Qəbul imtahanlarındakı yüksək göstəricilərə görə, hər il respublika və bölgələrimizdə bir neçə məktəb xüsusilə seçilir. Bununla yanaşı, zəif nəticələrə sahib, qəbul faizinin respublika göstəricilərindən az olduğu məktəblər də az deyil.
Bakı Şəhəri üzrə Təhsil İdarəsinin (BŞTİ) müdiri Mehriban Vəliyeva təhsil işçilərinin sentyabr konfransında aşağı göstəricinin, əsasən, 4 rayonu - Sabunçu, Qaradağ, Xəzər və Pirallahı rayonlarını əhatə etdiyini bildirib.
Onun sözlərinə görə, IX siniflərin buraxılış imtahanlarında riyaziyyat və xarici dil fənlərində geriləmə qeydə alınıb: “4 rayonda nəticələr aşağı olub. Bunlar Sabunçu, Qaradağ, Xəzər və Pirallahı rayonlarıdır”.
Maraqlıdır, uşaqların riyaziyyat və ingilis dilindən zəif nəticələr göstərməsi nə ilə əlaqədardır?
Elçin Əfəndi: “Respublikanın müxtəlif bölgələrində eyni nəticəni göstərənlər də var”
Təhsil eksperti Elçin Əfəndinin sözlərinə görə, bu məsələdə təkcə məktəbi günahlandırmaq düzgün deyil, problem imtahan sualları ilə dərslik proqramlarının uyğunlaşmamasındadır: “Respublikanın müxtəlif bölgələrində eyni nəticəni göstərənlər də var. Təkcə məktəbin üzərinə də getmək doğru deyil. Çünki buraxılış, qəbul imtahanın formatı ilə orta təhsil müəssisələrində keçirilən dərslər bir qədər fərqlidir. Adi summativ qiymətləndirmələrin özü belə buraxılış imtahanından fərqli formatda keçirilir. Uyğunluq olarsa, müsbət nəticələr alına bilər. Qeyd edim ki, 2019-cu ildən etibarən kurikulum əsasında istər buraxılış, istərsə də blok imtahanları keçirilməyə başlayıb. Və bundan sonra şagirdlərin nəticələrini əvvəlki illə-yəni 2018 və ondan öncəki illəri müqayisə etsək, əlbəttə ki, kurikulumda daha aşağı nəticələr toplandığını görmüş olarıq. Bu da şagirdlərin kurikulum sisteminə hələ də adaptasiya olmamasına sübutdur”.
Ekspert hesab edir ki, təhsil keyfiyyətinin, nəticələrin yaxşılaşdırılması üçün müvafiq olaraq daha çox işlər aparılmalı eyni zamanda şagirdlərin bilik və bacarıqlarının qiymətləndirilməsi tez-tez keçirilməlidir: “Həm onlara yeni imtahan modeli əsasında sınaq imtahanları keçirmək, müvafiq biliklərinin monitorinqini aparmaq və digər addımlar həmin şagirdlərin dərslərə, imtahana adaptasiya olmasına şərait yaradar. Eləcə də buraxılış imtahanlarında qeyd olunan ərazilərdə şagirdlərin nəticələrinə müsbət təsir edə bilər”.
Dilbazi Əliyeva: “Şagirdlər üçün ingilis dili dərsliyi onların məntiqinə uyğun olaraq tərtib edilmir”
Ingilis dili Dilbazi Əliyeva qeyd etdi ki, ingilis dili dərslərinin həmin dildə aparılmaması tədrisə təsir edir: “Hazırda dərslərin dinləməsi (Listening) ilə bağlı problemlər var. Hər otaqda audio cihazlar yoxdur. Həmçinin, şagirdlər üçün ingilis dili dərsliyi onların məntiqinə uyğun olaraq və səviyyələrin (level) ardıcıllığı gözlənilməklə öz mütəxəssislərimiz tərəfindən tərtib edilməlidir”.
Günel CƏİLOVA
