Məlum olduğu kimi, avqustun 30-dan sentyabrın 1-nə kimi təhsilverənlərin sertifikatlaşdırılması prosesi keçirilib.
İlkin olaraq Bakı Şəhəri üzrə Təhsil İdarəsi, Abşeron-Xızı, Gəncə-Daşkəsən və Quba-Xaçmaz Regional Təhsil İdarələrinin tabeliyindəki məktəblərdə çalışan ümumilikdə 11 min ibtidai sinif müəllimi sertifikasiya imtahanı verib.
Məlumat üçün qeyd edək ki, test imtahanı mərhələsində 120 dəqiqə müddətində təhsilverənlərin tədris etdiyi fənn üzrə ümumtəhsil proqramlarına, tədris metodikasına və təlim strategiyalarına aid 60 sual təqdim edilir. Hər düzgün cavab 1 balla qiymətləndirilir. Bu mərhələnin nəticələri üzrə balların hesablanması avtomatlaşdırılmış rejimdə proqram təminatı vasitəsilə həyata keçirilir və imtahan başa çatdıqdan dərhal sonra namizədə elan edilir. Test imtahanında azı 30 bal toplamış təhsilverənlər sertifikatlaşdırmanın müsahibə mərhələsinə keçmək hüququ qazanır.
Qeyd edək ki, Nazirlər Kabinetinin müvafiq qərarına əsasən, sertifikatlaşdırmanın nəticəsinə uyğun olaraq tədris edilən dərs saatına görə test imtahanı mərhələsində 50 baldan yuxarı nəticə göstərən müəllimlərin vəzifə maaşına 35 faiz, keçid balını toplayan müəllimlərin vəzifə maaşına isə 10 faiz aylıq əlavələr ediləcək. Artıq 2 gündür ki, sertifikatlaşdırma imtahanından uğurlu nəticələr əldə edən kifayət qədər müəllim var.
Danılmaz faktdır ki, bu gün təhsil verənlərin, demək olar hamısı repetitorluq fəaliyyəti ilə də məşğul olur. Sertifikat imtahanından uğurla keçən müəllimlər hazırlıq qiymətlərini qaldırmağa hazırlaşır.
Xatırladaq ki, hazırda bir fəndən hazırlıq 50-120 manat arasında dəyişir. Burada qiyməti fənn, qrup və ya fərdi hazırlıq, eyni zamanda şagirdin təhsil aldığı sinif müəyyənlədirir. Qiymət artımı barədə söhbətlərdə isə artımın 20-40 manat olacağı deyilir. Repetitorluq fəaliyyəti ilə məşğul olanlar təhsil alacaq abituriyentlərə hazırlıq qiymətinin qalxacağı ilə bağlı xəbərdarlıq da edirlər.
“Sertifikasiyanın mahiyyəti 5 ildən bir müəllimin öz ixtisasını hansı səviyyədə bilməsi, onun psixoloji durumunun nə qədər olmasını yoxlamaq və ölçməkdir”
Təhsil üzrə ekspert Kamran Əsədov bildirdi ki, son illər həyata keçirilən islahatların məqsədi təhsilin keyfiyyətinin artırılmasıdır: “Bizim üçün ən ciddi problem təhsilverənlərin, müəllimlərin bilik və bacarıqlarını əmək bazarının tələblərinə, müasir standartlara uyğunluğu məsələsidir. Son illərdə bu istiqamətdə işlər aparılıb. Xatırladım ki, 2014-2018-ci illərdə məllimlərin diaqnostik qiymətləndirilməsi keçirildi və məlum oldu ki, müəllimlər arasında ixtisası üzrə kifayət qədər yüksək biliyə malik olmayanlar var. Ölkə başçısı tərəfindən bir neçə ildir ki, əməkhaqqı artırılıb. Hazırda yeni sərəncam da var. Sertifikasiyanın mahiyyəti 5 ildən bir müəllimin öz ixtisasını hansı səviyyədə bilməsi, onun psixoloji durumunun nə qədər olmasını yoxlamaq və ölçməkdir. Bu o demək deyil ki, həmin müəllimlər işdən azad ediləcəklər. Elm və Təhsil Nazirliyinin əsas məqsədi müəllimlərin hazırlıq səviyyəsini, peşəkarlığını yüksəltməkdir. Bu o demək deyil ki, müəllim əgər sertifikasiyadan yüksək balla keçibsə, repetitorluq qiymətlərini qaldırmalıdır. Bu, qeyri-peşəkar bir yanaşmadır”.
Günel CƏLİLOVA
