İlahiyyatçı Elşad Miri Mir Mövsüm Ağa haqqında daha bir qalmaqallı açıqlama verib. O, yayımladığı videoda bildirib:
“Mir Mövsum, el arasında “Ətağa” olaraq adlandırılan, bəzən səhv edərək, bəzən də günah edərək and içdikləri şəxs barədə bir məqamı qeyd etmək istəyirəm. Onun özünün heç bir zaman namaz qılmadığını, “Qurani-Kərim” oxumadığını onu görən şəxslərin özləri deyirlər".
Yayımladığı videonun ardına isə ilahiyyatçı professor Fərid Mahmudovun “Ətağa” haqqında dediyi sözləri birləşdirib. Bununla da ilahiyyatçı xalq arasında “Ətağa” haqqında inancın səhv olduğunu sübut etməyə çalışıb. Professor "Onun sümükləri yumşaq olub, bədənində kalsium çatmırdı. “Ətağa”nın göbəyini kəsərkən infeksiya salıblar. Yaşa dolduqca onun sümükləri yumşaqlaşıb, dili danışmayıb. Bir bacısı onu başa düşüb. Ona görə də Ağa nə oxuyub, nə Qurani bilib, nə də namaz qılıb", - deyə videoda çıxış edir.
Artıq bir neçə gündür ki, Elşad Mirinin "Mir Mövsüm Ağa möhtəşəm seyid idisə, niyə özünu sağaltmırdı?" açıqlaması hiddətlə qarşılanıb. Hətta Hacı Şahin də çıxışlarının birində bu məsələyə öz münasibətini ifadə edərək, dolayısı yolla Elşad Mirini tənqid edib.
Çox maraqlıdır, cəmiyyətdə özünü dindar kimi tanıdan şəxslər niyə daha ciddi mövzular deyil, mübahisə doğuran belə mövzulara müraciət etməli olurlar?
İlahiyyatçı Tural İrfan “Bakı-Xəbər”ə açıqlamasında bildirdi ki, Elşad Miri və Şahin Həsənli kimi adamların bu kimi mövzuları gündəmə gətirib müzakirə açmasına çox tənqidi yanaşır: “Onların hər ikisi bu cür mövzularla dindar kəsimi məşğul edir. Bu cəhdlərin hamısı, dini maraqların qorunmasından daha çox, populyarlıq qazanmağa görə edilir. Xalqın milli-mənəvi inanclarına toxunmaq din adamına yaraşmayan bir işdir. Azərbaycanda hörmət və ehtiramı saxlanılan hər bir ziyarət, hər bir abidə əzizdir. Onları qorumaq lazımdır. Kimsə buna tənqidi yanaşırsa, öz içində bunu bilsin, belə mövzuları təbliğat mövzusuna çevirməsin. Mir Mövsüm Ağa kimi nüfuzlu adamı hədəf seçmək xalqın inancını təhqir etməkdir. İnsanlar gedib orada xurafat edirsə, bu başqa məsələdir. Adam var Quranla fala baxır, biz dini kitabdan imtina etməliyik? Belə adamların şəxsiyyəti ətrafında müzakirənin aparılması gərək deyil. Elşad Miri dini dərindən bilirsə, xəstə insana dil uzatmamalıdır. Allah onların namaz qılmamağını və ya oturaraq ibafət etməsini qəbul edir. Elşad Miri əminliklə deyə bilməz ki, Mir Möhsüm Ağa namaz qılmayıb. Namaz yalnız əyilib-qalxmaqdan ibarət deyil. Hətta gözün işarələri ilə belə Allah ona ibadəti qəbul edir. Vəfat etmiş şəxs haqda bu cür müzakirənin aparılması həm də əxlaqi normalara sığmır. Şahin Həsənli kimi adamların belə mövzulara reaksiya verməsi də tam yersizdir. Belə adamlar sanki ölkədə dini qütbləşmə yaratmaq istəyir. Şahin Həsənli sanki xurafatın dərinləşməsinə güc verir. Bu cür adamlar inkarları deyirlər, ancaq təsdiq etdiklərini də ortaya qoymurlar. Bu cür mübahisələrə aparanlar həm də böyük günah etmiş olurlar. Din adamları insanları vəhdətə, mehribançılığa çağırmalıdır. Bu şəxslərin hər ikisi dərin dini bilgilərə sahib olmayan insandı. Buna sahib olsalar, belə mübahisələrdə iştirak etməzlər”.
Məhəmmədəli QƏRİBLİ
