Son zamanlar ölkədə “Poz, qazan” ani lotereya oyunu xeyli məşhurlaşıb. Hər gün avtobus dayanacaqlarında, metro çıxışlarında satılan “Qızıl 2”, “Şans ulduzu” və “Brilliant” ani lotereyaları, xüsusilə kasıb təbəqədən olan vətəndaşların aldığının şahidi oluruq. Belə lotereyaların satılması sosial problemlərin artdığı və işsizliyin hökm sürdüyü dövrə təsadüf etdiyi üçün daha çox insan auditoriyası yığmağa nail oldu.
Ekspertlər bildirir ki, vətəndaşlar müxtəlif yollarla aldadılır, onlara ümid verilir. Onlara külli miqdarda pul udacağı deyilsə də, nəticə etibarilə burda tək bir udan var, o da bu xidməti göstərən təşkilatdır. Düzdür, burda uduşlar da olur, kimlərsə hansısa məbləği qazanırlar, amma ümumi götürdükdə, vətəndaşlar kiçik həcmdə çoxlu sayda vəsait itirirlər. Təəssüflər olsun ki, onların ümidləri çox vaxt doğrulmur, nadir hallarda şans kimlərinsə üzünə gülür.
Qeyd etdiyimiz kimi, bu oyuna aludə olanların sayı günü-gündən artır. Təəssüf ki, cibindəki son qəpiyi lotereya oyununa verib, əvəzinə heç nə qazanmayan insanlar az deyil.
“Poz, qazan” lotereya oyunları küçələrdə keçirilir. Ancaq qanunvericiliyə əsasən, lotereya oyunları küçədə keçirilə bilməz. Təəssüf ki, şəhərin istənilən küçəsində kiçik bir masanın üzərində qeyd edilən lotereya oyununun keçirilməsinin şahidi oluruq.
“Lotereya oyunları notarial qaydada həyata keçirilməlidir, qanun baxımından lotereyalara çox sərt tələblər qoyulur”
Hüquqşünas Əkrəm Həsənov bildirdi ki, lotereyanın özü küçədə keçirilə bilməz: İndi demək olar ki, hər küçədə qumar masalarına rast gəlmək olur. Elə bil ki, Bakı küçələri ötən əsrin 80-ci illərinin sonu, 90-cı illərin əvvələrinə qayıdıb. O vaxt dələduzlar küçələrə masa qoyub üskük fırladır və insanların pulunu, demək olar ki, oğurlamaqla məşğul olurdular. İndi də eyni vəziyyətlə üzləşmişik. Ümumiyyətlə, lotereyaların keçirilməsi qeydiyyatla olur. Yəni lotereyalar qeydiyyata alınmalıdır. Qeydiyyat zamanı lotereyanın keçirildiyi ərazi də qeyd edilməlidir. Onların tiraj komissiyası olmalıdır və s. Eyni zamanda lotereya oyunları notarial qaydada həyata keçirilməlidir. Qanun baxımından lotereyalara çox sərt tələblər qoyulur. Buna görə mən lotereyaların küçədə keçirilməsini təsəvvür edə bilmirəm. Lotereyanın özü küçədə keçirilə bilməz. Hesab edirəm ki, bu baxımdan qanunda müəyyən boşluqlar var. Bu boşluqdan da istifadə edirlər. Çünki onlar deyə bilərlər ki, biz hər küçəni lotereyanın ərazisi hesab edirik. Bu baxımdan daha yaxşı olardı ki, qanun daha da sərtləşdirilsin. Elə edilməlidir ki, qanundan sui-istifadə edilməsin.
Hesab edirəm ki, bu məsələ ilə bizim dövlət orqanları məşğul olmalıdır. Küçələrdə lotereya oyununlarının oynanılması qadağan olunmalıdır”.
Günel CƏLİLOVA
