Bu gün hər kəs “Mehnur” loqopedik reabilitasiya mərkəzində baş verənlərdən həm dərin sarsıntı keçirib, həm də hiddətlənib. Bu mərkəzdə uşaqlara işgəncə verilməsini əks etdirən görüntülər böyük narahatlığa səbəb olub. Daxili İşlər Nazirliyinin Mətbuat Xidmətindən verilən məlumata görə, Bakıda “Mehnur” loqopedik reabilitasiya mərkəzinin uşaqlara işgəncə verən psixoloq və köməkçisi saxlanılıb.
Qeyd edildiyi kimi, “Mehnur” mərkəzində baş verən hadisə ilə bağlı köməkçi və psixoloq saxlanılıb. Belə müəssisələrin rəhbərləri ciddi sorğu-suala tutulmalı, onlara qarşı istintaq tədbirləri görülməli, onlar istintaq altına alınmalı, cəzalandırılmalıdır. Yəni baxıcı və psixoloqla yanaşı müəssisənin rəhbəri də haqq etdiyi cəzanı almalıdır. Yəni o adamlarla birgə rəhbər də məsuliyyətə cəlb olunmalıdır. Çunki hadisə onun müəssisəsində baş verib. Əgər o müəssisəsini idarə edə bilmirsə, belə şeylər baş verirsə onun rəhbər olmağa haqqı yoxdur. Ona görə də onun təsisçisini, rəhbərini də məsuliyyətə cəlb etmək lazımdır ki, qoy digərlərinə də görk olsun.
Bu arada “Mehnur” loqopedik reabilitasiya mərkəzinin direktorunun saxlandığına dair mediada məlumat yayılıb. Məlumata görə, direktor Nuranə Hacızadə artıq Nizami rayon Polis İdarəsinin müvəqqəti saxlanma yerinə yerləşdirilib. Məlumata görə, İşgəncələrə Qarşı Azərbaycan Komitəsinin sədri Tural Hüseynov və müavini Elçin Şirinov direktora və mərkəzin daha iki əməkdaşına baş çəkib.
Qeyd edək ki, sosial şəbəkələrdə Nizami rayonunda yerləşən “Mehnur” loqopedik reabilitasiya mərkəzində azyaşlılara işgəncə verilməsi ilə bağlı görüntülər yayılıb.
Bildirək ki, Daxili İşlər Nazirliyi tərəfindən müvafiq araşdırma aparılıb, mərkəzin psixoloqu Aytac Kazımlı və mərkəzin direktor köməkçisi vəzifəsində çalışan Səbinə Əliyarbəyli saxlanılıb. Saxlanılan şəxslər barəsində Cinayət Məcəlləsinin 133-cü (əzab vermə) maddəsi ilə cinayət işi başlanıb.
Məlumata görə, uşaqların döyüldüyü mərkəz lisenziyasız işləyirmiş.
“Mərkəz rəhbərinə və hadisəni törədənlərə qarşı qanunvericiliyə əsaslanaraq ciddi hüquqi tədbirlər görülməlidir”
Azərbaycan Autizm Assosiasiyasının sədri Elnur Məmmədli mətbuata açıqlamasında bildirib ki, Assosiasiyanın adı çəkilən mərkəzlə heç bir əlaqəsi yoxdur: “Adı qeyd olunan “Mehnur" loqopedik mərkəz bizim Assosiasiyanın üzvü deyil. Heç bir fəaliyyətləri yoxdur, idman yarışlarında iştirak etmirlər. Özüm illərlə bu işlə mübarizə aparmışam. İstər xüsusi qayğıya ehtiyacı olan, istərsə də normal uşaq olsun, heç kimə bunu etmək olmaz, qəti şəkildə əleyhinəyik. Bu insanlar tapılıb cəzalandırılmalıdır. Dəfələrlə demişik, dövlət və ya özəl müəssisələr olsun, nə qədər ki, mərkəzlər lisenziyasız fəaliyyət göstərir, heç bir qurum nəzarət etmirsə, bu məsələlər olacaq. Burada nə keyfiyyətli təlimdən, nə də təhsildən söz gedə bilər. 4 qurum - Əmək və Əhalinin Sosial Müdafiəsi Nazirliyi, Elm və Təhsil Nazirliyi, Gənclər və İdman Nazirliyi, Səhiyyə Nazirliyinin nəzarətində olan komissiya, qurum yaradılmalıdır. Nazirlər Kabineti bunlara lisenziya verməlidir ki, fəaliyyət göstərsin. Bütün standartlara, təmizlikdən tutmuş, texniki işçilərə, təlimçilərə qədər hamısı öz yerini tapmalıdır. İdman zalları, otaqlar standartlara cavab verməlidir. Əgər bunlar yoxdursa, işçi heyətə nəzarət olunmur, aidiyyəti olmayan insanlar gəlib təlim keçirsə, belə də olacaq. Təklif edirik ki, bu mərkəzlərə dövlət tərəfindən nəzarət olunsun, onlara lisenziya verilsin. Bu uşaqlara qarşı zorakılıq edənlər cəzasını almalıdır”.
İSBAM sədri Samir Adıgözəlli “Bakı-Xəbər”ə bildirdi ki, baş verənlərdən hər kəs hiddətlənib. O vurğuladı ki, lisenziyasız fəaliyyət göstərən və adı peşəkar mərkəzlərin sırasında olmayan bu mərkəzdə baş verənlər həqqiqətən də dəhşətdir. Hər pulu, imkanı olan şəxsə bu cür uşaq müəssisələri açmaq üçün lisenziya verilməli olmadığını deyən S.Adıgözəlli qeyd etdi ki, təsadüfi adamların bu sahələrdə fəaliyyəti faciələrə yol açır. Bütün bunların cəzasılıq mühiti ilə əlaqədar olduğunu deyən S.Adıgözəllinin sözlərinə görə, belələri elə cəzalanmalıdır ki, onların aqibəti başqalarına da dərs olsun. “Bilirsiz ki, belə hadisələr ilk dəfə deyil baş verir. Əvvəllər də uşaq bağçalarında, müxtəlif mərkəzlərdə belə hallar olub, bu barədə videolar, görüntülər yayılıb. Amma görünür, o hadisələri törədənlər lazımı şəkildə cəzalandırılmayıblar deyə analoji hallar baş verib. Bu məsələ ədalətlə, hüquqi prinsiplər çərçivəsində həll olunmalıdır. Düzdür, ictimai qınaq da lazımdır, amma əsas hüquqi qiymətin verilməsidir. Görünür, onlara verilən cəza kifayət qədər sərt olmadığı üçün belə ağır nəticələrə gətirib çıxarır. İnsanlar autizmli uşaqlarının reabilitasiyasını həyata keçirmək, psixoloji durumunu düzəltmək üçün bu mərkəzə üz tutub. Həm ümid edib gəlib, həm də bura kifayət qədər böyük pullar xərcləyiblər. Valideyn bu reabilitasiya mərkəzinə külli miqdarda vəsait xərcləyir, amma çox dəhşətli mənzərə ilə qarşılaşır. Bu işgəncə faktı insanlarımız tərəfindən böyük təpki ilə qarşılandı. Hesab edirəm ki, bu mərkəzin özünün fəaliyyəti geniş araşdırılmalıdır. Çünki üzə çıxan hər bir fakt, məlumat “Mehnur" loqopedik mərkəzi ilə bağlı geniş araşdırmalar aparılmasını zəruri edir. Necə ola bilər ki, belə bir mərkəz lisenziyasız fəaliyyət göstərir? Bu başqa bir məsələdir, bu da araşdırılmalıdır. Yayılan məlumata görə, “Mehnur”un direktoru da saxlanılıb. Baş verən dəhşətli hadisənin üzərindən üzrxahlıqla, hansısa yüngülləşdirici tədbirlərlə keçilməməlidir. Belə olarsa, biz növbəti dövrlərdə daha ağır hadisələrin şahidi olarıq. Ona görə də, mərkəz rəhbərinə və hadisəni törədənlərə qarşı qanunvericiliyə əsaslanaraq ciddi hüquqi tədbirlər görülməlidir. Bu işə göz yumanlar da cəzasız qalmamalıdırlar. Görünür, müəyyən icra qurumlarında, müəyyən yerlərdə bu məsələyə göz yumulub. Bir qurumun lisenziyasız fəaliyyət göstərməsi suallar doğurur. Hər halda, bütün bunlara aydınlıq gətirililəcək”.
O qeyd etdi ki, hətta sənədlərində qarışıqlıq olan uşaq bağçaları da var, belə bağçalar yaradılıb və bir binada kirayə otaqlar götürüb fəaliyyət göstərirlər. Bu məsələnin ciddi monitorinqinin keçirilməli olduğunu deyən S.Adıgözəlli qeyd etdi ki, bu sahədə olan müvafiq dövlət qurumları onu araşdırmalıdır: “Həmin qurumlar üzərinə ciddi iş düşür, onlar araşdırma aparmalı, monitorinq keçirməlidir”.
İradə SARIYEVA
