Yeni tədris ilinin başlanmasına artıq sayılı günlər qalıb. Lakin valideynlər uşaqlarına yeni məktəbli formaları almaqda çətinlik çəkirlər. Çünki dəfələrlə Bakı Tikiş Evinə (BTE) üz tutan və orada saatlarla gözləyən valideynlər sonda oradan əliboş qayıtmağa məcbur olurlar. BTE-dən valideynlərə bildirilir ki, məktəbli formaları hələ gəlmədiyib, parçalar gömrükdə qalıb.
Qeyd edək ki, yeni formaların satışına avqustun 17-dən başlanıb. Həm oğlan, həm də qızlar üçün polo uzunqol və qısaqol köynəklərin qiyməti 14 manat, şalvarlar 25 manat, jaket 27 manat, ətək isə 25 manatdan satışa çıxarılıb. Xatırladaq ki, bu ilin mart ayında baş nazir Əli Əsədov “Dövlət ümumi təhsil müəssisəsi təhsilalanlarının geyim formalarının təsvirlərinin təsdiq edilməsi” haqqında qərar imzalayıb. Qərara əsasən, dövlət ümumi təhsil müəssisəsi təhsil alanlarının geyim formalarının təsvirləri təsdiq edilib. Artıq növbəti tədris ilindən etibarən yeni məktəbli formalarının tətbiqinə başlanılacaq. Bu Qərar 2022-2023-cü tədris ilindən tətbiq edilir, hazırda istifadədə olan geyim formaları 2022-2023-cü tədris ilinin sonunadək tətbiq edilə bilər. Göründüyü kimi, Nazirlər Kabinetinin qərarında da bildirilib ki, ötən il istifadə olunan geyim bu il üçün də tətbiq edilə bilər. Ancaq məktəb direktorları valideynlərə indidən tapşırıq verir ki, dərsə gələcək uşaqlar filan rəngli forma geyinməlidir. Əks halda uşaq dərsə buraxılmayacaq. Bu səbəbdən də valideynlər təlaşla övladlarına məktəbli forması almaq istəyir. Ancaq BTE sifarişləri çatdıra bilmir.
“Hazırda məktəbli formalarının alışı ilə bağlı böyük ajiotaj var, buna səbəb isə …”
Yaramış vəziyyətlə bağlı Bakı Tikiş Evinin satış şöbəsinin rəisi Etibar Əzimov bildirdi ki, hazırda məktəbli formalarının alışı ilə bağlı böyük ajiotaj var: “Ajiotajın yaranmasına səbəb böyük siniflərin də məktəbli forması almaq istəməkləridir. Məlumdur ki, elm və təhsil naziri Emin Əmrullayev açıqlamasında bildirdi ki, yeni məktəbli formaları hələlik ibtidai sinif şagirdlərinə aiddir. Lakin indi bütün məktəblilər bura axışıblar. Hətta 11-ci siniflər də yeni forma almaq istəyir. Lakin bir sezonda yeni formalara tam keçmək mümkün deyil. Ona görə də, hazırda çıxılmaz vəziyyətdə qalmışıq və bu qədər formanı çatdıra bilmirik. Çünki tələbat böyükdür və birdən-birə o qədər gücümüz, imkanımız yoxdur. Ölkədə isə yalnız bir fabrik var. Ona görə də, eyni vaxtda hamıya məktəbli forması çatdırmaq qeyri-mümkündür.
Onu da deyim ki, parçaların ölkədə olmaması da işə böyük əngəl törədir. Bizdə nə yun parça, nə də yüz faiz pambıq parça istehsal olunur. Parçaları sifariş vermişik, lakin sərhəddə qalıb. Çünki maşınları növbə ilə buraxırlar. Yəni belə problemlərimiz var. Bütün bunlar bizdən asılı olmayan səbəblərdir. Hazırda ibtidai siniflərin məktəbli formaları tam hazırdır. Nə qədər desəniz ətək və şalvarlar var. Əvvəllər 38 ölçüyə kimi tikirdik, ancaq indi 44-46 da tikirik. Çünki başqa əlac yoxdur. Neynəyək? Yuxarı siniflər də gəlir. Hazırkı vəziyyəti tam kontrol edə bilmirik. Gün ərzində tikilir və səhər tezdən mağazaya qoyuruq. Hər gün satış 9-dan 6-a kimi həyata keçirilir. Camaat gəlib, alıb gedirl. Tələbat böyükdür. Material az olduğuna görə, günə yalnız 100-150 polo tikirik. Material gəldikdən sonra isə gündə 500-600 polo tikib satışa buraxacağıq”.
Günel CƏLİLOVA
