AZAL-ın tətbiq etdiyi qiymət siyasəti hər zaman ciddi narazılıqlar doğurub. Bu günlərdə Azərbaycan Hava Yolları QSC Rusiyadan Azərbaycana reyslərə tələbatın artması, habelə aviabiletlərin dəyərinə dair yaranan suallarla əlaqədar Moskva-Bakı marşrutu üzrə təklif olunan aviabiletlərin maksimal dəyərini açıqlayıb.
Aviaşirkətdən bildirilib ki, biletlərin maksimal qiyməti ekonom sinif üzrə 409 avro, biznes sinfi üzrə 769 avro, “VIP Club” tarifi üzrə isə 869 avrodur.
“Aviabiletlərin qiymətləri birbaşa reysə olan tələbatdan, təyyarədə qalan yerlərdən, alış tarixindən, uçuş mövsümdən və bir sıra digər kriteriyalardan asılıdır”, - deyə AZAL-dan bildirilib. AZAL-ın açıqlamasının ardınca mətbuatda Rusiyada yaşayan soydaşlarımızın qiymətlərdən narazılığı yaranıb. Moskvada yasayan soydaşlarımızın mətbuata verdiyi məlumata görə, AZAL əməkdaşları müştərilərini aldadıb 700 avroluq biletləri 6000 avroya satır.
Qeyd edilir ki, AZAL Rusiyadakı vəziyyətdən istifadə edib müştəriləri aldadır. Şikayətçilərdən birinin iddiasına görə, AZAL-ın rəsmi saytında Moskva-Bakı reysinin qiyməti 700 avro olaraq göstərilir. AZAL-ın əməkdaşları isə bileti 6000 avroya satırlar.
İddialarla bağlı AZAL-ın mövqeyini öyrənə bilmədik. Nə zaman açıqlama vermək istəsələr fikirlərini işıqlandıra bilərik.
“Onların əlində kifayət qədər ciddi sübutlar olmalıdır ki, həqiqətən də ona 700 avroluq bilet 6 minə təklif edilib”
Sosial-iqtisadi sahə üzrə ekspert İlqar Hüseynli “Bakı-Xəbər”ə bildirdi ki, AZAL-ın fəaliyyəti ilə bağlı ölkədə çox ciddi narazılıqlar var. “AZAL, demək olar ki, tam monopolist bir siyasət həyata keçirir. Ümumiyyətlə, dünya aviasiya bazarında mövcud olan qiymətlərlə müqayisədə, demək olar ki, AZAL dünyanın ən baha qiymətə bilet satan aviaşirkətləri sırasında gedir. Onu xeyli reyslərlə də müqayisə etmək olar. Nəinki Moskva-Bakı reysində, eləcə də daxili reyslərin özündə qiymət bahadır. Bilirsiz ki, Naxçıvana olan biletin qiymətini də 10 manat artırdı. Bu da haqlı olaraq narazılığa gətirib çıxardı. Amma AZAL-ın şirkət olaraq qiymətlərini Tarif Şurası tənzimləmir, bu qiymətlər bazara görə dəyişir. Ümumiyyətlə aviabiletlərin qiymətində həmişə oynamalar olur. Tutaq ki, iki ay bundan sonraya bilet sifariş verəndə daha ucuz olur, nəinki uçuş günlərinə yaxın vaxtlarda. Amma bu qədər fərqlə olmur. Hardasa aşağı-yuxarı 50-60 dollar civarında fərq yaranır. Əgər AZAL Moskva-Bakı reysinin qiymətini 700 avro göstəribsə, bu özü də olduqca baha qiymətdir. Əgər iddia olunduğu kimi, AZAL qiyməti 700 avro göstərib sonradan onu müştəriyə 6000 avroya təklif edibsə, sözsüz ki, bu artıq məhkəmə çəkiməsi ilə öz həllini tapmalıdır. Həmin şəxs, yaxud şəxslər qiymətlərlə bağlı məhkəməyə müraciət etməlidir. Amma onların əlində kifayət qədər ciddi sübutlar olmalıdır ki, həqiqətən də ona 700 avroluq bilet 6 minə təklif edilib. Bu prosesdə qara bazar da, bilet alverçiləri də rol oynaya bilər. Yəni qeyri-rəsmi yollarla bunu qara bazara yönəldə və bilet alverçilərinin əli ilə sata bilərlər”.
İ.Hüseynli vurğuladı ki, həqiqətən də belə bir hal baş veribsə, bu, istehlakçının aldadılmasıdır. O hesab edir ki, reyslərin sayı artırılmalı və qiymətlər aşağı salınmalıdır. Onun sözlərinə görə, bu gün Rusiya genişmiqyaslı müharibəyə başladığı, insanları səfərbərliyə cəlb etdiyi halda biz öz vətəndaşlarımızın oradan çıxalmasında maraqlı olmalıyıq, AZAL da bu prosesin bilavasitə iştirakçısına çevrilməlidir, nəinki insanların bu çətin durumundan istifadə edib onların maddi vəziyyətini bir qədər də pisləşdirmək və özlərinin varlanmasını təmin etmək yolunu tutmalıdır: “Bu baxımdan, narazılıqlar varsa bunun sübutu olmalıdır. Bu sübutlar əsasında istənilən istehlakçı məhkəməyə müraciət edib öz hüquqlarını qoruya bilər”.
Leyla QARAXANLI
