bizimlə söhbətində bildirdi ki, şagirdlər tam olaraq dərsliklə təmin edilib.
26 saylı orta məktəb – Yaqut Məmmədova: “Dərs başlayan gündən bəri bir valideyn belə bizə kitabla bağlı müraciət etməyib”
Buzovna qəsəbəsi 26 saylı orta məktəbin direktoru Yaqut Məmmədova qəzetimizə açıqlamasında bildirdi ki, dərs başlayan gündən bəri bir valideyn belə onlara kitabla bağlı müraciət etməyib: “Belə bir problem olarsa biz dərhal onu həll edərik. Hətta digər məktəblərdən bizə kitabla bağlı müraciət olunub, biz onların istəyini belə təmin etmişik”.
Elşən Qafarov: “Hazırda məktəblərdə yaranın dərslik probleminin səbəbkarı məktəb direktorudur”
Təhsil eksperti Elşən Qafarov bildirdi ki, hər il may ayından etibarən növbəti tədris ili üçün məktəblərdə şagirdlərin sayına uyğun dərsliklərin təminatı ilə bağlı proqnozlaşdırma aparılır və bu barədə Elm və Təhsil Nazirliyinə məlumat verilir: “Nazirlik hər il toplanmış məlumatlar əsasında 200 addan çox kitabı yüz minlərlə tirajla çap etdirir. Avqustun sonuna qədər verilmiş proqnoza uyğun olaraq dərsliklər məktəblərə təhvil verilir. Buna görə burada problem olmamalıdır. Hazırda məktəblərdə yaranın dərslik probleminin səbəbkarı məktəb direktorudur. Deməli, direktor proqnozlaşdırmanı düzgün aparmayıb, ya da topladığı məlumatları yuxarı instansiyaya vaxtında təqdim etməyib. Bu səbəbdən yerdəyişmə, yaxud yeni şagirdlərin qəbulu nəticəsində ayrı-ayrı siniflər üzrə dərsliyə ehtiyacı ödəyə bilmirlər. Bu problemin yaşandığı məktəbin direktoru vaxtında aidiyyəti qurumlara müraciət etməli, problemi qısa müddətdə aradan qaldırmalıdır”.
Həmsöhbətimiz onu da əlavə etdi ki, dərs vəsaitinin istifadə müddəti 5 ildir. Həmçinin, dərsliyin itməsi ilə bağlı problem yarana bilər: “Çox güman ki, direktorlar buna nəzarət edə bilmir. Ümumtəhsil məktəblərinin Əsasnaməsinə uyğun olaraq, kitab itirildikdə valideyn iclası çağırılır, dərsliyini itirmiş şagirdin valideyninə bu barədə məlumat verilir. Bu halda valideyn itirilmiş kitabın 10 misli məbləğində məktəbə ödəniş etməlidir. Bunun üçün bütün dərsliklərin vaxtında və düzgün uçotu aparılmalıdır”.
Günel CƏLİLOVA
