MTK-larla bəzi internet provayderlər "novostroyka" sakinlərinə qarşı çirkin sövdə içində... Narazılıqlar var…

img

Yeni tikilən MTK-larda internet provayderlərlə bağlı problemlər var. Sakinlər istədikləri provayderi seçə bilmir. Seçim etmək istədikləri provayderlərə üz tutduqda qarşı tərəf həmin ərazidə fəaliyyət göstərmək icazəsinin olmadığını bildirir. Belədə sakin 10 manat əvəzinə daha çox vəsait ödəyib daha keyfiyyətsiz xidmətdən yararlanmış olur.

Qeyd edək ki, MTK-lar yeni yaşayış binasını təhvil verməzdən öncə yalnız bir provayderi dəvət edərək onunla müqavilə imzalayır,  bu sövdələşmə ilə adətən hər bir müştəriyə görə MTK sahibi provayderdən 2 manat alır. Bununla da MTK sahibi provayder və ya kabel operatoru qarşısında öhdəlik götürür ki, həmin binaya basqa provayderi buraxmayacaq. Ancaq bina sakinləri başqa provayderə qoşulmaq istəsə də, MTK-lar buna icazə vermir. Nəticədə əziyyət çəkən yenə bina sakinləri olur.

  • Osman Gündüz: “Yeni yaşayış binalarındakı internet inhisarçılığının, haqsız rəqabətin qarşısını almaq üçün ciddi antiinhisar tədbirləri görülməlidir”

Azərbaycan İnternet Forumunun rəhbəri Osman Gündüz bildirdi ki, əksər MTK binalardakı internet xidmətinin təşkili ilə bağlı açıq-aşkar haqsız rəqabət mühiti formalaşdırıb. “Bir bina bir provayderindir” prinsipi ilə işləyirlər: “provayderlər heç nədən çəkinmirlər: “Nə qədər inanılmaz olsa da, reallıq odur ki, adi bir MTK rəhbəri o nəhənglikdə Antiinhisar Dövlət Xidmətindən çəkinmir. MTK-lar yeni yaşayış binasını təhvil verməzdən öncə yalnız bir provayderi dəvət edərək separat sövdələşmə edirlər. Bu sövdələşmə ilə adətən hər bir müştəriyə görə MTK sahibi provayderdən 2 manat alır. Vəssalam. Bununla da MTK sahibi provayder və ya kabel operatoru qarşısında öhdəlik götürür ki, həmin binaya yer-göy dağılsa da başqa provayderi buraxmayacaq. Bununla da həmin binada yalnız bir provayderin xidmətini almaq imkanı yaranır və orada yaşayanların seçim imkanları süni şəkildə məhdudlaşdırılır, xidmətin keyfiyyəti üçün stimul formalaşmır. MTK-lar bu cür haqsız davranışla həm də provayderlər arasında sərbəst və azad rəqabəti pozmuş olurlar. Məlumat üçün deyim ki, aidiyyəti qurumların da bu məsələdən xəbəri var. Təəssüf ki, bunun qarşısını almaq üçün heç bir real addımlar müşahidə olunmur. Antiinhisar Dövlət Xidməti və RİNN monitorinq aparmalıdır. Yeni yaşayış binalarındakı internet inhisarçılığının, haqsız rəqabətin qarşısını almaq üçün ciddi ahtiinhisar tədbirləri görülməlidir. Problemi kökündən həll etmək üçün qanunvericilikdə müvafiq dəyişikliklər edilməlidir”.

Ekspert hesab edir ki, yeni tikilmiş yaşayış kompklekslərində, biznes mərkəzlərində öncədən ən azı 3 provayderin və ya kabel operatorun fəaliyyəti üçün imkanlar yaradılmalıdır. Binaların istismara verilməsindən öncə, digər kommunal xidmətlərin təhvilində olduğu kimi, aidiyyəti qurum, məsələn, RİNN binanın telekommunikasiya infrastrukturuna münasibət bildirməlidir. Antiinhisar Dövlət Xidməti bu qaydaları pozan MTK sahiblərinə qarşı sərt tədbirlər görməlidir.

  • Hüseyn Axundov: “MTK sahibləri binalarda operatorların fəaliyyətinə məhdudiyyət qoymaqla iki qanunvericilik aktını pozur”

Hüquqşunas Hüseyn Axundov qeyd etdi ki, bəzi MTK sahibləri binalarda operatorların fəaliyyətinə məhdudiyyət qoymaqla iki qanunvericilik aktını pozur: "İstehlakçıların hüquqları haqda qanun pozulur. Çünki istehlakçının xidmətləri könüllü seçmək imkanı olmalıdır. Belə olan halda rəqabətli mühit yaranır. Rəqabətli mühitin yaranması vətəndaşların hüquqlarının qorunması, o cümlədən keyfiyyətli xidmətlərə şərait yaradır.

Ümumiyyətlə, bina tikilib qurtaranadək MTK sahiblərinin hansısa səlahiyyəti olur. Bina tikilib qurtardıqda mənzil mülkiyyətçilərinin müştərək cəmiyyəti yaranmalıdır, müxtəlif məsələlərə görə mülkiyyətçilərin birgə qərarları olmalıdır. Mənzil sahiblərinin iştirakı, qərarı olmadan MTK sahibləri bir çox qərarları özləri verirlər. Bu isə ümumiyyətlə qanuna ziddir. Təbii ki, belə olan halda onlar qanun qarşısında məsuliyyət daşıyırlar. Bununla onlar həm istehlakçılar haqda qanunu, həm Azərbaycan Respublikasının qanunvericiliyi ilə mülkiyyətçilərin hüquqlarını pozmuş olurlar”.

Günel CƏLİLOVA

Peşə etikası

Son xəbərlər