2022-2023-cu ili tədris ili yeni başlasa da, rayondan Bakıya oxumağa gələn tələbələr hələ də yaşamaq üçün yer tapa bilmir. Kirayə mənzillərin qiyməti dodaq uçuqladır. İstər şəhərin mərkəzində, istərsə də mərkəzə uzaq ərazilərdə qiymətlər od tutub yanır.
Bununla yanaşı, Azərbaycanda ali məktəb yataqxanalarə tələbələrin yaşayışı üçün uyğun deyil. Bunun bəzi obyektiv səbəbləri də var. Çünki yanaqxanaların xeyli hissəsində məcburi köçkünlər məskunlaşıb. Eyni zamanda son illərdə ali məktəblər yataqxanaların tikintisinə ciddi önəm verməyib. Bu problemin həll olunması üçün özəl yataqxanaların tikilib istifadəyə verilməsi təklif olunur. Özəl yataqxanalar olarsa rayondan Bakı gələn tələbələrin yaşayış üçün ev problemi olmaz.
Ekspertlər hesab edir ki, özəl sektor tələbə yataqxanalarının tikintisinə cəlb edilə bilər, onlara müəyyən güzəştlər tətbiq etməklə bu problemi həll etmək olar.
Ramil Osmanlı: “Özəl sektoru tələbə yataqxanalarının tikintisinə cəlb etmək lazımdır”
Əmlak üzrə ekspert Ramil Osmanlı bildirdi ki, hazırda yataqxanaların əksəriyyətində məcburi köçkünlər məskunlaşıb: “Bəzi qurumlar və dövlət təşkilatları yataqxanaların saxlanması üçün xərcləri təmin etmədilər və nəticədə yataqxanaların bir hissəsi tamamilə aşınmış vəziyyətə gəldi. Bununla yanaşı bəzi yataqxanalar özəlləşdirildi və başqa məqsədlər üçün istifadə olunmağa başladı. Bütün bunlar tələbələrin məskunlaşmasında problem yaratdı. Hazırda universitetlərin maliyyə imkanları yeni yataqxanaların tikintisinə imkan vermir. Universitetlərin istifadəsində olan yataqxanalarda isə ehtiyacı olan tələbələrin hamısının yerləşdirilməsi mümkün deyil. Özəl sektoru tələbə yataqxanalarının tikintisinə cəlb etmək lazımdır. Dövlət tərəfindən bu istiqamətdə fəaliyyət göstərmək istəyən şəxlərə müəyyən güzəştlər tətbiq olunarsa, tələbə yataqxanaları problemini qismən də olsa həll etmək mümkündür. Belə ki, Azərbaycanda tikintiyə çəkilən xərcin çox hissəsini torpaq sahəsinin alınması təşkil edir. Yataqxanalar sökülüb yenidən tikilsə belə, torpaq sahəsinə pul xərclənməyəcək".
Elxan Əliyev: “Bakıda tikilən çoxmərtəbəli binaların bir neçə mərtəbəsi universitetlər tərəfindən alınaraq yataqxana kimi istifadə edilə bilər”
Sosial sahə üzrə ekspert Elxan Əliyev qeyd etdi ki, yeni açılmış ali məktəblərin müasir yataqxanaları var. Köhnə universitetlərdən bəziləri də öz yataqxanalarının qayğısına qalaraq təmir edib müasirləşdiriblər. Lakin yataqxanaya ehtiyac hər il olduğu kimi cari ildə də qalır: “Bu məsələdə xarici təcrübədən bəhrələnmək lazımdır. Hansı ki, bunlardan biri də özəl yataqxana təcrübəsidir. Özəl yataqxana dünyanın müxtəlif ölkələrində var. Belə ki, həmin yataqxanalar pullu olsa da, kirayə mənzillərə nisbətən çox ucuzdur. Bu baxımdan, özəl yataqxanalar tələbələrin kirayə probleminin həll yolu ola bilər. Tələbə qayğı içərisində oxumamalıdır. Sosial problemlər təhsilin keyfiyyətinə təsir göstərən amildir. Təhsilin əlçatan olması üçün bu problemlər həllini tapmalıdır. Bundan başqa, Bakıda tikilən çoxmərtəbəli binaların bir neçə mərtəbəsi universitetlər tərəfindən alınaraq yataqxana kimi istifadə edilə və oradan universitetlərə gəlir gələ bilər. Bu yolla tələbələr üçün yaranmış bir neçə ciddi problem öz həllini tapa bilər".
Günel CƏLİLOVA
