Orta ümumtəhsil məktəblərində və ali məktəblərdə yeni tədris ilinin başlanmasına çox az müddət qalıb. Odur ki, kiçikdən böyüyə hər kəsin diqqəti bu istiqamətə yönəlib. Sentyabrın 7-də “Marriott Hotel”də Bakı şəhər Təhsil İdarəsinin keçirdiyi sentyabr konfransı da bu səbəbdən diqqət mərkəzində oldu.
Mətbuatda yayılan məlumata görə, Elm və təhsil nazirinin iştirak etdiyi konfransa Milli Məclisin 10-a yaxın deputatı da dəvət olunub. Tədbirdə iştirak şəxslərdən biri mətbuata məlumat verib ki, konfransda qalmaqal baş verib. Tədbirə dəvətlilər sırasında Milli Məclisin Elm və təhsil komitəsinin sədri, AMEA-nın müxbir üzvü Bəxtiyar Əliyev də olub. Lakin tədbir boyu ona çıxış üçün söz verilməyib. Saytlar yazır ki, bunu isə deputatlar özlərinə qarşı hörmətsizlik kimi qəbul ediblər: “Hətta deputatlardan biri buna açıq şəkildə etiraz edərək nazirə iradını bildirdi və bunu Milli Məclisə və qanunverici orqana qarşı hörmətsizlik kimi qəbul etdiyini dilə gətirdi. Hətta bu etirazdan sonra da deputatlara söz verilmədi. Sanki deputatları həmin tədbirə sadəcə əl çalmaq üçün dəvət etmişdilər”. Mətbuatda sözügedən tədbirdə iştirak edən millət vəkillərindən yalnız Bəxtiyar Əliyevin adı çəkilsə də, digərlərinin adları qeyd edilmir. Yəni deputatların tam tərkibi açıqlanmır, bu səbəbdən də bu barədə geniş danışmaq olmur.
Görəsən, doğrudanmı deputatlar danışmaq istəyiblər, lakin onlara söz verilməyib? 10-a yaxın deputatın hamısımı parlamentdə danışmağa, çıxışa meylli, fəal deputatlardır? Bəlkə onlar illərdir parlamentdə səsi çıxmayan deputatlardır ki, orada da passiv mövqe tutublar? Əgər doğrudan da onlar danışmağa meylli, fəal deputatlardandırsa, onlara söz verməmək yanlış məsələdir. Əksinə, ağzını bıçaq açmayan deputatlardırsa, onların danışmağından danışmamağı yaxşıdır.
Sentyabr müşavirəsinə hansı deputatlar dəvət edilibmiş?
Əldə etdiyimiz məlumata görə, tədbirdə millət vəkili Fazil Mustafa, Bəxtiyar Əliyev və başqaları iştirak edib və həmin deputatların da kifayət qədər aktiv olduğu hər kəsə məlumdur. Əlbəttə, elmlə, təhsillə bağlı olan millət vəkillərinə söz verilməməsi normal hal deyil. Əslində, həmin şəxslər sentyabr müşavirəsində çıxış etməklə prosesə töhfə verə bilərdilər. Bakı Şəhər Təhsil İdarəsinin keçirdiyi sentyabr konfransında aktiv millət vəkillərinə çıxış üçün söz verilməməsi doğru deyil. Ekspertlər deyir ki, ən azından Milli Məclisin Elm və Təhsil komitəsinin sədrinə, komitə üzvlərinə söz verilməli idi.
Tədbirdə iştirak edən ekspertlər deyir ki, deputatlara söz verilməyib, amma onların heç birinin açıq narazılıq etdiyinin şahidi olmayıblar.
“Bəlkə deputatların öz aralarında bu barədə nə isə söhbətləri olub, bilmirəm”
Tanınmış təhsil eksperti Məzahir Məmmədli bizimlə söhbətində bildirdi ki, sentyabr müşavirəsində o da iştirak edib və hətta millət vəkillərinin bəziləri ilə söhbət edib, amma narazlıq eşitməyib: “Düzdür, deputatlar çıxış etmədilər, amma narazılıq görmədim. Açığı, mən elə ciddi nə isə baş verdiyini hiss etmədim. Bəlkə deputatların öz aralarında bu barədə nə isə söhbətləri olub, bilmirəm. Demək, o tədbiri Bakı Şəhər Təhsil İdarəsi təşkil edib və bu, respublika müşavirəsi deyildi. Nazir də orada qonaq qismində iştirak etdi. Yəqin ki, respublika müşavirəsində deputatların çıxışını da nəzərə alarlar”.
Məsələ ilə bağlı deputatların mövqeyini öyrənə bilmədik.
Leyla QARAXANLI
