Azərbaycanda yeni tədris ilinin başlanmasına sayılı günlər qalsa da problemlər də özünü büruzə verməyə başlayıb. Belə ki, bəzi məktəblərdə dərsliklərin çatışmaması ilə bağlı şikayətlər səslənir. Artıq məlum problemlə valideynlərə sosial şəbəkə vasitəsilə məlumat verilir ki, 1,3,7,10-cu sinif dərslikləri hələ hazır deyil, nəşriyyatlar kitabların gecikdirir, dərsliklərin nə zaman məktəblərə veriləcəyi məlum deyil.
Danılmaz faktdır ki, hər il dərslər başlayanda dərsliklərlə bağlı problemlər yaşanır. Aidiyyatı qurumlar cari ildə təhsil alan şagirdlərin sayı qədər dərsliklər nəşr etdirir, amma məktəblərdə kitabların paylanmasında problemlər həll edilmir. Çünki kitablar cırılır, yenisi ilə əvəzlənmir və uşaqlar ondan istifadə edə bilmirlər. Buna görə hər il dərs başlayanda dərsliklərlə bağlı problem yaşanır.
“Nəşriyyatlar tərəfindən dərslik çapı gecikdiyi üçün şagirdlər tədrisin ilk zamanlarında müəyyən çətinlik…”
Məsələ ilə bağlı fikir bildirən təhsil eksperti Nadir İsrafilov bildirdi ki, təhsil sahəsində dövlət siyasətinin əsas prinsiplərindən biri də təhsilin mövcud standartlara, normalara, sosial-iqtisadi tələblərə, şəxsiyyətin, cəmiyyətin və dövlətin maraqlarına uyğunluğunu şərtləndirən keyfiyyətlilik prinsipidir. Bu prinsipin həyata keçirilməsinin təmin edilməsində dərsliklərin, dərs vəsaitlərinin və digər tədris-metodik vasitələrin rolunun danılmaz olduğu yəqin ki, çoxlarına məlum olmamış da deyil: “Məlumdur ki, yeni nəsil dərsliklər hazırlanır. Kurrikulum əsasında yeni dərsliklər hazırlanır. Bu dərsliklərin müəyyən hissəsi hazırlanıb, bir hissəsi isə çap vəziyyətindədir. Bu səbəbdən də məktəblərdə dərslik problemi yaşanır. Əvvəllər dərsliklər tender əsasında hazırlanırdı. Bu zaman müəyyən problemlər yaranırdı. Ona görə də qərara alındı ki, ehtiyyat dərsliklər yaransın. Tenderdə qalib olmayan dərslik ehtiyyat dərsliklə əvəz oluna bilər”.
Həmsöhbətimiz onu da əlavə etdi ki, yeni dərsliklər şagirdlərə verilənə qədər müəllim şagirdlərə bu sarıdan kömək etməlidir: “Ümumiyyətlə, hər il dərs başlayanda dərsliklərlə bağlı problem yaşanır. Rayonlarda bu problem daha çoxdur. Nəşriyyatlar dərs ili başlayana kimi məlum məsələni həll etməli idilər. Nəşriyyatlar tərəfindən dərslik çapı gecikdiyi üçün şagirdlər tədrisin ilk zamanlarında müəyyən çətinlik yaşayacaqlar”.
Günel CƏLİLOVA
