Onkoloji xəstəlikləri icbari tibbi sığorta paketinə salmaq vaxtı deyilmi...

Azərbaycanda onkoloji xəstəlikdən əziyyət çəkənlərin sayı artır. Danılmaz faktdır ki, onkoloji xəstəliklərin müalicəsi çox bahalıdır. Bu səbəbdən də təklif edilir ki, onkoloji xəstələr icbari tibbi sığorta ilə əhatə olunsun.

Milli Məclisin Səhiyyə komitəsinin ötən iclasında komitə sədri Əhliman Əmiraslanov çıxış edərək deyib ki, bu gün onkoloji xəstələr icbari tibbi sığorta ilə əhatə olunmayıb: “Bununla bağlı İcbari Tibbi Sığorta üzrə Dövlət Agentliyinin sədri ilə dəfələrlə danışmışam. Bu gün ən çox narahatlıq doğuran məsələ budur. Amma onkoloji xəstəliklərin müalicəsi çox bahalıdır və ona görə də icbari tibbi sığorta bunun altına girə bilmir. Onkoloji xəstələrin müalicəsində hazırda istifadə olunan yeni dərmanların qiyməti çox yüksəkdir”.

• “Ana və uşaqların müalicəsi, vərəmli, şəkərli xəstələr əvvəllər dövlət proqramı ilə müalicə olunurdular, ancaq indi…”

Deputatın təklifini dəyərləndirən tibb elmləri doktoru, professor Adil Qeybulla bildirdi ki, onkoloji xəstəliklər icbari tibbi sığorta tətbiq olunana qədər konkret bir paketdə idi: “Yəni bu xəstələr dövlət proqramı ilə müalicə olunurdular. İcbari tibbi sığortanın tətbiqi o deməkdir ki, dövlət proqramına daxil olan bütün o paketlərin hamısı birbaşa icbari tibbi sığortanın predmeti olmalıdır. Yəni onkoloji xəstələr isənilən halda icbari tibbi sığortanın predmeti olmalıdır. Bunun başqa alternativi yoxdur. Ana və uşaqların müalicəsi, vərəmli xəstələr, şəkərli xəstələr əvvəllər dövlət proqramı ilə müalicə olunurdurlar. Amma indi icbari tibbi sığorta paketinə birbaşa daxil edilməlidir”.

Həmsöhbətimizin sözlərinə görə, onkoloji xəstəliklərin bu paketə əlavə edilməsi bir çox insanların problemlərinin həll olunmasına çox böyük kömək olacaq. Əgər icbari tibbi sığorta respublikada tətbiq olunursa, bu xəstəlik də ora daxil olmalıdır: “Hər bir vətəndaş hansısa bir xəstəlikdən əziyyət çəkirsə, onun da hüququdur ki, icbari tibbi sığortasından istifadə edə bilsin. Güman edirəm ki, növbəti mərhələdə məhz onkoloji xəstələr icbari tibbi sığorta paketindən istifadə edə biləcəklər”.

Həkim onu da əlavə etdi ki, onkoloji xəstələrin sayının artma səbəblərindən biri də az hərəkətlilik, oturaq həyatın çox olması, idmanla az məşğul olma, bədən çəkisinin artmasıdır. Bundan başqa, qidalanmanın da təsiri böyükdür. Xəstəlikdən qorunmaq üçün aktiv həyat tərzi keçirmək, havada olmaq, idman etmək, stresdən uzaq durmaq, orqanizmdə hər hansı dəyişiklik hiss edərkən ilkin olaraq həkimə müraciət etmək lazımdır: “Bu gün mədə kiçiltmə əməliyyatı etdirənlərin sayı artır. Bu əməliyyatlar müəyyən müddətdən sonra mədə xərçənginə səbəb olur. Siqaretin ağ ciyər, alkoqolun qara ciyər xərçənginin artmasında böyük rolu var".

Günel CƏLİLOVA