Krımın Sevastopol şəhərində Azərbaycanın səsinə, haqq işinin carçısına və müdafiəçisinə çevrilən “Qobustan” proqramı ixtisasca müəllim olan Həbib Əliyevin (Əlioğlu) təşəbbüsü ilə 1997-ci ilin mart ayında Sevastopol Dövlət Teleradiosunda açılıb.
Ukrayna və Azərbaycan arasında etibarlı körpü rolunu oynayan “Qobustan” proqramında Azərbaycanın gerçək səsi eşidilib. Proqramın rəhbəri, müəllifi H.Əliyev deyir ki, o ağır illərdə ulu öndər Heydər Əliyevin xarici siyasət kursunu əsas götürərək Azərbaycan xalqının tarixini, milli-mənəvi, mədəni dəyərlərini, milli musiqisini həm rus, həm də Azərbaycan dilində yerli dinləyicilərə çatdırıblar. “Qobustan” proqramı barədə Azərbaycan mediasında çoxsaylı yazılar dərc edilib. H.Əliyev “Qobustan” radiosu mətbuat aynasında” (Krım-Azərbaycan dostluq körpüsü) adlı kitab nəşr etdirib. İndiyə qədər kitabın bir neçə cildi çıxıb, bizim əlimizdəki nəşr isə IV kitabdır. Kitabda 1997-ci ildən 2015-ci ilə qədər Azərbaycan mətbuatında H.Əliyevin “Qobustan” proqramı barədə gedən yazılar toplanıb.
Kitaba ön sözü “Bakı-Xəbər” qəzetinin baş redaktoru, Mətbuat Şurasının İdarə Heyətinin üzvü Aydın Quliyev yazıb. “Krım radiosunda “Qobustan” proqramı haqqında düşüncələr...” sərlöhvəli ön sözdə A.Quliyev “Azərbaycanın səsinin dünyanın hər yerinə yayılması, bu səsi qeyri-azərbaycanlıların duyması vacib bir məsələdir”- deyə qeyd edir. Krımın türk dünyası üçün əhəmiyyət kəsb etdiyi məlumdur və biz bilirik ki, bu qədim türk yurdunun hər daşında, hər qayasında ulu türkün səsi, izi yaşayır. Əlbəttə, bu baxımdan Krım bizə yad deyil, doğmadır, munisdir, əzizdir. “Qobustan Krım efirində” kitabı da yazılıb. Həbib müəllim “Qobustan” proqramı ilə çox böyük iş görüb, zehinlərdən erməni təbliğatını silib, onun yerinə gerçək Azərbaycan həqiqəti həkk edib. H.Əliyev müəllim olduğu üçün hər zaman maarifçiliyin gücünə güvənib, Krımda Azərbaycan ədəbiyyatına, muğamına, saz musiqisinə, milli mədəniyyətinə, mədəniyyət xadimlərinə böyük sevgi oyadıb. Çünki dayanmadan, gecə-gündüz təbliğ edib, sevdirib, duydurub. Krımlılar Azərbaycan mədəniyyəti ilə H.Əliyevin müəllifi, redaktoru olduğu əfsanəvi “Qobustan” proqramı vasitəsilə də tanış olublar.
Bu il “Qobustan” proqramının 25 yaşı tamam olur. Amma təəssüflər olsun ki, bu gün müharibə səbəbindən Həbib müəllim Krıma gedə bilmir. Amma ərsəyə gətirdiyi 25 yaşlı “Qobustan” proqramı ilə öz sözünü lazımı səviyyədə deyə bilib. Həbib müəllim zəhmətkeş, alicənab, vətənpərvər bir ziyalıdır. O özünü təxminən “Bizim Cəbiş müəllim” filminin qəhrəmanı Cəbiş müəllimə bənzədir. Özü yazır ki, 1996-cı ildə Bakıda dərs dediyi məktəbi tərk edib Krıma gedəndə Azərbaycanı təbliğ etməyə başlayıb: “Təbliğatımı Qara dənizin başqa bir məkanına köçürdüm. Dedim ki, bəlkə qələmimlə xalqın qarşısında borcumu yerinə yetirə bilərəm. Gücüm buna çatırdı. Əslində, “Cəbiş” müəllimin rolunu oynayırdım...” Krımda keçirdiyi ilk dövrlərdə onun gördüyü işlərə ciddi yanaşanlarla yanaşı qeyri-ciddi yanaşanlar da olub, amma Həbib müəllim öz yolundan dönməyib. Uzun illər “Qobustan” vasitəsilə Azərbaycanın haqq səsini ucaldıb. “Qobustan” və onun müəllifi həmişə ciddi maliyyə sıxıntısı çəkib. Həbib müəllim deyir ki, maliyyə sıxıntısı çəkməsəydi və bu sarıdan çətinliyi olmasaydı Ukrayna ərazisində daha geniş səviyyəli işlər görə bilərdi, amma maliyyə çətinliyi heç zaman onun yaxasını buraxmayıb. O tənha adada Robinzon Kruzo kimi dayanaraq onu bu çətinlikdən xilas edəni gözləyib, amma səsinə səs verən olmayıb. Gah tarı sinəsinə basıb muğamlarımızı dilləndirib, gah saz haqda veriliş hazırlayıb, gah ədəbiyyatdan, sözdən, tarixdən danışıb, xalqımızı, mədəniyyətimizi tanıdıb. Amma orada yaşayan pullu, imkanlı adamlardan dəstək görməyib. “Qobustan” uzaqdan gələn doğma səsdir. Bu səs türk yurdu Krımda eşidildi və Azərbaycanın gerçək səsi olaraq yayıldı. Mədəniyyətimizi təbliğ etməklə böyük bir siyasətə qanad verən H.Əliyevin “Qobustan”ı barədə rəsmi dövlət qəzetlərindən tutmuş müstəqil qəzetlərə, KİV-lərə qədər söz deyənlər oldu. Gördüyü işlər barədə xoş söz eşitdikdə “bu mənim vətəndaşlıq borcumdur” dedi Həbib müəllim. Xalqın mənəvi dəyərlərini, mənəvi ucalığını hər zaman təbliğ edən Həbib Əliyevi “Qobustan” proqramının 25 yaşı münasibətilə təbrik edirik. Vətənə, dövlətçiliyə, mədəniyyətə, ədəbiyyata xidmət nümunəsi göstərən H.Əliyevin fəaliyyəti bir örnəkdir. O, bütün bu işləri təkbaşına görüb və yaşadığı şəhərdə ermənilərlə təkbaşına mübarizə aparıb, sonda həqiqəti qəbul etdirməyə nail olub. Krımda “Qobustan” əfsanəsi yaradan cəhrili müəllim Həbib Əliyevin yaşam öygüsü çox zəngindir. Bu vətənpərvər ziyalının gördüyü işlər saysız olsa da, ünvanı birdir - anamız Azərbaycan, onun haqq davası...Bu gün Azərbaycan qalib ölkədir və 27 sentyabr 2020-ci il tarixində başlanan Zəfər yürüşü ilə torpaqlarımızı düşmən tapdağından azad edib. İndi o yurdlarda düşmənin nəfəsi yoxdur. “Qobustan”ın leytmotivi müzəffər Azərbaycandır!
İradə SARIYEVA
