Gündəlik olaraq nəqliyyat vasitələrindən istifadə edən hər kəsin bu mövzuda əsas problemlərindən biri də tıxaclardır. Xüsusən pik saatlarda daha çox müşahidə olunan tıxacların yaranmasına bir yox, əslində bir neçə səbəb zəmin yaradır. Daha çox paytaxt küçələrində müşahidə olunan vəziyyətə görə gecikmə halları, aqressiya, mübahisə, bəzən də qəza halları baş verir.
Tıxacın yaranmasının bir səbəbi də günün istənilən vaxtında, xüsusən gündüz saatlarında yollarda aparılan təmir tikinti işləridir.
Qeyd edək ki, xarici ölkələrdə bu təmirlər adətən gecə saatlarında, küçələrdə maşınların az olduğu vaxtlarda aparılsa da nədənsə bizdə əksinədir.
Elxan Əliyev: “Yollarda tıxacların əsas səbəblərindən biri də təmir-tikinti işləridir”
Sosial sahə üzrə ekspert Elxan Əliyev bildirdi ki, yollarda tıxacların əsas səbəblərindən biri də təmir-tikinti işləridir. Həmin işlərin olduqca ləng aparılması, alternativ küçələrin bir neçəsində eyni vaxtda aparılması nəinki tıxaclara səbəb olur, hətta nəqliyyatın hərəkətini iflic edir: “Bunu istisna etmək üçün təmir-tikinti işləri son dərəcə diqqətlə layihələndirilməli, küçə və prospektlər mərhələlərlə təmir edilməli (məsələn, küçənin iki yolayrıcı arasındakı hissəsi tam təmir edilib istifadəyə verildikdən sonra növbəti yolayrıcınadək hissəyə keçilməli və s.), alternativ küçə və yolların eyni vaxtda təmiri tam istisna edilməli, hətta həmin alternativ küçələr təmir olunan küçənin də yükünü götürə biləcək səviyyədə saxlanmalıdır”.
Həmsöhbətimiz onu da əlavə etdi ki, tıxaclar bütün cəmiyyətin problemidir. Bu problemin aradan qaldırılması bütövlükdə cəmiyyətin və dövlət orqanlarının birgə işi nəticəsində mümkündür. Amma cəmiyyətin hər bir üzvü bu işi ilkin olaraq özündən başlamalı, yol hərəkəti qaydalarına daha sayğı ilə yanaşmalı, cəmiyyət qarşısında bir fərd olaraq öz vəzifələrini yerinə yetirməlidir. Yalnız bu yolla bir toplum olaraq yol hərəkətinə, nəqliyyatdan istifadəyə münasibətlərimizi yaxşı tərəfə dəyişə bilərik.
Elməddin Muradlı: “Yollarda hər hansı işin gündüz vaxtı aparılması iki səbəbdən baş verir”
Nəqliyyat üzrə ekspert Elməddin Muradlı bildirdi ki, yollarda hər hansı işin gündüz vaxtı aparılması iki səbəbdən baş verir. Bunlardan biri podratçı şirkətlərin işi plansız görməsidir: “Bir qrupda toplanıb, orada hansı qurumun yaxın aylarda işi varsa, bir vaxt seçib hər ikisi və üçü eyni anda iş görməlidir. Amma bəzən görürsən ki, məsələn, Azərsu deyir ki, büdcədə pul yoxdur, üstündən bir ay keçəndən sonra qazmağa başlayır. Bir ay sonra da həmin yolu qaz, işıq və başqa qurumlar gəlib qazır. Sonda da AAYDA orada təmir aparır, o da qazır. Problem yaranır, çünki vahid sistem yoxdur”.
Ekspert onu da əlavə etdi ki, xarici ölkələrin təcrübələrinə nəzər yetirsək, burada ABŞ modeli ən yaxşı yol təmiri modellərindən biridir. Belə ki, bu ölkədə hər hansı yolda qazıntı, təmir işləri aparılırsa, kommunal xidmət göstərən qurumlarla əlaqə saxlanılır. Onların da həmin yolda işləri varsa, ortaq bir zaman seçilir, işlər isə gecə saatlarında görülür. Nəticədə isə tıxac və əlavə xərclər yaranmır.
Günel CƏLİLOVA
