Dərslərin başlanmasına 1 gün qalıb. Bu səbəbdən valideynlər yeni tədris ilinə hazırlıqlarını davam etdirirlər. Nazirlər Kabinetinin mart ayında imzaladığı qərara əsasən yeni məktəbli formaları 2022-2023-cü tədris ili üçün nəzərdə tutulmayıb.
Yəni bu il sentyabrın 15-dən məktəblilər əvvəlki formalarını geyinə bilərlər. Ancaq bu il yeni məktəbli formasını almaq sayı isə az deyil. Lakin formaların sadəcə "Bakı Tikiş Evi"ndə və "Bravo" marketlərində satılması valideynlər üçün problemlər yaradır. Demək olar ki, son bir həftədir ki, “Bakı Tikiş Evi”nin qarşısında izdiham yaşanır. Sosial şəbəkələrdə yayılan görüntülərdə görünür ki, geyim almağa övladları ilə gələn valideynlər sıxlıqla qarşılaşıb.
Qeyd edək ki, Nazir Emin Əmrullayev məsələ ilə bağlı jurnalistlərə bildirib ki, bu il köhnə məktəbli formaları istifadə edilə bilər. Əgər məktəb tərəfindən hər hansı məcburiyyət varsa, Bakı Şəhəri üzrə Təhsil İdarəsi, eləcə də regional təhsil idarələrinə müraciət edilməlidir: "Köhnə formaları birmənalı olaraq istifadə edə bilərlər”.
Nazirin məlum fikrinə baxmayaraq məktəb direktorları valideynlərdən tələb edir ki, onların övladları dərsə yeni məktəbli forması ilə gəlsin. Məhz bu səbəbdən də hər gün BTE-nin qarşısında izdiham yaşanır.
Bakı Tikiş Evinin (BTE) satış şöbəsinin müdiri Etibar Əzimovda media nümayəndələrinə açıqlamasında qeyd edib ki, direktorlar valideynləri məcbur edirlər ki, mütləq forma ilə uşaqlar dərsə gəlsin. Bu tövsiyə xarakterlidir. Camaatı belə təşvişə salmaq olmaz.
Yeni məktəbli formaları ilə bağlı tələbin artmasının bir səbəbi kimi də valideyn komitələrinin rolu olduğu deyilir. Iddia edilir ki, valideyn komitələri vatsap qruplarda səs atıb, narazılıq edirlər ki, şagird məktəbə mütləq yeni məktəbli forması ilə gəlməlidir, əks halda həmin uşaq digərlərinin yanında utandırılacaq. Bu səbəbdən çarəsiz qalan valideynlər BTE-nin qarşısında növbə gözləməli olur.
“Valideyn komitə sədrləri sosial platformalarda qruplar qurur, həmin qruplara səs atıb səs-küy yaradırlar, məhz bu səbəbdən də…”
Təhsil eksperti Elçin Əfəndi bildirdi ki, məktəbli formaları ilə bağlı konkret ajiotajın yaradılmasının səbəbkarlarından biri də məhz məktəblərdə olan valideyn komitələridir: “Bəzi valideynlərin komitə sədrləri az qala özlərini keçmiş Mərkəzi Komitə sədrləri kimi aparır. Sosial platformalarda qruplar qurur, həmin qruplara səs atıb səs-küy yaradırlar. Məhz bu səs-küydən sonra digər valideynlər də düşünür ki, hamı alsa, təkcə bu almasa, övladı bullinqə məruz qalacaq, qınanılacaq və ya haqqında yanlış fikir formalaşacaq ki, gör nə qədər kasıbdırlar ki, adi məktəbli forması da ala bilmirlər və s".
Ekspert onu da əlavə etdi ki, yeni məktəbli forması tələb deyil: “Tələb deyil, könüllülük əsasındadır. Heç bir məktəb direktorunun və ya digər rəhbər işçilərin bunu tələb etməyə haqqı yoxdur. Yeni məktəbli formasının alınması vacib deyil. Kim istər alar, kim istəməz, yox. Məktəbli forması eyni qiymətə satılmalıdır ki, hər bir vətəndaşın onu almaq imkanı olsun. Nəzərə almaq lazımdır ki, pandemiya bitməyib, karantin dövrünün də vaxtı uzadılıb, virusa yoluxanların sayı da gündən-günə artmaqdadır. Bütün bu amillərdən sonra məktəbli formasını bu şəkildə satışa çıxartmaq doğru deyil”.
E.Əfəndinin sözlərinə görə, bu gün Azərbaycan təhsil müəsisəsində 1 milyon 900 minə yaxın şagird təhsil alırsa, onların hər birindən məktəbli forması tələb olunursa, bu cür sıxlığın olacağı əvvəlcədən praqnozlaşdırlmalı idi: “Təhsil Nazirliyi açıqlamasında vurğulayır ki, onlar məktəbli forması satmır və ya bununla bağlı hansısa şirkətlə əməkdaşlıq etmir, sadəcə şagirdlərin məktəbli formasından istifadə etməsini tələb edir. Təhsil Nazirliyi bunu məktəblərdən tələb edirsə, ya həmin məktəb rəhbərliyinin tekstil şirkətləri ilə əməkdaşlığı ola bilər, və ya hər hansısa məsul bir şəxsin bu prosesdə iştirakı mümkündür. İnsanların pandemiyanın olduğu, yoluxma sayının artdığı şəraitdə bu formada sıxlığının yaranmasında həmin şəxslər birbaşa məsuliyyət daşıyır. Bu heç də kənardan ürəkaçan mənzərə deyil. Bunu aidiyyatı qurumlar nəzərə almalıdır”.
Günel CƏLİLOVA
