“IX siniflərin buraxılış imtahanlarında Bakının 4 rayonun şagirdləri aşağı nəticə göstərib”. Bunu Bakı Şəhəri üzrə Təhsil İdarəsinin müdiri Mehriban Vəliyeva deyib.
O bildirib ki, Xəzər, Qarabağ, Sabunçu, Pirallahı rayonlarında nəticələrin zəif olması ümumi işə zərbə vurur: "İmtahan nəticələrinin təhlili göstərir ki, şagirdlər arasında ana dilindən irəliləyişlər olsa da, riyaziyyat və xarici dildə geriləmələr var. Bunu pandemiya və sualların çətinliyi ilə əlaqəlindirmək istəməzdim. Biz problemlərin üzərində işləməliyik".
Maraqlıdır, Bakıətrafı rayonlarda nəticənin belə zəif olmasının səbəbi nədir?
“Həmin ərazilərdə yaşayan ailələrin təhsilə münasibəti müsbət olmadığı üçün bu gün həmin ərazilərin şagirdlərinin nəticəsi xoş deyil”
Təhsil eksperti Elşən Qafarov bildirdi ki, Xəzər, Qarabağ, Sabunçu, Pirallahı rayonları urbanizasiya nəticəsində məskunlaşmış vətəndaşlardan ibarətdir. Vaxtilə bu ərazilərdə torpaq sahəsi ucuz olduğu üçün sosial vəziyyəti zəif olan vətəndaşlar həmin ərazidə məskunlaşıb: “Əhalinin maddi rifahı onların övladlarının təhsilinə təsir edir. Bu ərazilərdə olan məktəblərdə şagird sıxlığı da yaşanırdı. Məsələn, Sabunçu, Xəzər və Qaradağ rayonlarında olan məktəblərdə şagird sıxlığı problem yaşanırdı”.
Həmsöhbətimiz onu da əlavə etdi ki, həmin ərazilərdə yaşayan ailələrin təhsilə münasibəti müsbət olmadığı üçün bu gün həmin ərazilərin şagirdlərinin nəticəsi xoş deyil.
Ekspertin sözlərinə görə,15 yaşında təhsildən yayınan zəif şagirdlər risk qrupuna daxildir, rayonlarda onlar erkən nikaha daxil olurlar: "Şəhər yerlərində yaşayan belə zəif şagirdlərin valideynləri bir çox hallarda işlədiyi üçün onlar nəzarətsiz qalır, risklər yaranır. Yaranan vəziyyət nəticələri zəif olan şagirdlərin zərərli vərdişlərə aludə olmasına səbəb olur. Ümumiyyətlə, icbari təhsilin ümumi təhsili əhatə etməsinin tərəfdarıyam. 11 illik təhsil icbari olsa, uşaqların yeniyetmə yaşlarda zərərli vərdişlərə düçar olmasının, risklərin qarşısını almış olarıq. Bu həm də erkən nikahlarla bağlı rəqəmlərə təsir etmiş olar”.
Günel CƏLİLOVA
