“Şəhidlərin dəfnində dini şüarlar səsləndirənlər müəyyən dairələrin təlimatlarını yerinə yetirir”. Bu, Dini Qurumlarla İş üzrə Dövlət Komitəsinin yaydığı açıqlamada öz əksini tapıb.
Qeyd edək ki, şəhidlərimizin dəfn mərasimlərində radikal şiəçilər qrupları peyda olur və onlar təriqətçi şüarlar səsləndirirlər, yad ideologiyaları təbliğ edən davranışlar sərgiləyirlər.
Dini Qurumlarla İş üzrə Dövlət Komitəsi də etiraf edir ki, İran ideologiyanın təsirinə düşənlər var.
Bəs bu 30 ildə Qafqaz Müsəlmanları İdarəsi və Dini Qurumlarla İş üzrə Dövlət Komitəsi ölkəmizdə dini ideoloji işin təşkili ilə niyə məşğul olmayıblar ki, insanlarımız kütləvi olaraq başqa ölkələrin ideoloji təsirinə məruz qalıb? Hamı bizim din xadimlərimiz nə üçün dini maarifçiliklə məşğul olmayıblar?
“Hesab edirəm ki, ya QMİ kökündən ləğv olunmalıdır, ya da onun bütün kollektivi...”
Milli Cəbhə Partiyasının (MHP) sədr müavini, tanınmış ilahiyyatçı Tural İrfan “Bakı-Xəbər”ə bilirdi ki, bu çox mühüm məsələdir: “Bu səbəbdən də gərək bunun üzərində hüquq-mühafizə orqanları və Dövlət Komitəsi iş aparsınlar. Çünki bu bilindiyi kimi, ən azı 30 il ərzində ölkəmizdə İran təbliğatı kök atıb. İndən belə 30 il olmasa da, ən azı 10 il lazım olacaq ki, dini məsələni İran təsirindən çıxarıb bizim milli-mənəvi dəyərlər istiqamətində yönünü dəyişməyə nail ola bilək. Burada əsas iş Dini Qurumlarla İş üzrə Dövlət Komitəsinin üzərinə düşür. Bəli, həqiqətən də belədir ki, 30 ildir İran təbliğatını ölkəmizdə köklü qaydada aparan, insanların o ideologiyanın təsiri altında yetişməsinə bilavasitə şərait yaradan, dəstək verən birbaşa QMİ və onun sədri Allahşükür Paşazadədir. Bunu danmaq və başqa istiqamətə yozmaq mümkün deyil. Çünki bilirsiz ki, Dini Komitədən əvvəl QMİ dini məsələlərə baxıb. Bu nəinki Azərbaycanı hətta bütün Qafqazı əhatə edir. Məlum olduğu kimi bu Çar Rusiyasından qalan idarədir və bu səbəbdən də onun sədri Rusiyaya bağlı bir adam kimi tanınıb. Bu həqiqətən də bu cürdür. Məsələ burasındadır, mən daxili dərinlikləri bilmərəm ki, bu işlərə o qəsdən yol verib, ya səhlənkarlıqdan, ya savadsızlıqdan, ya gələcəyi düşünməməkdən, yaxud xəyanət nəticəsində edib. Bunu daha böyük dairələrin araşdırıb qiymət verməsi daha məqsədəuyğundur. Amma biz nətəcədən danışırıq. Təəssüf ki, bu din sahəsində vəziyyət elə də qənaətbəxş deyil, insanların beyni zəhərlənib. Düzdür, hansısa xoşagəlməz hərəkətlərin, əməllərin törədilməsi baxımından sabitlikdir. Bu da adiyyatı dövlət qurumlarının, təhlükəsizlik idarələrinin, hüquq-mühafizə orqanlarının hesabınadır. Dini Komitənin apardığı son islahatlardan sonra istəyir ki, din məsələsini qaydasına qoysun. Amma QMİ bu insanların beyinlərinin zəhərlənməsinə yaxından şərait yaradıb”.
Cəmiyyətimizdə yaşanan mənzərənin QMİ-nin bilavasitə iştirakı ilə baş verdiyini deyən T.İrfanın sözlərinə görə, bu qurumun təşkilat şöbəsinin müdiri vardı, bu adam məscidlərə axund, imam təyin edəndə açıq-aşkar İranda təhsil almayan şəxslərə şiə məhzəbi üzrə təyinat vermirdi. O, qeyd etdi ki, həmin şəxs Bakı İslam Universitetini bitirən insanları da bu vəzifələrə irəli çəkmirdi: “Yalnız İranda və Suriyada təhsil alanları irəli çəkirdi. Suriyada təhsil alanlardan da ancaq İranyönümlü təhsil alanlara imkan yaradılırdı. Adamlar vardı ki, gedib Suriyada dövlət universitetində təhsil almışdı, onları yox, sırf İranyönümlü şəxsləri. Bəlkə də izlədiniz, Surayada İranyönümlü təhsil alanlardan biri, (hazırda o şəxs Əjdər bəy məscidində qazıdır, həm də oranın imamıdır-T.İ) (qazı 7-8 rayonun dini rəhbəri –T.İ), o çox pozğun, pedofiliyanı təbliğ edən xütbələr verib. O adam mütamadi olaraq bu yöndə danışır. Ondan yazan media qurumlarına QMİ təzyiqlər etdi, o adamı da müvəqqəti işdən uzaqlaşdırdılar, indi yenə də bərpa olunub. Bu artıq onu sübut edir ki, Azərbaycanda dini radikal yöndə olanları, İran yönümlü şəxslərin hərəsinin arxasında bir qüvvə dayanır. Bu qüvvə bunları burada saxlayır, qoruyur, müdafiə edir. Həmin qüvvələr də şəhid məsclislərində bu cür oyunlar çıxaran, təxribatlar törədən şəxslərin meydana çıxmasına şərait yaradır. Bu işlərin hamısına birmənalı şəkildə altını cızaraq deyirəm ki, QMİ şərait yaradıb, ölkəmizdə İran ideologiyasını yeridən, təbliğ edən birbaşa bu idarənin özü olub. Elə bu söz kifayət edir ki, dediklərimin möhürü olsun. Bir neçə il əvvəl QMİ sədri İranın “Səhər” kanalına müsahibə verərkən orada bildirdi ki, İranın ali siyasi-dini lideri, İran dövlətinin başçısı ayatullah Xamenei mənim mücdəhidimdir, mən onun müqəllədiyəm. Yəni dedi ki, mən onun əsgəriyəm, mən ona təqlid edirəm, mən yolunu gedirəm, mən rəhbər olaraq onu qəbul edirəm”. Adamın müsahibələrinin videoları internet kanallarında da yayıldı. İndi siz bunla müqayisə edin ki, bu şəxs bunu deyrsə, onun rayonlara təyin etdiyi axundlar da öz dini başçısından ibrət götürəcək. Onlar baxırlar ki, bizim Şeyxül İslam ona təqlid edirlər onlar da ona təqlid etməyə başladılar. Yəni məsələ bu cürdür. Məlum məsələlər oldu, şəhidlərin dəfnində şaxsey-vaxsey mərasimləri təşkil etdilər, səs-küy saldılar. O ayinlərin dinə heç bir aidiyyatı yoxdur. Bizi inandırmağa çalışırlar ki, guya bu bizdə Sovet dövründə də olub, yalandır. Yaxşı şey olsaydı Sovet hökuməti ona icazə verərdi. Nə mənada? Sovet hökuməti dinin əleyhinə olub, bunu din kimi qəbul etməyiblər, xurafata meydan açıblar ki, qoy islam bu cür tanınsın. O vaxt Quranı yalnız yasda oxumağa icazə verirdilər ki, qoy Quran yas kitabı kimi tanınsın, içində olanları oxuyub ona əməl etməsinlər. Ona görə də şaxsey-vaxsey məclislərinə də Sovet hökuməti icazə verib ki, qoy bunlar xurafatla məşğul olsun. Ona görə də bu bizim türk milləti üçün xarakterik deyil. Bizim xalq üçün ağlamaq, başına-gözünə vurmaq, sinə döymək görünməmiş şeydir, bizim milli mentalitetdə yoxdur, milli məfkurəmizə ziddir, bu farslardan və cahiliyyə ərəblərdən gəlmə işlərdir. Məsələ burasındadır ki, şəhid dəfnlərində bu işi görənlər heç bir dini qurumun, icmanın üzvləri deyil, bunlar yalnız sırf İranyönümlü adamlardır. Məsələn, QMİ-nin təyin etdiyi axundların yetişdirdiyi, onların təbliğat aparıb öyrətdiyi, bu yola sövq etdiyi insanlardır. Halbuki, onların etdiyi əməlləri hər il görürük ki, hacı Şahin Həsənli də, başqaları da edirlər. Məlum məsələdir ki, onlar da birbaşa İranın buraya təyin etdiyi qeyri-rəsmi nümayəndələridir. Hərçənd, bizim dövlət orqanları onlara nəzarət edir. Ancaq onların ideologiyası İran ideologiyasıdır. Bunların əməllərinə nəzarət edirlər, beyinlərinə nəzarət edə bilmirlər ki. Bax, beyinlərə nəzarət etmək mümkün olmadığı üçün onlar da Şəhidlər Xiyabanında o oyunu çıxaranları təzahür etdirir. Bu çox ağır məsələdir, çox zaman aparacaq. Hesab edirəm ki, ya QMİ kökündən ləğv olunmalıdır, ya da onun bütün kollektivi məsuliyyətə cəlb olunmalıdır. Çünki onların Azərbaycana ideoloji cəhətdən vurduğu zərbəni hələ heç bir rüşvətxor məmur vura bilməz. Onların yol verdiyi fəsadlar sonra üzə çıxacaq”.
Son baş verənlərin Daxili İşlər Nazirliyi tərəfindən araşdırıldığını qeyd edən T.İrfan qeyd etdi ki, Komitədə də məlum bəyanat yayıb, bəyanatda şəhid dəfnlərinin keçirilməsində protokol qaydaları tətbiq olunacaq. “Bunun kökünü araşdırıb tapmaq lazımdır. Onun da kökünü qeyd etdim ki, bu QMİ və onun təyin etdiyi axundlardır, onlar da birabaşa İranın müşteyidlərinə təqlid edirlər” - deyə qeyd edən T.İrfan bildirdi ki, İranın da məqsədi məlumdur.
Leyla QARAXANLI
