Ölkə qanunlarına görə, turistlər otel və istirahət mərkəzlərinə yerləşən zaman nikah kağızı təqdim etməyə borclu deyil. Bunu vətəndaşdan tələb edən normativ sənəd də yoxdur. Ancaq nədənsə, hələ də Azərbaycan otellərinə, istirahət mərkəzlərinə nikah şəhadətnaməsi olmayan cütlüklər buraxılmır.
Bu günlərdə Şamaxı rayonuna istirahətə gedən ailədən Sakit Göl istirahət mərkəzində nikah kağızı və müəyyən məbləğdə pul tələb olunub. Maraqlısı da odur ki, kişilər yalnız yanında xanım olduğu halda içəri daxil ola bilər. Yanında xanım yoxdursa, nəinki gölə baxa, heç həmin ərazidəki restoranda əyləşə bilməzsən.
Qeyd edək ki, qanunvericiliyə əsasən, müştəridən şəxsiyyətini təsdiq edən sənəddən başqa sənəd tələb etmək qanunauyğun deyil. Gölə baxmaq və ya hoteldə qalmaq üçün müştəridən nigah şəhadətnaməsi tələb etmək düzgün deyil.
Elçin Rüstəm: “Qanunvericilikdə istirahət mərkəzləri, otellərə daxil olan zaman nikah şəhadətnaməsinin tələb edilməsi qeyd edilməyib”
Turizm eksperti Elçin Rüstəmov bildirdi ki, dünya təcrübəsində Azərbaycan kimi dünyəvi dövlətlərin heç birində hər hansı obyektdə gecələmək üçün nikah şəhadətnaməsi tələb olunmur. Bu, heç bir praktikada yoxdur: “Yəqin ki, bu qayda Sakit Gölün rəhbərliyi tərəfindən tədbiq olunur. Adi gölə baxılması üçün 20 manat istənilməsi, təbii ki, baha və absurd bir qiymətdir. Azərbaycanda buna nəzarət edən qurum olmadığı, insanlar da yeni yerlər axtardığı üçün bununla razılaşmağa məcburuq”.
Ekspert onu da əlavə etdi ki, qanunvericilikdə istirahət mərkəzləri, otellərə daxil olan zaman nikah şəhadətnaməsinin tələb edilməsi qeyd edilməyib. Sadəcə, otel rəhbərləri insan alverinə qarşı mübarizə üçün bu addımı atırlar ki, insanlarda məsuliyyət artsın: “Aydın məsələdir ki, rəsmi nikah yoxdursa, cütlüklər hansı məqsədlə oteldə bir nömrədə qalır. Amma qanunvericilikdə belə bir qadağa yoxdur. Ümumiyyətlə, nikah sənədinin tələb olunması əxlaqsızlığa qarşı mübarizədə çıxış yolu deyil. Əslində bu, insanların əxlaqsızlığa görə daha çox pul xərcləməsinə şərait yaradacaq. Qadağalar sui-istifadə hallarının çoxalmasına səbəb olur. Tutaq ki, 22 yaşlı bir gənc öz yaşıdı olan bir xanımla istirahətə getmək istəyir. Onlar bir-birini sevir. Müəyyən müddətdən sonra evlənməyi planlayıblar. Onlara görüşməyi necə qadağan etmək olar? Belə yanaşılsa, onda istənilən intim münasibət qadağan olunmalıdır”.
Eyyub Hüseynov: “Vətəndaşlardan yüksək miqdarda pul, nikah kağızı tələb olunması qanunsuz və istehlakçı hüquqlarının pozulmasıdır”
Azad İstehlakçılar Birliyinin (AİB) sədri Eyyub Hüseynov qeyd etdi ki, vətəndaşlardan yüksək miqdarda pul, nikah kağızı tələb olunması qeyri-qanuni və istehlakçı hüquqlarının pozulmasıdır: “Baxmayaraq, cənab Prezidentin icra hakimiyyətləri haqqında təsdiq etdiyi əsasnamənin 4-5-ci bəndində qeyd edilib ki, icra hakimiyyətlərinin bu kimi məsələlərlə məşğul olmaq və istehlakçı hüquqlarını qorumaq səlahiyyətləti var. Həmin əsasnamənin 4.5.2.5-ci maddəsində deyilir ki, icra hakimiyyətlərinin istehlakçının hüquqlarını müdafiəsi məqsədilə məhkəmədə iddia qaldırmaq hüququ var. Ancaq görək, Şamaxı Rayon İcra Hakimiyyəti bu sahədə bir iş görübmü?! Məlumdur ki, Prezident Administrasiyası bütün bu işlərə nəzarət edir, icra hakimiyyətlərindən il ərzində istehlakçı hüquqlarını qorumaq üçün hansı işləri görmələri ilə bağlı hansı birindən hesabat alınıb? Hələ mən bir dəfə də belə hesabata rast gəlməmişəm. Bu cür neqativ hal Şamaxı Rayon İcra Hakimiyyətində də mövcuddur. Mütləq Şamaxı RİH bu məsələlərə son qoymalı, xüsusən də həddindən artıq şişirdilmiş qiymətlər, heyvanxanaya baxış və Sakit Göl probleminə son qoyulmalıdır. Bütün bu işlər Azərbaycanda turizmin inkişafına endirilən zərbədir”.
Günel CƏLİLOVA
