Məlum olduğu kimi, müəllimlərin işə qəbul imtahanlarının nəticələri artıq açıqlanıb. Imtahanda yüksək bal toplayanlar şəhər, zəif bal toplayanlar isə kənd məktəblərinə göndəriləcək. Bu hal isə narazılığa səbəb olub. Buradan belə nəticə çıxır ki, kəndlərdə təhsil alan şagirdlərə daha az nəticə göstərən (məntiqlə yanaşsaq, daha aşağı savadlı) müəllimlər dərs keçə bilər. Şəhərdə təhsil alanlara isə, əksinə, daha savadlı pedaqoqlar təhsil verməlidir.
Danılmaz faktdır ki, rayonlarda təhsilin səviyyəsi onsuz da aşağıdır. Bir tərəfdən də zəif müəllimlərin göndərilməsi bu vəziyyəti daha da pisləşdirə bilər. Bu istiqamətdə ciddi işlər görülməlidir.
Bəs görəsən MİQ imtahanlarında yüksək nəticə göstərən müəllimlərin şəhər, az bal toplayanların isə kənd məktəblərinə düşməsi nə dərəcədə məntiqlidir?
“Yüksək bal toplayan müəllimlərin şəhər, aşağı nəticə göstərənlərin isə kənd məktəblərinə müəllim kimi göndərilməsi təəssüfedicidir”
Təhsil eksperti Elşən Qafarov bildirdi ki, bu haqlı iraddır və ciddi problemdir: “İllərdir Azərbaycanda kənd, şəhər, region məktəbləri deyə bölgü aparılıb. Ölkənin bir regionundan digərinə cəmi 3 saatlıq maşın yolu məsafəsi var. Amma biz hər şeyi, hətta müəllim ordusunu da bölmüşük. Bu isə doğru deyil. Elə bir sistem hazırlanmalıdır ki, məktəblərin reytinq cədvəlinə uyğun bölgü aparılsın. Yəni daha yaxşı nəticə göstərən məktəblərdə işləmək istəyən müəllimlərin balı da yüksək olmalıdır. Amma indiki halda şəhər məktəblərinin balı daha üstündür və bu da ora sənəd verən müəllimlərin sayının çoxluğu ilə bağlıdır. Bunun əsas səbəbi isə şəhər yerlərində repetitorluğun və kölgə təhsilinin geniş yayılmasıdır. Hər kəs istəyir ki, şəhər məktəblərinə düşsün və burada repetitorluqla məşğul olsun. Çünki repetitorların kənd məktəblərində perspektivi yoxdur”.
Ekspert onu da əlavə etdi ki, yüksək bal toplayan müəllimlərin şəhər, aşağı nəticə göstərənlərin isə kənd məktəblərinə müəllim kimi göndərilməsi təəssüfedicidir.
Günel CƏLİLOVA
