Vətəndaşların bir hissəsi ölkədəki səhiyyə xidmətlərindən o qədər də məmnun deyil desək, yanılmarıq. Bəzi özəl klinikalardan, o cümlədən dövlərin nəzarətində olan tibb mərkəzlərindən də müəyyən narazılıqlar var. Elə bu səbəbdən də mütamadi olaraq aidiyyatı qurumlar tərəfindən xəstəxanalarda yoxlamalar keçirilir.
Maliyyə Nazirliyinin yaydığı məlumatda bildirilir ki, bəzi qeyri-tibb işçilərinə isə aylıq vəzifə maaşının 3 misli əvəzinə 5 misli məbləğində müddətli əlavə ödənildiyi aşkar edilib. Abşeron Rayon Mərkəzi Xəstəxanası publik hüquqi şəxsin 2017-ci ilin yanvar ayından 2021-ci ilin noyabr ayına qədərki maliyyə-təsərrüfat fəaliyyətini əhatə edən yoxlama zamanı isə işçilərə fasiləsiz əmək stajına görə vəzifə maaşının 30 faizi əvəzinə 40 faizi məbləğində əlavə haqq kimi, koronavirusla mübarizə tədbirlərinə cəlb olunan bəzi qeyri-tibb işçilərinə isə aylıq vəzifə maaşının 3 misli əvəzinə 5 misli məbləğində müddətli əlavə ödənildiyi aşkar edilib.
Həmçinin, Səhiyyə Nazirliyinin Azərbaycan Dövlət Həkimləri Təkmilləşdirmə İnstitutunun 1 yanvar 2019-cu il tarixindən 1 aprel 2022-ci il tarixinə qədər olan dövr üzrə fəaliyyətinin yoxlanılması nəticəsində İnstitutun Plastik və Rekonstruktiv Cərrahiyyə Klinikasının mühafizəsini özəl mühafizə şirkətinin təşkil etməsinə baxmayaraq, həmin müəssisədə artıq gözətçi ştatlarının saxlanılması hesabına əlavə əmək haqqı ödənildiyi, İnstitutun balansındakı xidməti minik avtomobillərinin təmirinə normadan artıq ehtiyat hissələrinin alındığı, eləcə də nomadan artıq yanacaq sərfiyyatı üzrə vəsaitlərin istifadəsi aşkarlanıb.
Qeyd edək ki, zamanla xəstəxanalarda müxtəlif qanun pozuntularının qeydə alınması ilə bağlı məlumatlar yayılır.
“Dövlət büdcəsindən hər il bu məqsədlə külli miqdarda vəsait ayrılır, lakin həmin vəsait təyinatı üzrə istifadə olunmur”
Sosioloq Aytəkin Kamranqızı bildirdi ki, səhiyyə sahəsində olan problemlərin kökü dərindir: “Səhiyyə sistemində bu problem daha geniş, daha kəskindir və həm də çoxdan var. Demək olar ki bütün xəstəxanalarda belədir. Bu məqsədlə çox ucuz və keyfiyyətsiz məhsullar alınır, amma baha alındığı rəsmiləşdirilir. Üstəlik, əksər xəstə xəstəxana yeməyini yemir, amma sənəddə bu, istifadə olunmuş kimi göstərilir və külli miqdarda pul mənimsənilir. Eyni zamanda, tibb müəssisələrinin rəhbərləri öz yaxınlarının adını tibb işçisi kimi yazdırır və üstəlik həmin şəxsə yüksək əmək haqqı da təyin edilir. Bu hal nəinki xəstəxanalarda əksər idarə və müəssisələrdə yaşanır. Bu yoxlamalar bütün tibb müəssisələrində aparılmalıdır, həm də köklü şəkildə. Dövlət büdcəsindən hər il bu məqsədlə külli miqdarda vəsait ayrılır, lakin həmin vəsait təyinatı üzrə istifadə olunmur. Dövlət pulu yerdən yığmır ki, hansısa dələduz məmurlar basıb yesinlər. Ona görə də əminəm ki, aidiyyatı qurumlar məlum məsələni dərindən araşdırmalıdır”.
Ekspert onu da əlavə etdi, əməkhaqlarının gizlədilməsi faktı ən çox özəl sektorda qeydə alınır. Bu hala özəl klinikalarda da geniş rast gəlinir: “Özəl tibb müəssisələrinin dövriyyələrinə nəzarət etmək mümkün deyil. Həmin xəstəxanaların aylıq dövriyyəsinin nə qədər təşkil etdiyi tam olaraq bəlli deyil. Onlar aylıq gəlirini gizlədir. Özəl klinikaların aylıq dövriyyəsinin müəyyən edilməsi üçün xüsusi mexanizm tətbiq olunmalıdır”.
Günel CƏLİLOVA
