Məlumdur ki, Rusiya ilə Ukrayna arasında yaşanan gərginlik qonşu ölkələrə də təsir edib. Artıq uzun müddətdir ki, Ukraynadan ölkəmizə hər hansı bir məhsul idxal edilmir. Buna baxmayaraq, Bakı dükanlarının rəflərini Ukrayna şirniyyatları bəzəyir.
Qeyd edək ki, məlum müharibəyə qədər ölkəmizə adıçəkilən ölkənin konfet və şokoladları idxal olunurdu. Müharibə başlayandan sonra Ukrayna ixracı dayandırdı. Ancaq hələ də Azərbaycandakı ticarət obyektlərində Ukraynanın məşhur brendlərin məhsulları satılır.
Ekspertlər hesab edir ki, ölkədəki ticarət obyektlərində satılan məhsullar saxta məhsullardır. Onlar daxildə kustar üsulla hazırlanır və məşhur şirkətlərin bəzəkli kağızı ilə satışa çıxarılır.
“Ölkə əhalisinin xarici markaya marağını bilən bəzi işbazlar bu vəziyyətdən istifadə edib, sexlərdə kustar yolla konfet, şokolad hazırlayır”
Sosial sahə sahə üzrə ekspert Elxan Əliyev qeyd etdi ki, ölkədə istehlakçı hüquqlarının qorunması bərbad vəziyyətdədir. Azərbaycan istehlakçılarının çox səhv düşüncəsi var ki, onlar xarici məhsullara üstünlük verir: “Xüsusilə Belarus, Ukrayna, Rusiya və digər ölkələrinə aid olan məhsulları böyük həvəslə alırlar. İstehlakçılar həmin məhsulları alarkən Ukraynada müharibə getdiyini, odun-alovun içində olduğunu nəzərə alıb, qonşu ölkələrə mal göndərə bilməyəcəyini düşünməlidir. Ölkə əhalisinin xarici markaya marağını bilən bəzi işbazlar bu vəziyyətdən istifadə edib, sexlərdə kustar yolla konfet, şokolad hazırlayır. Hazırlanan həmin məhsullar məşhur brend adı altında satışa çıxarılır. Ümumiyyətlə, rus brendləri altında təkcə konfet-şokolad istehsal olunmur. Kolbasa sexlərində “Moskovski”, “Doktorskaya” və digər məşhur brendlər istehsal olunur”.
Ekspert hesab edir ki, insan sağlamlığına ziyan olan, mənşəyi məlum olmayan, saxta ad altında hazırlanan bu qidaların satışını həyata keçirən obyektlərin hamısı bağlanmalıdır: “İstehlakçı məhsulu alan zaman birinci onun etiketinə baxmalı, onun içindəki yazıları oxumalı, məhsulun buraxılış tarixi və saxlanma müddətinə fikir verməlidir. Hətta məhsulun üzərində telefon nömrəsi varsa, zəng edib dəqiqləşdirmə apara bilər, çünki qoyulan nömrə anonim də ola bilər.
Günel CƏLİLOVA
