Məktəblərin açılmasına sayılı günlər qalıb və bu üzdən şagirdlər də, valideynlər də məktəb qayğıları ilə məşğul olmağa başlayıb. Təhsil naziri məktəbli formalarının məcburi olmadığını desə də, bir sıra direktorların valideynlər qarşısına qoyduğu tələb hər kəsə məlumdur.
Bir tərəfdən Bakı Tikiş Evi, o biri tərəfdən Bakı Tekistil Fabriki, başqa tərəfdən də işbazlar məktəbli forması istehsalına və satışına başlayıblar. Bakı Tikiş Evi işini tam çatdıra bilmir və bu da işbazların əlinə fürsət verib, onlar da tələm-tələsik məktəbli formaları istehsal edib, yaxud hardansa gətizdirib bazara çıxarırlar. Özü də bu formalar Bakı Tikiş Evinin élan etdiyi qiymətlərdən baha satılır. Təsəvvür edin ki, məktəbli formalarının qiyməti mağazalarda gunu-gundən artırılır. Bu məsələyə nəzarət edən isə yoxdur ki, qiymətlər tənzimlənsin. Sözün həqiqi mənasında bazarda hərc-mərclikdir. Bakının geyim mağazaları saxta məktəbli forması ilə doludur. Təhsil Nazirliyi, Bakı Tikiş Evi isə susur, bu da işbazların əlinə fürsət verir, gətirdiyi malı istədiyi qiymətə satır. Dünən 20 manata olan köynək səhərisi günü 25-30 manata satılır. Stabil qiymət yoxdur. Qiyməti işbazlar diqtə edir, təəssüf ki, bu halın da qarşısını alan yoxdur. Valideynlər, şagirdlər narazıdır, yalnız işbazlar razıdır, çünki qazanan onlardır.
“Əgər fərqli qiymətlərə və keyfiyyətsiz geyimlərə…”
Məsələyə münasibət bildirən filologiya büzrə fəlsəfə doktoru, dosent Vüsalə Ağabəyli “Bakı-Xəbər”ə bildirdi ki, bu sadəcə biabırçılıq və özbaşnalıqdır. Keyfiyyətsiz və saxta geyimlərin bazarı başına götürməsi faktının hər kəsi narahat etdiyini deyən V.Ağabəyli hesab edir ki, ciddi tədbirlər görülməlidir: “Qiymət gün-gündən artır, keyfiyyət isə bərbaddır. Ümumiyyətlə, fikir verirsinizsə, təhsillə bağlı qaldırdığımız ciddi məsələlər nəinki öz həllini tapmır, heç reaksiya da görmür. İlk başdan ETN-nin forma dizaynını təhsil islahatı hesab edərək tədris ili başlamağına az qalmış tələm-tələsik elan etməsi yalnış idi. Qaçılmaz problemlər qala-qala, hamı nazirdən ümidlə inkişafa yönəlik addımlar gözləyə-gözləyə məktəbli forması dizaynının bu cür gündəmə gəlməsi təəssüfdoğurucu məqamdır.
Təhsilalanlar, təhsilin keyfiyyəti və valideynlərin münasibəti, o cümlədən qeyd etmək lazımdır ki, heç təhsil verənlərin də münasibəti nəzərə alınmırsa, o zaman ictimaiyyət necə düşünə bilər ki, verilən qərarlar, doğrudan da, təhsilə xidmət üçündür?
Bu məsələ nazir üçün yalnız dizayndırsa, bazar alverçiləri üçün yaxşı sui-istifadə mənbəyidir, valideynlər üçün isə acınacaqlı mənzərə.
Əgər fərqli qiymətlər və keyfiyyətsiz geyimlərə nazirlik tərəfindən reaksiya olmayacaqsa, narazılıq daha da artacaq. Bu haqlı narazılıq heç kəsi narahat etmir görəsən? Təftiş, nəzarət şurası yaradılaraq bu məsələ izlənilməlidir”.
V.Ağabəylinin sözlərinə görə, dərsliklər və dərs vəsaitləri təhsilin bir hissəsi olduğu kimi, məktəb forması da təhsilin bir hissəsidir. “Bu məsələni bazar münasibətlərinin üstünə atmaq təhsil sektorlarını məsuliyyətdən azad etmir. Əgər təhsilalanların şikayəti, haqlı narazılığı cavabsız qalacaqsa, hüquqları qorunmayacaqsa, o zaman ölkədə verilən təhsilə də ümid qalmayacaq”-deyə V.Ağabəyli qeyd etdi.
İradə SARIYEVA
