Müəllimlərin sertifikatlaşdırılması prosesinin test imtahanı mərhələsi sentyabrın 1-də yekunlaşdı. Sertifikatlaşdırmanın keçirilməsində məqsəd ümumi təhsil müəssisələrində pedaqoji və idarəetmə fəaliyyəti ilə məşğul olan, ali və orta ixtisas təhsilinə malik təhsilverənlərin peşəkarlıq səviyyələrini və peşə yararlılıqlarını yoxlamaq, onların peşəkar inkişafına nail olmaq və təlim ehtiyaclarını öyrənməkdir.
Məlumat üçün qeyd edək ki, sertifikatlaşdırma prosesinə birinci mərhələdə ibtidai təhsil səviyyəsi üzrə Bakı Şəhəri üzrə Təhsil İdarəsi, Abşeron-Xızı, Quba-Xaçmaz və Gəncə-Daşkəsən Regional Təhsil idarələrinə tabe olan, həmçinin Elm və Təhsil Nazirliyinin birbaşa tabeliyindəki ümumi təhsil müəssisələrində çalışan 11 min ibtidai sinif müəllimi cəlb olunub. Təhsilverənlərin sertifikatlaşdırılmasının test mərhələsində onlara tədris etdikləri fənn üzrə ümumtəhsil proqramlarına, tədris metodikasına və təlim strategiyalarına aid 60 sual təqdim edilir. Hər suala düzgün cavab 1 balla qiymətləndirilir. Səhv cavablar və ya sualın cavabsız qoyulması 0 bala bərabər tutulur və düzgün cavablara təsir göstərmir.
Onu da qeyd edək ki, sertifikasiya ilə bağlı həvəsləndirmə tədbiri olaraq keçid balı toplamış müəllimlərin əməkhaqqına 10 faiz, 50-dən yuxarı bal toplayan müəllimlərin əməkhaqqına isə 35 faiz əlavə ödəniləcək.
Sertifikasiyadan keçən müəllimlər artıq bəllidir. Sertikasiyadan keçməyən müəllimlərə isə münasibət dəyişib. Valideynlər həmin müəllimlərin övladlarına drs deməsini istəmir. Hətta valideynlər bununla bağlı kampaniya da başladıblar.
“Hər bir valideyn istəyər ki, onun övladına bilik və bacarığı daha yüksək olan, daha peşəkar müəllim dərs desin, ancaq…”
Təhsil üzrə ekspert Elşən Qafarov bildirdi ki, sertiifikasiyanın əsas məqsədi bilik və bacarıqları aşağı olan müəllimləri üzə çıxartmaqdır. Elm və Təhsil Nazirliyi olaraq 1 il ərzində həmin müəllimlər müxtəlif kurslara cəlb olunacaq və ikinci dəfə sertifikasiya keçiriləcək. Əgər həmin müəllimlər ikinci dəfə də öz bilik və bacarıqları üzərində işləməsələr, 50 faiz bal həddini keçə bilməsələr, onlarla bağlanmış müqaviləyə Əmək Məcəlləsinin 70-ci maddənin C bəndi ilə (tutduğu vəzifəyə uyğun olmamaq səbəbilə) xitam veriləcək: “Yəqin ki, 1 il ərzində aşağı bal toplayan müəllimlər işlədiyi vəzifənin məsuliyyətini dərk edəcək, bilik və bacarıqlarını inkişaf etdirmək üçün hazırlaşacaqlar. Bunu edə bilməyən müəllimin əmək müqaviləsinə xitam veriləcək. Fikrimcə, sertifikasiya həddindən artıq yumşaq keçirildi. Bu məsələnin nə qədər ciddi olmasını dərk edən müəllimlər üzərlərində işlədilər və yüksək nəticə göstərdilər. Bu məsələni dərk etməyən, qəbul etmək istəməyən, “sertifikasiya olmasın” deyən yoldaşlar arxayınçılıqla gözlədilər və aşağı bal topladılar. Bu, təhsilin gələcəyi baxımından düşünülməli, məsələyə milli mənafedən yanaşılmalıdır”.
Ekspert onu da əlavə etdi ki, hər bir valideyn istəyər övladına bilik və bacarığı daha yüksək olan, daha peşəkar müəllim dərs desin: “Bu çox normal bir haldır. Ancaq məsələ odur ki, müəllimlər valideynlərin istəyi ilə təyin olunmur. Dövlətin qoyduğu minimum tələb var. Valideynin istəyindən asılı olmayaraq, sertifikasiyada 50 faiz bal toplayanlar müəllim işləyə bilər”.
Günel CƏLİLOVA
