Bir müddət əvvəl məlumat yayıldı ki, Azərbaycanın orta ümumi təhsil məktəblərinin rus bölməsində Azərbaycan tarixi fənnini bundan sonra dövlət dilində tədris olunacaq və bununla bağlı bəzi məktəblərə tapşırıq da verilib. Artıq tam orta məktəblərin rus bölmələrində bu prosesə başlanıldığı bildirilir.
Elm və Təhsil Nazirliyindən verilən məlumata görə, elm və təhsil naziri Emin Əmrullayevin müvafiq əmrinə əsasən, 2022-2023-cü tədris ilində ölkənin 20 ümumi təhsil müəssisəsinin tədris digər dillərdə aparılan bölmələrinin V siniflərində Azərbaycan tarixi fənni dövlət dilində tədris ediləcək: “Azərbaycan dilinin milli dövlətçiliyin başlıca rəmzlərindən biri kimi istifadəsi və tətbiqi imkanlarının genişləndirilməsi, digər dillərdə təhsil alanların dövlət dili kimi Azərbaycan dilinə, Azərbaycanın tarixinə, milli-mənəvi dəyərlərə hörmət ruhunda tərbiyə olunmasını təmin etmək məqsədi daşıyır. Cari ildə 20 məktəbdə pilotun nəticələri təhlil edildikdən sonra növbəti il üçün qərar qəbul ediləcək”.
Qeyd edək ki, bu tədris ilindək məktəblərin rus bölmələrində Azərbaycan tarixi fənni rus dilində tədris edilirdi.
Göründüyü kimi, bu ildən Azərbaycandakı rus dilli məktəblərdə və orta məktəblərin rus bölmələrində “Azərbaycan tarixi” fənninin Azərbaycan dilində tədris edilməsi barədə Təhsil Nazirliyi qərar qəbul edib. Amma rus dilli məktəblərin çoxunda “Azərbaycan tarixi” fənnini ana dilimizdə tədris edən müəllimlər yoxdur. Ekspertlər qeyd edir ki, bu yaxşı qərardır, amma əvvəlcə kadr məsələsi həll olunmalı, sonra qərar verilməli idi. Belə olsaydı məktəblərdə problem olmazdı. Bu gün “Azərbaycan tarixi” fənni rus bölmələrində Azərbaycan dilində tədris olunmalıdır, amma bu fənni ana dilində tədris edən müəllim kadrların olmaması problem yaradır.
Filologiya üzrə fəlsəfə doktoru, dosent Vüsalə Ağabəyli “Bakı-Xəbər”ə şərhində bildirdi ki, bu prosesə əvvəlcədən hazırlaşmaq lazımdır. “Düşünülməmiş verilən qərarlar uşaqları və təhsili bərbad hala salır. Araşdırıb, təcrübəni yoxlayıb, əsaslandırıb sonra belə qəti qərar qəbul etmək lazımdır. Düşünürəm ki, nazir ümumi sosial şəbəkələrdən gedən söhbətlərin əsasında qərar verib. Bu çox ciddi məsələdir. Nazir düşünüb ki, bu dərsləri kim keçəcək? Guya bu Azərbaycan dilini sevdirməyə, Azərbaycan tarixini mənimsətməyə xidmət edəcək? Həmin fənni rus dilində tədris edən müəllimlər Azərbaycan dilində o fənni "yola verəcək" beləliklə də, uşaqlar "Əli aşından da olacaqlar, Vəli aşından da", yəni Azərbaycan tarixini nə Azərbaycan dilində öyrənə biləcəklər, nə də rus dilində.
Təcrübədən keçirməmiş, kadr potensialı araşdırılmamış, şagird düşüncəsi təhlil edilməmiş verilən bu qərarı tam səriştəsiz və yanlış hesab edirəm”.
V.Ağabəylinin sözlərinə görə, onsuz da bu ölkənin gəncliyi ölkədə verilən təhsilə etibar etmədiyi üçün daha xarici ölkələrə üz tutur, indi məktəbliləri də məhv edirlər?? “Nə olacaq bu cəmiyyətin halı? Maddi imkanı çatanlar övladlarını çıxarıb özəl məktəblərə yazdıracaq, orda uşaq ingilis dilində də, rus dilində də, fransız dilində də tarix öyrənə bilər deyib pul alacaq, digərləri isə belə çəkişmələr və qeyri-peşəkar qərarlar ucbatından ortalıqda məhv olacaq! Nədir məqsəd? Bu rus dilini sıxışdırmaq deyil, Azərbaycan dilini və tarixini isə sevdirmək heç deyil. Ciddi təhsil islahatları gözlədiyimiz halda ard-arda xaos yaradan əmrlər verilir deyə V.Ağabəyli vurğuladı.
İradə SARIYEVA
