Bakının bir sıra küçələrində maksimum 30 kilometr sürət həddi birmənalı qarşılanmadı...

İlqar Hüseynli: “Biz sürət həddinin 30 kilometrə endirilməsinin hər hansı bir məntiqi əsasının olduğunu görmürük”

img

Bu günlərdə  Bakı Nəqliyyat Agentliyi (BNA) tərəfindən ilk dəfə olaraq paytaxtda 30 km/saat sürət limitli zona təşkil edilib. Zonaya paytaxtın mərkəzi hissəsini əhatə edən 33 küçə daxildir. BNA bu addımın atılmasının təhlükəsizliyin artırılması, səs kirliliyinin azaldılması, eləcə də piyada hərəkəti, velosipeddən istifadənin stimullaşdırılması kimi üstünlüklərinin olduğunu qeyd edib.

Həmin zonaya daxil olan küçələrdə müvafiq yol işarələri quraşdırılıb, nişanlanma işləri aparılıb. Sürət həddinin 30 kilometrə endirilməsi sürücülərin narazılığına səbəb olub, iddia olunur ki bu hal tıxacların daha da artmasına gətirəcək.

Göründüyü kimi, BNA-nın bu addımı ictimaiyyət tərəfindən heç də birmənalı qarşılanmayıb. Belə ki, əksəriyyət bu qərarın Bakının mərkəzində hərəkəti tamamilə iflic edəcəyi qənaətindədir.

33 küçəyə sürət məhdudiyyətinin qoyulması nə dərəcədə düzgündür?

  • “İndiki halda fikrimiz ondan ibarətdir ki, bu hər hansı bir tıxacın qarşısını almayacaq, əksinə, tıxacın yaranmasına səbəb olacaq”

Sosial-iqtisadi sahə üzrə tanınan ekspert İlqar Hüseynli bildirdi ki, bu məsələ özü böyük maraq doğurur. “Bu çox maraqlı məsələdir. Biz bunu mütəxəssislərlə müzakirə etmişik. Əslinə qalanda, bu məsələyə müxtəlif yanaşmalar var. Bəzi ekspertlər düşünür ki, bunun hansısa faydası olacaq, qəzaların azalmasına gətirib çıxaracaq, piyadaların vurulması ilə bağlı qəzaların sayının aşağı düşməsinə səbəb olacaq. Bəziləri düşünür ki, tıxacla bağlı yaranan problemin həllinə müsbət təsiri olacaq. Amma hər halda bizim gəldiyimiz qənaət ondan ibarətdir ki, sürətin 30 km/saata endirildiyi küçələrin əksəriyyətində onsuz da böyük sürət müşahidə olunmurdu. Digər tərəfdən, o küçələrdə avtomobil-nəqliyyat vasitələrinin parklanma imkanları demək olar ki, məhduddur, parklanma üçün yerlər yoxdur. Məsələn, Bəşir Səfəroğlu küçəsi və Mərkəzi Univermağın arxasında olan küçələr də bura daxildir. Ona görə də biz sürət həddinin 30 kilometrə endirilməsinin hər hansı bir məntiqi əsasının olduğunu görmürük. Yəni burda əsaslandırma nədən ibarətdir ki, sürət həddi saatda 30 kilometrə endirilsin? Həmin küçələrdə onsuz da hər zaman tıxac vardı, orada böyük surət müşahidə olunmurdu. Ölkədə baş verən qəzaların statistikasına baxsaq həmin küçələrdə baş verən qəzaların sayı digərləri ilə müqayisədə azdır”.

İ.Hüseynlinin gəldiyi qənaətə görə, bu da bir effektivlik yaratmayacaq, amma Azərbaycan yollarında, paytaxt Bakının yollarında bu praktika yenidir. O hesab edir ki, bir qədər tələsmədən müşahidələr aparmaq lazımdır. “Görək doğrudanmı bunun hansısa müsbət təsiri ola biləcəkmi? Proqnoz başqa şeydir. Amma praktik olaraq prosesdə yaranan təbiiliyi müşahidə etmək artıq başqa məsələdir. Əgər bu gerçəkdən də ciddi şəkildə problemin aradan qaldırılmasında rol oynayacaqsa, biz də bunu təqdirəlayiq hal kimi dəyərləndirəcəyik. Amma indiki halda fikrimiz ondan ibarətdir ki, bu hər hansı bir tıxacın qarşısını almayacaq, əksinə, tıxacın yaranmasına səbəb olacaq”-deyə İ.Hüseynli şərhində bildirdi.

İradə SARIYEVA

Peşə etikası

Son xəbərlər