Lerik rayonunun kəndlərində qalaq-qalaq yığılıb qalmış sosial problemlər onu göstərir ki, burada məmurlar çoxdan vətəndaşlara qayğını unudublar.
Vəzifəsi xalqa xidmət etmək olan başda oturanlar özündən savayı heç kimi düşünmür, nəticədə sadə insanların həyatları həmişə çətin sanaq qarşısında olur. İndi artıq bu dağlar diyarının kəndlərində yaşamaq qeyri-mümkündür. Yaşayış məntəqələrində elə bir sahə yoxdur ki, vətəndaşlar ondan öz xeyirlərinə istifadə edə bilsinlər. Azərbaycan qanunları burada kasıblar üçün heç bir əhəmiyyət daşımır. Əksinə, idarə rəhbərlərinin fəaliyyət(sizliy)i daha da onların əl-qolunu zəncirləyir. Məmləkətdə yaxşı nə varsa, yalnız məmurlara, oliqarxlara, bir də din pərdəsi arxasında min oyundan çıxan mollalara məxsusdur. Azərbaycanda vəziyyət yaxşılığa doğru dəyişdikcə onlar bir az da azğınlaşır.
Bir də rayonda kənd əhalisinə cəhənnəm əzabı yaşadan hər hansı sosial problem dediyim həmin təbəqələr üçün yağlı qazanc yerinə dönür. Fikrim daha dəqiq olsun deyə, misal çəkim. Qarlı, küləkli günlərdə əksər dağ kəndlərində həftələrlə işıqlar kəsilir. Çünki keçən əsrin 60-ci illərdə olan dirəklər ömrünü başa vurub. İşığı olmayan evlərində neft lampasını yandırır. Bundan istifadə edən bəzi üzdəniraqlar elə məmurların havadarlığı ilə neftin qiymətini birə-beş qaldırırlar. 30 ildir kəndlərə işləyən marşrut avtobusları gözə dəymir. Onların işini indi əsasən dövlət işində çalışan kənd məmurları görürlər. Öz işini qoyub şəxsi maşınları ilə yola çıxır, sərnişin daşıyırlar. Məcburiyyət qarşısında qalıb bir yerə çıxandan 2 manat əvəzinə 15 manat alırlar. Məmur zəbt etdiyi 50 hektar sahəni əkməyə texnika tapır, amma gün-güzəranı torpaqla keçən kəndli 1 hektarını şumlamaya bilmir.
Lerikin dağ kəndlərində məmurların yaratdığı problemlər çoxdur. Elə son illər kəndlini yanacaqsız qoyanda məmurlardır. Meşələri, yamacları öz aralarında bölüblər. Əksər kəndlərdə qaz yoxdur, odun da onların nəzarəti altında satılır. Heç nədən qorxmadan ona elə bir qiymət qoyurlar ki, kəndli qışdan salamat çıxmaqdan ötrü bütün olanı satmaq qarşısında qalır. Halbuki Vətən müharibəsində şirin canından keçən həmin kəndlinin madar balası oldu...
Qısacası, Lerikin kəndlərində Azərbaycan Qanunlarına əməl olunmur. Məmurlar xalqa xidmət etmək əvəzinə onu öz qirovuna çevirir.
Zəfər ORUCOĞLU Azərbaycan Jurnalistlər Birliyinin üzvü
