Azərbaycanın ümumtəhsil məktəblərində rus bölməsində yerlərlə bağlı çatışmazlıqlar müşahidə olunur. Bununla bağlı valideynlər narazılıq edir. Hətta bir neçə gün əvvəl bir qrup valideyn Bakı Şəhər Təhsil İdarəsinə şikayət etmək üçün qurumun qarşısına toplaşıb.
Onların həmin qurumun qarşısında toplaşmasına səbəb odur ki, ərizə qəbulu və imtahan mərhələsindən övladlarını keçirsələr də, məktəblərdə rus bölməsinə yerləşdirə bilmirlər.
Qeyd edək ki, son illər rus bölməsində təhsilə maraq artıb. Bu səbəbdən də rusdilli məktəblərdə qəbulla bağlı problem yaşanır.
Ekspertlər bildirir ki, təhsil sistemində rus bölməsi üzrə pedaqoqlar çatışmır. Üstəlik, vakant müəllim yerlərinə keçirilən imtahanlarda rusdilli müəllimlər yüksək nəticələr göstərə bilmir. Nəticədə əlavə rusdilli qruplara uşaqları qəbul etməkdən imtina edilir.
Məsələ ilə bağlı Bakı Şəhər Təhsil İdarəsindən bildirildi ki, tədrisin bir neçə dildə aparıldığı məktəblərdə yerlər məhdud saydadır: “Həmin məktəblərdə ərazi prinsipinin əsas götürülməsi bütün nüraciətlərin təmin olunmasına əsas vermir. Bəzi valideynlərin elektron xidmərlərdən səmərəli istifadəyə maraq göstərməməsi və ya zərurət olmadan birbaşa işçi qrupuna müraciət etməsi vaxt itkisinə səbəb olur. Valideynlər hər hansı bir məsələyə aydınlıq gətirmək istədikdə məktəbə qəbul üzrə elektron sistemdə olan şəxsi kabinetlərinin əlaqə bölməsi vasitəsilə hər hansı bir məsələyə daha operativ cavab ala bilərlər. Şagird təhsilə hansı dildə başlayırsa, o dildə də davam edəcək”.
Təhsil eksperti Kamran Əsədov bildirdi ki, rus bölməsinə qəbulla bağlı süni maneələr var: “Bu sahədə yaşanan problemi həll etmək üçün məktəblərə əlavə müəllim qəbul oluna bilər. Həmçinin, əlavə sinif açmaqla məlum problem həll olunmuş olar. Nəzərə almaq lazımdır ki, o uşaqlar rus bölməsində təhsil alıb. Onların təhsillə bağlı çətinlik çəkməməsi üçün bu sahədə yaşanan problem həll olunmalıdır”.
Günel CƏLİLOVA
