MİQ imtahanlarından sonra müəllimlərin sertifikasiyasının həyata keçirilməsi prosesi cəmiyyət tərəfindən çox ciddi şəkildə izlənilir. Məlum olduğu kimi, xeyli sayda müəllim sertifikasiyadan kəsilib. Lazımı nəticəni toplaya bilməyən müəllimlərə isə növbəti ildə bir dəfə də sertifikasiyada iştirak şansı veriləcək.
Onlar bu dəfə də müsbət nəticə göstərə bilməsələr tədris prosesindən uzaqlaşdırılacaqlar. Ömrünün az qala 30-40, 20-25 ilini müəllimliyə həsr edən insanlar növbəti sertifikasiyadan da keçə bilməsələr işlərini itirəcəklər. Artıq cəmiyyətdə belə bir fikir formalaşdırmağa çalışırlar ki, sertifikasiyadan keçə bilməyən müəllimlər gedib özlərinə başqa peşə tapsınlar. Müəllim özünə necə başqa peşə tapa bilər ki, ömrünün böyuk hissəsini müəllimliyə həsr edib, 50-55 yaşında adam hansı peşəni öyrənə bilər? Bu nə yanaşmadır? Müəllimin bu şəkildə hədəfə alınması nə dərəcədə düzdür?
“Heç bir hal əsas vermir ki, cəmiyyətdə müəllim təhqir və təqib olunsun”
Filologiya üzrə fəlsəfə doktoru, dosent Vüsalə Ağabəyli bizimlə söhbətində qeyd etdi ki, müəllimə başqa peşə, sənət seçməyi təklif etməyin özü absurddur. Bunun səhv yanaşma olduğunu deyən V.Ağabəyli bildirdi ki, kimin gəldi müəllimin üstünə hücum etməsi yolverilməzdir: “Müəllim getsin özünə başqa peşə seçsin demək, heç peşəkar cümlə deyil, bu ifadəni təhsil müəssisəsində illərlə çalışan ziyalıya ünvanlamaq özü də, həmin cümləni işlədənin özünün qeyri-professionallığını göstərir”.
V.Ağabəyli vurğuladı ki, hələki sertifikasiyanın nəticələrinə görə işdən tamamilə kənarlaşdırılmaq məsələsi yoxdur. “ Mən başa düşürəm ki, müəllimlər üçün bu artıq gərginlik və stressdir. Ümumən müəllimlərin böyük çoxluğunun bu prosesdən müvəffəqiyyətlə keçdiyini nəzərə alsaq, deməli, sertifikasiya imtahanları o qədər də çətin deyil. Müəllimin hazırlıqlı olmağı və özgüvəninin qaydasında olmağı şagirdin gələcək inkişafı üçün önəmlidir. Yəni əslində, müəllim özü heç bir sınaqdan çəkinməməlidir ki, şagirdlərini də imtahanlara hazırlaya bilsin, bu özgüvəni və biliyi ötürə bilsin. Lakin heç bir hal əsas vermir ki, cəmiyyətdə müəllim təhqir və təqib olunsun. Az qala meyvəsatan da müəllimdən danışır, qapıçı da, hamı da. Bəyəm bu cəmiyyətin ən yararlı yeri və çətin problemi müəllimdir? Tənqid olunası başqa bir vəzifə daşıyıcısı doğrudan görmürlər, yoxsa cəsarətləri çatmır? Yenə də deyirəm, savadlı, özgüvənli və psixoloji cəhətdən sağlam müəllim nikbin və faydalı gələcək deməkdir, bu vacib nüansdır. Lakin sertifikasiyada aşağı bal toplamış müəllimlərin bugünə qədər işləməsində günahkar təhsil sistemidir, bu baxımdan da, həmin müəllimlər müvəffəqiyyət göstərənə qədər əlavə seminarlar, treninqlərə cəlb olunmalıdır. Yaralı barmağı kəsib atmırıq, onun müalicəsi ilə məşğul oluruq”-deyə V.Ağabəyli qeyd etdi.
İradə SARIYEVA
