İkinci Qarabağ müharibəsində Vətən torpaqlarının azadlığı uğrunda canını fəda edən qəhrəmanlardan biri də Qüdrət Tofiq oğlu Məmmədzadədir. Lənkəranın Sütəmurdov kəndində dünyaya göz açan Qüdrət indi bütün Azərbaycanın fəxridir. Bu Vətən sevdalının ömür yolu cəmi 19 il oldu. Qaldı ki, göstərdiyi qəhrəmanlıqla milyonların gözündə müqəddəsliyinə tapındığı Vətəninə sonsuz məhəbbət mücəssəməsinə döndü.
Lənkəran camaatı böyüklü-kiçikli adını fəxrlə çəkdiyi qəhrəman oğlunun xatirəsini həmişə uca tutur. Adını daşıdığı küçədə xatirəsinə bulaq kompleksi ucaldılıb. 21 yaşının tamamında həmin bulaq kompleksin açılışı çox möhtəşəm keçdi. Şəhidin atası Tofiq Məmmədov Lənkəran Şəhər İcra Hakimiyyətinin başçısı Taleh Qaraşovla birgə qəhrəmanlıq nəğməsini oxuyan bulağın açılış lentini kəsəndə qürurlu görünürdü.
Yüzlərlə adamın qatıldığı mərasim Dövlət Himninin sədaları altında başlandı. Bir daha doğma Azərbaycanın bütövlüyü üçün canını qoyan Vətən övladların əziz xatirəsi sükutla anıldıqdan sonra icra başçısı T.Qaraşov çıxış etdi: - Şəhidlər 30 ildən sonra, İkinci Qarabağ müharibəsində ədalətin bərpası uğrunda düşünmədən həyatını fəda edən, xalqın birliyinin rəmzinə çevrilən, gələcək nəsillərə Vətən sevgisinin əyani təbliğatı üçün canlı nümunə olan və bütün dünyaya xalqımızın qüdrətli, qürurlu, qeyrətli olduğunu sübut edən tarixi şəxsiyyətlərdir. Onlar cismən aramızdan getsələr də, mənən bizdən qat-qat ucada dururlar. Lənkəranın şöhrətli oğlu Qüdrətdə bu cərgədədir. Xalq neçə dövlət də öz tarixə adı yazan qəhrəmanlarını unutmur. Qüdrətin ölümündən sonra “Vətən uğrunda”, “Cəsur döyüşçü”, “Suqovuşanın azad olunmasına görə” medallarına layiq görülməsi buna nümunədir. Həm də şəhidlərin ailə üzvləri tam şəkildə dövlət tərəfindən qayğı və diqqətlə əhatə olunubdur.
Şəhid atası Tofiq Məmmədov isə çıxışında dedi: - Uşaqlıqdan oğlumun dilindən “Vətən” sözü düşməzdi. Elə şəhidlik zirvəsinə onu ucaldan bu ilahi sevgi oldu... Xalqın ürəyində özünə əbədi yuva quran Qüdrətimin adı indi Vətənlə qoşa çəkilir. Hər yerdə oğlumun xatirəsi uca tutulur. Adına bulaq kompleksi də tikildi... El-oba həmişə ağrı-acılarıma şərik çıxır. Dövlətdən bütün şəhid ailələrinə qayğı vardır. Həm də Qüdrət qalib ordunun qəhrəmanıdır. Məni həyatda yaşadan bütün bunlardır. Göstərilən ehtirama görə dövlətimə, xalqıma minnətdaram.
Sonra söz Sütəmurdov kənd tam orta məktəbinin şagirdlərinə verildi. Onların ifasında qəhrəman Vətən övladlarına həsr olunan şerlər dalğa-dalğa ətrafa yayıldı və Vətəni Qüdrət kimi sevməyə and içdilər.
Kənd qəbiristanlığında canından əziz bildiyi torpağa baş qoyan Qüdrətin məzarını ziyarət edib və üzərinə tər çiçəklər qoymaqla mərasim başa çatdı.
Zəfər ORUCOĞLU, Azərbaycan Jurnalistlər Birliyinin üzvü
