Digər sahələrdə olduğu kimi, sərnişindaşımaların daha da yaxşılaşdırılması üçün də ölkə başçısının rəhbərliyi ilə görülən işlər çəmiyyətimizin diqqət mərkəzindən kənarda deyil.
Ələlxüsus, ölkəyə gətirilən və ən son standartlara cavab verən nəqliyyat vasitələri, avtobuslar əhali sayına görə daha sıx olan paytaxt Bakıda sərnişinlərin daha rahat və etibarlı daşınmasına xidmət edir. Bütün bunlar dövlətimizin, ölkə başçımızın vətəndaşlara diqqət və qayğısının bariz nümunəsi, ən tutarlı isbatıdır. Məsələ burasındadır ki, sərnişinlərin daşınmasında qüsurların olması da günümüzün reallığıdır və sanki kimlərsə yaradılan şəraitin, əldə olunan əlverişli imkanların əleyhinə olaraq, sərnişinlər arasında narazılıqlar yaratmaqda maraqlıdırlar. Paytaxtın ayrı-ayrı yerlərində və ayrı-ayrı istiqamətlərdə hərəkət edən marşrut xətlərindən istifadə edən sərnişinlərin ictimai nəqliyyatdan narazılıqlarının hər zaman şahidi oluruq. Sözsüz ki, bu narazılıqlar sürücülərin sərnişinlərlə davranışından, nəqliyyat vasitələrinin idarə edilməsində yol verdikləri qüsurlardan irəli gəlir. Sərnişinlərin ictimai nəqliyyatla bağlı səsləndirdiyi narazılıqlardan biri də avtobusların gecikməsidir. Qeyd edilir ki, yarım saatdan bir avtobus gəlir, ona da minməyə yer olmur. Bakıətrafı qəsəbələrə işləyən avtobusların isə əksəri köhnədir.
Rəsmi qurumlar bildirir ki, avtobusların gec gəlməsi Bakıdakı tıxaclarla birbaşa əlaqəlidir. Hansı ki, bir sıra küçələrdə onlar üçün ayrıca zolaq da var.
“Bakı şəhərində tıxacın qarşısının alınmasının yeganə yolu ictimai nəqliyyatı inkişaf etdirməkdir”
Sosial sahə üzrə ekspert Elxan Əliyev qeyd etdi ki, son zamanlar nəqliyyatın hərkətində sıxlıq müşahidə olunur, məktəblər, ali təhsil müəssisələri açıldıqdan biz bunun daha artığını müşahidə edəcəyik. Çünki yol infrastrukturunu, ictimai nəqliyyatı inkişaf etdirə bilməmişik, əksinə ictimai nəqliyyat geri gedib: “İctimai nəqliyyatla bağlı ciddi addımlar atılmalıdır. Həmçinin, avtobusların sayının artırılması üçün addımlar atılmalıdır. Bakı şəhərində tıxacın qarşısının alınmasının yeganə yolu ictimai nəqliyyatı inkişaf etdirməkdir”.
Həmsöhbətimiz onu da əlavə etdi ki, avtobusların sayının azalmasının bir səbəbi onların köhnə, istifadəyə yararsız olmasıdır. Ötən illərdən fərqli olaraq sahibkarlar yeni avtobus almaqda maraqlı deyil: “Çünki hazırki gediş haqqı onlara sərf etmir. Bu səbəbdən də onlar daşıyıcılara vəsait yatırmaqda maraqlı deyil. Daşıyıcı şirkətlərlə bu istiqamətdə danışıqlar aparmaq lazımdır. Əgər maddi vəziyyətə görə, belə edirlərsə, dövlət hansısa bir addım atmalıdır. Qabaqlayıcı tədbirlər görməlidir. Nə sərnişinlər yolda qalmalı, nə də daşıyıcı şirkətlər zərər görməlidir. Dövlət özəl şirkətlərə dəstək göstərməlidir ki, onlar bu sahəni inkişaf etdirsinlər. Təbii ki, hər şey nəzarət altında olmalıdır, bunu özbaşına buraxmaq olmaz. Sözsüz ki, burada nəzarətin nəzarəti olmalı, həmçinin müəyyən güzəştlər verilməlidir”.
Ekspert onu da əlavə etdi ki, sərnişindaşıma şirkətlərinin haqlı iradları nəzərə alınmalıdır. Amma çıxış yolu qiymətləri artırmaq deyil: "İctimai nəqliyyat Azərbaycanda dövlət tərəfindən tənzimlənən xidmətlərdən biridir. Çox ciddi sosial məsələdir. Qiymət artımı insanların gündəlik həyat tərzinə və mənafeyinə ciddi təsir edən bir nüansdır. Bu qiymətləri necə gəldi dəyişdirmək olmaz”.
Günel CƏLİLOVA
