Azərbaycanda yeni tədris ilinin başlanması ilə problemlər də özünü biruzə verməyə başlayıb. Belə ki, bəzi məktəblərdə dərsliklərin çatışmaması ilə bağlı şikayətlər səslənir. Valideynlər qeyd edir ki, dərs ili başlayana qədər dərsliklər paylanılmalı idi.
Yeni dərs ili başlasa da 1, 3, 7, 10-cu sinif dərslikləri hələ də şagirdlərə verilməyib. Müəllimlər qeyd edir ki, nəşriyyatlar kitabları gecikdirdiyi üçün dərsliklərin nə zaman məktəblərə veriləcəyi məlum deyil. Qeyd edək ki, artıq təhsil müəssisələrində ciddi dərslik problem yaşanır. Maraqlıdır, dərsliklər niyə gecikir, niyə indiyə qədər hazır olmayıb?
Təhsil eksperti Nizami Hüseynov bildirdi ki, hər il dərslər başlayanda dərsliklərlə bağlı problemlər yaşanır: “Bu sahə ilə məşğul olan qurumlar cari ildə təhsil alan şagirdlərin sayı qədər dərsliklər nəşr etdirir, amma məktəblərdə kitabların paylanmasında problemlər həll edilmir. Çünki kitablar istifadəyə yararsız hala düşür, yenisi ilə əvəzlənmir və uşaqlar ondan istifadə edə bilmirlər. Bu səbəbdən də hər il dərs başlayanda dərsliklərlə bağlı problem yaşanır”.
Ekspert onu da əlavə etdi ki, köhnəlmiş kitabların yerinə 20 faiz əlavə nəşr buraxılır. Kitabxanalardan qanunsuz yolla başqa abituriyentlərin istifadəsi üçün kitablar verilir ki, bu da çətinlik yaradır. Çıxış yolu dərsliklərin məktəblərdən kənara çıxarılmamasıdır. Məktəblərə göndərilən kitablara xüsusi nəzarət olmalı, nazirlik tərəfindən daha çox kitab çap edilməlidir”.
Ekspert hesab edir ki, orta məktəblərdə dərsliklərin bölüşdürülməsi də problemlərdən biridir və bu, bəzi direktorların fəaliyyətinin qənaətbəxş olmamasından xəbər verir: "İşləməyən, işinin öhtəsindən gələ bilməyən məktəb direktorları da çoxdur. Tutaq ki, hər hansı tədris ili başa catır və onların məktəbində 100 nəfər şagird var, amma sonradan məlum olur ki, şagirdlər arasında yerdəyişmə və ya yenidən qəbul olan şagirdlər olub. Buna görə də uşaqların sayı ya az, ya da cox olur. Bu zaman şagirdlərin getdiyi məktəblərə dərsliklər göndərilmir. Bu zaman dərslik catışmazlığı olur. Onu da qeyd edim ki, hər il dövlət büdcəsi hesabına şagirdlərin sayına görə, 10-dan artıq fənn üzrə dərslik istifadəyə verilir. Sadəcə, direktorlar planlaşdırmanı düzgün həyata keçirmədiyi üçün bu kimi problemlər yaranır”.
Günel CƏLİLOVA
