Müəllimlərin sertifikatlaşdırılması üzrə test imtahanı mərhələsi artıq yekunlaşıb. İmtahanlar Bakı, Sumqayıt, Gəncə şəhərləri və Xaçmaz rayonu olmaqla, ümumilikdə 8 imtahan mərkəzində təşkil olunub. Sertifikatlaşdırmanın nəticələri təhsilverənlərin karyera inkişafında və əməyinin stimullaşdırılmasında nəzərə alınacaq.
İmtahan verən şəxslərin topladıqları ballara görə maaşlarına 10, 35 faiz əlavələr ediləcək
Qeyd edək ki, Nazirlər Kabinetinin müvafiq qərarına əsasən, sertifikatlaşdırmanın nəticəsinə uyğun olaraq tədris edilən dərs saatına görə test imtahanı mərhələsində 50 baldan yuxarı nəticə göstərən müəllimlərin vəzifə maaşına 35 faiz, keçid balını toplayan müəllimlərin vəzifə maaşına isə 10 faiz aylıq əlavələr ediləcək.
Ancaq son günlər bununla bağlı narazılıqlar yaranıb. Belə ki, bu günlərdə Təhsil İnstitutunun direktoru Rüfət Əzizov isə media nümayəndələrinə açıqlamasıda bildirib ki, müəllim 50 bal yığıbsa, maaşa 35 faiz əlavə ona şamil edilmir: “Müəllimlər 51 və daha yüksək bal toplayarlarsa, bu qərar onlara şamil olunur”.
Ancaq elm və təhsil naziri Emin Əmrullayev mətbuat konfransında çıxışı zamanı dövlət ümumi təhsil müəssisələrinin direktor və direktor müavinlərinin (təhsilalanların sayına görə) və həmin müəssisələrin (ümumi təhsil üzrə təhsilverənlərə münasibətdə digər dövlət təhsil müəssisələrinin) təhsilverənlərinin (sertifikatlaşdırmanın nəticəsinə görə) vəzifə maaşlarına aylıq əlavələr edilməsini şərh etmişdi. O, imtahanda müəllimlərin 50 bal toplamasının yüksək nəticə hesab olunduğunu və maaşlarına 35 faiz əlavələr ediləcəyini bildirmişdi.
“Əmək haqqı artımı 50-dən yuxarı bal toplayanlara şamil olunursa, bu açıq şəkildə deyilməlidir, yox əgər…”
Millət vəkili Etibar Əliyev yaranmış fikir ayrılığı ilə bağlı “Bakı-Xəbər”ə açıqlamasında bildirdi ki, 35 faiz əmək haqqı artımı ilə bağlı Elm və Təhsil Nazirliyi bir fikir irəli sürür, Təhsil İnstitutu başqa... Qurumların fərqli fikir irəli sürməsi isə yolverilməzdir: “Bu elə bir məsələdir ki, ortaq mövqe ortaya qoyulmalıdır. 35 faiz əmək haqqı artımının hansı müəllimlərə şamil olunması aydın şəkildə izah olunmalıdır. 50-51 arasında 1 bal fərq var. Bu o dərəcədə də böyük göstərici deyil. 1 balla 50 bal toplayanların 35 faiz əmək haqqından məhrum olması düzgün deyil. Əmək haqqı artımı 50 baldan yuxarı toplayanlara şamil olunursa bu açıq şəkildə deyilməlidir. Müəllim 50 bal toplayıbsa bu qayda həmin şəxslərə də şamil olunmalıdır. Bu elementar bir məsələdir. 1 bala görə insanları incitmək, narazı salmaq olmaz”.
Millət vəkili onu da əlavə etdi ki, sertifikasiya zamanı müəllimlərin böyük əksəriyyəti müsbət nəticə göstərib. Yüksək nəticə göstərənlərlə bağlı büdcədən böyük vəsait ayrılacaq. Bu səbəbdən də 1 bal məsələsinə aydınlıq gətirilib təhsil ictimaiyyətinə məlumat verilməlidir.
Günel CƏLİLOVA
