Cari ildə abituriyentlərin ixtisas qrupları üzrə ali təhsil müəssisələrinə qəbulolma faizi açıqlanıb. Dövlət İmtahan Mərkəzinin Direktorlar Şurasının sədri Məleykə Abbaszadə jurnalistlərə açıqlamasında deyib ki, bu il I və IV qrupda 500-dən çox bal toplayan bir neçə abituriyent ali təhsil müəssisələrinə qəbul ola bilməyib:
“IV ixtisas qrupu üçün bu hal təbiidir. Çünki abituriyent tibb ixtisası üzrə yalnız bir yer yazdığı üçün ali məktəbə daxil ola bilmir. Amma bu il üçün Tibb Universitetində yeni açılan ixtisaslar da var ki, onların keçid balı aşağıdır. Əgər həmin şəxslər bu ixtisasları seçsəydilər, kənarda qalmazdılar”.
Maraqlıdır, 500-dən yuxarı bal toplayan abituriyentlər niyə kənarda qalır?
“Yüksək bal toplayanların kınarda qalmasının səbəbi onların düzgün ixtisas seçə bilməməsi ilə bağlıdır”
Təhsil eksperti Kamran Əsədov qeyd etdi ki, yüksək bal toplayanların kınarda qalmasının səbəbi onların düzgün ixtisas seçə bilməməsi ilə bağlıdır: “Məlumat üçün deyim ki, I ixtisas qrupu üzrə 570-dən yuxarı bal toplayan rus bölməsi üzrə 1 abituriyent, 530-dan çox bal toplayan Azərbaycan bölməsi üzrə 3 abituriyent ali məktəblərə qəbul ola bilməyib. Ümumilikdə I qrup üzrə 500-dən çox bal toplayan 4, 400-dən çox bal toplayan 12, 300-dən çox bal toplayan 36 abituriyent tələbə adını birinci turda qazana bilməyib. II ixtisas qrupu üzrə 320-dən çox bal toplayan 1 abituriyent, ümumilikdə 200-dən çox bal toplayan 31 abituriyent qəbul ola bilməyib. III ixtisas qrupu üzrə 420-dən yuxarı bal toplayan 2 abituriyent, 400-dən çox bal toplayan 3 abituriyent tələbə adından hələlik məhrum olub. III ixtisas qrupu üzrə 300-dən çox bal toplayan 50 abituriyent birinci turda qəbul ola bilməyib. IV ixtisas qrupu üzrə 560-dan çox bal toplayan 2 abituriyent, 500-dən çox bal toplayan 20 abituriyent, 400-dən çox bal toplayan 33 abituriyent, 300-dən çox bal toplayan 49 abituriyent tələbə adını qazana bilməyib”.
Ekspert onu da əlavə etdi ki, yüksək bal toplayıb, lakin universitetə qəbul ola bilməyənlər 2-7 sentyabr tarixlərində ixtisas seçimi edib tələbə adını qazana bilər.
Günel CƏLİLOVA
